Idi Oktubre 20, 2012, maragsakan dagiti Saksi ni Jehova iti Korea idi naidedikar ken Jehova dagiti napabaro ken kaibangbangon a pasdek ti sanga nga opisina. Naisangsangayan daytoy nga okasion gapu ta ipalagipna kadagiti kakabsat ti 100 a tawen a matalek a panagserbida. Iti dayta met la a tawen, dimmanonen iti nasurok a 100,000 ti bilang dagiti agibumbunannag. Agarup 1,200 a boluntario iti Korea ken 239 nga international servant ken boluntario manipud iti siam a pagilian ti nagtitinnulong a nangibangon iti baro a residence building, printery building, talyer, ken dagiti audio/video studio. Naan-anay a napabaro met ti kaaduan nga agdama a pasdek.

 Ni Anthony Morris a kameng ti Bagi a Manarawidwid ti nangipaay iti makaparegta a palawag ti dedikasion a tinabunuan ti 3,037 a kakabsat. Kabigatanna, adda espesial a miting a naangay iti maysa a nalawa nga exhibition hall, ken nasurok a 1,300 a kongregasion iti Korea ti naka-hook-up babaen ti Internet. Agdagup iti 115,782 a Saksi ni Jehova ken interesado a tattao ti nakangngeg iti nagsayaat a naespirituan a programa.

Saanto a malipatan ti petsa a Marso 9, 2013, iti pakasaritaan dagiti agdaydayaw ken Jehova iti Liberia. Nagtataripnong dagiti bisita manipud iti 11 a pagilian para iti pannakaidedikar ti napabaro ken napalawa a sanga nga opisina. Naragsakan ti amin a nakangngeg iti palawag ti dedikasion nga impaay ni Guy Pierce a kameng ti Bagi a Manarawidwid. Kalpasan ti nasurok a maysa a dekada a gerra sibil a nangpabayag iti panagplano ken panagibangon, napalawa met laeng ti sanga nga opisina ta nagatangda ti kaabayna a lote a dati a paglemlemmengan ken kampo dagiti rebelde. Maragsakan dagiti 51 a Bethelite a mangusar iti 35 ti  siledna a residence building, napabaro nga office building, baro a shipping warehouse, maintenance building, kitchen, ken dining room.

Nasisingpet ken relihioso dagiti tattao iti Republic of Georgia. Idi nagpatinggan ti Soviet Union, adda naisangsangayan a tiempo ti panagrang-ay iti naespirituan a sinaruno dagiti nakaro a pannakaidadanes. Ita, saanen a nakaro ti ibubusor, ket maysa a nakallalagip a pasamak iti pakasaritaan dagiti Saksi ni Jehova iti Georgia ti naaramid idi Sabado, Abril 6, 2013. Impaay ni David Splane a kameng ti Bagi a Manarawidwid ti palawag ti dedikasion para iti napabaro ken napalawa a sanga nga opisina, Assembly Hall, ken baro a pasdek para iti School for Kingdom Evangelizers ken School for Traveling Overseers and Their Wives. Nasurok a 800 a Saksi iti Georgia ken 338 a bisita manipud iti 24 a pagilian ti timmabuno iti programa ti dedikasion.

Iti sumaganad nga aldaw, 15,200 ti nakangngeg ken nakabuya iti espesial a palawag ni Brother Splane a nai-hook-up kadagiti paggigimongan dagiti kongregasion iti intero a Georgia. Adu ti natukay ti riknana iti daytoy nga internasional nga okasion. Kuna ti maysa nga agtutubo a kabsat, “Ita, ammokon no anianto ti rikna no addaka iti baro a lubong.”

Idi Hunio 29, 2013, naidedikar ti baro a tallo ti kadsaaranna nga office building iti Bethel iti Yangon, Myanmar. Ni Guy Pierce a kameng ti Bagi a Manarawidwid ti nangipaay iti palawag ti dedikasion a tinabunuan ti 1,013 a pakairamanan dagiti bisita manipud 11 a pagilian. Ti grupo dagiti kakabsat a taga-Myanmar a mangsabat kadagiti bisita iti Yangon International Airport ket inasitgan ti maysa a lalaki a naggapu iti pagilian a maiparit ti trabaho dagiti Saksi ni Jehova. Intudona ti iggemda a karatula a “Welcome  Jehovah’s Witnesses” sa dinamagna, “Umayyo kadi sabten dagiti testigo iti maysa a kaso?” “Saan, sabtenmi dagiti gagayyemmi,” insungbatda. “Siasino ngarud dayta Jehova?” insaludsod ti lalaki. Iti ababa a pannao, kinasabaan dagiti kakabsat. Kalpasan ti programa ti dedikasion, naangay ti espesial a miting kabigatanna iti Myanmar Convention Center. Impalawag ni Brother Pierce ti tema nga “Agserbi ken Jehova Buyogen ti Mannakaawat a Puso.” Nai-hook-up ti programa babaen ti telepono iti innem a lokasion iti intero a Myanmar, ket 2,963 ti nakangngeg iti naintiempuan nga impormasion. Maysa a drayber ti bus a nangitulod kadagiti lumugar a kakabsat iti espesial a miting iti Yangon ti nagkuna: “Napaliiwko a naidumdumakayo kadagiti amin a relihion. Nakasingsingpetkayo, nagmayat ti panagbadbadoyo, ken nakaas-asikayo. Nabayagakon a drayber iti bus ngem ita laeng a makakitaak iti kastoy kadisente a tattao!”

Nakaragragsak dagiti matalek nga ad-adipen ni Jehova iti Moldova ta idi Mierkoles, Hulio 3, 2013, impaay ni  Stephen Lett a kameng ti Bagi a Manarawidwid ti palawag ti dedikasion iti kabbaro a napalawa a pasilidad ti sanga nga opisina. Karaman ditoy ti tallo ti kadsaaranna a pasdek nga addaan iti literature depot ken 10 a residence room, kasta met ti dua ti kadsaaranna a Kingdom Hall, nga usaren ti pito a kongregasion. Maragsakan ti 33 a Bethelite ti Moldova a nangpasangbay kadagiti bisita manipud Germany, Ireland, Netherlands, Romania, Russia, Ukraine, ken United States. Timmabuno met ti adu a kakabsat a nagserbi a simamatalek ken Jehova bayat dagiti tiempo a maiparit ti trabaho. Dadduma kadakuada ti timmulong idi a nagkopia ken nagiwaras kadagiti literatura. Karaman pay kadagiti timmabuno ti adu a naideporta idi a kadua dagiti nagannakda idiay Siberia bayat ti pannakaidadanes dagiti Saksi ni Jehova iti dati a Soviet Union. Iti Domingo, impaay ni Brother Lett ti makapabileg a palawag a naipatarus iti Romanian ken Russian a tinabunuan ti 14,705—ti kadakkelan pay laeng a taripnong dagiti Saksi ni Jehova iti Moldova.

Impaganetget ni Jesus a masapul nga ‘agkararagtayo ken ditay sumuksuko.’ (Luc. 18:1) Pabilgenyo ti namnamayo tunggal agkararagkayo. Gapuna, “agkararagkayo a di agressat,” wen “reggetanyo ti agkararag.” (1 Tes. 5:17; Roma 12:12) Bayat nga aramidenyo dayta, ‘ti Dios ti talna kabalannakayo koma iti tunggal naimbag a banag tapno aramidenyo ti pagayatanna, nga aramidenna kadakayo babaen ken Jesu-Kristo daydiay makaay-ayo unay iti imatangna.’—Heb. 13:20, 21.