Idiay Sweden, maysa a babai a taga-Somalia ti naawis a makigimong iti Kingdom Hall. Napan met ngem saan a nasayaat ti napasamak. Awan ti nangkablaaw kenkuana. Kitkitaen laeng ti amin isu a mababain unay. Adda nakadlaw nga alusiisen ti babai isu a nagdamag, “Nagkamalikayo kadi iti immayan?”

 “Wen sa!” kinunana, ket pimmanawen. Idi nagkikitada manen kadagiti Saksi a nangawis kenkuana, nasuron ket imbagana kadakuada a saanton a pulos mapmapan iti gimongda. Masdaaw dagiti kakabsat ta dida met nakitkita iti Kingdom Hall. Iti panagsasaritada, naammuanda a kapilia gayam ti napananna!

Inawis manen dagiti Saksi nga umay iti Kingdom Hall. Immanamong met ngem kunana a saan nga agbayag iti 10 a minuto no alusiisento sadiay. Idi simrek iti Kingdom Hall, nabara ti panangkablaaw ti amin kenkuana! Maragragsakan unay ta isu payen ti naudi  a rimmuar iti Kingdom Hall kalpasan ti gimong. Sipud idin, regularen a makigimgimong ket bautisado itan nga agibumbunannag.

Ni Stergios ket maysa nga agkabannuag a lalaki a taga-Greece. Idi agawid manipud iti pagtrabahuanna iti maysa nga agsapa, nagna iti sabali a kalsada. Napataliaw ni Stergios iti papel a nakawara iti kalsada. Imbitasion dayta ti Memorial ti ipapatay ni Kristo. Nabasana ti saludsod nga: “Ania ti pangibilangam ken Jesus?” Gapu ta adu ti tao iti aglawlaw, mabain ni Stergios a mangpidut iti imbitasion. Idi nakaawiden, nalagipna ti nayimprenta a saludsod ket kayatna a maammuan ti dadduma pay a nakasurat sadiay.

Nakitulag ni Stergios kadagiti gagayyemna a mapanda agkape iti dayta a malem. Idi mapan iti nagtutulaganda, nagna iti kalsada a nakakitaanna iti imbitasion bareng no adda pay. Adda nga agpayso ngem dina latta innala ta adu pay la ti tao. Idi agawiden kalpasan ti panagkapeda, nagna ni Stergios iti isu met la a kalsada ket adda pay la ti imbitasion isu a pinidutnan. Binasana dayta ket inkeddengna a tabunuan ti Memorial.

Kalpasan ti Memorial, inawat ni Stergios ti tukon a libre a panagadal iti Biblia. Rinugianna ti makigimong ket rimmang-ay iti naespirituan. Nabautisaran iti maysa nga espesial nga asamblea idi Marso 2013.

Ni Finn ket maysa a kabsat a lalaki a taga-Copenhagen, Denmark. Idi Enero 2010, napan nagpagnapagna  iti ruar ken nangitugot kadagiti magasin. Bayat a magmagna iti iskinita, adda nasabatna a lakay. Inikkan ni Finn kadagiti ruar ti magasin a Disiembre 2009, nga addaan kadagiti artikulo maipapan iti Krismas. Idi agsao ti lakay, nailasin ni Finn ti timekna. Isu ti nakalalaing a host iti maysa a programa iti radio. Kabigatanna, dimngeg ni Finn iti programa iti radio ket nasdaaw idi imbaga ti host nga immawat kadagiti magasin iti napalabas nga aldaw. Imbasana met iti radio ti dadduma a paset dagiti artikulo. Karaman kadagitoy ti karkarna a “bituen” a nagparang idi nayanak ni Jesus. Inadmitirna a naggapu la ketdi dayta ken Satanas.

Naragsakan ni Finn iti kasta a pannakausar dagiti magasin isu nga inawaganna ti host. Iti panagsaritada, sidadayaw a dinamag ni Finn no posible ti maaddaan iti programa iti radio maipapan kadagiti topiko ti Biblia. Kalpasan ti dua a lawas, napatgan dayta. Naipangngeg iti radio ti nasurok a 30 a sagdudua-oras a programa, a maipapan amin dayta kadagiti Saksi ni Jehova ken iti Biblia. Iti programa, pagsaritaan da Finn ken ti host dagiti napili a topiko ken sinungbatanda ti ginasut nga awag dagiti agdengdengngeg.

Maysa nga agdengdengngeg ti immawag iti teknisian ti estasion ti radio ket intedna ti numero ti teleponona. Kayatna ti pasarungkaran kadagiti Saksi isu a nayurnos a dagus dayta. Adun a tawen a makangkangngeg daytoy a lalaki iti pammadakes kadagiti Saksi ni Jehova manipud kadagiti gagayyem ken kapamiliana. Gapu kadagitoy a programa iti radio, nagbaliw ti panangmatmatna kadagiti Saksi. Narugian ti panagadal iti Biblia, ket idi 2013, timmabuno iti Memorial ken  iti espesial a palawag. Dinomingo a makigimong ken nabagas dagiti komentona iti Panagadal iti Pagwanawanan. Dadduma a kalugaranda ti mangipangpangag metten iti kinapudno gapu kadagiti nangngegda kadagitoy a programa iti radio.

Iti maudi nga aldaw ti maysa a kombension distrito iti Italy, agpipinnakada da Lucio ken dagiti gagayyemna idi adda umasideg nga agassawa. Sinaludsod ni Lucio iti agassawa no ania ti kongregasionda. “Dimi ammo ti kongregasion,” insungbatda.

“Adda kadi nangawis kadakayo?” dinamag ni Lucio.

“Awan, basta immaykami,” kinunada.

Nasdaaw ni Lucio isu nga imbagana, “Mayat man ngarud ta immaykayo.”

“Adda ngamin naibati nga imbitasion iti ridawmi isu nga immaykami,” kinunada.

Idi imbagada ti adresda, nagsao ti asawa ni Lucio a ni Ester: “Siak ti nangibati iti imbitasion! Maudi nga aldaw idin ti panagiwaras isu a tapno saan a masayang dagiti nabatbati nga imbitasion, napanunotko nga ibati dagita kadagiti ruangan nga awan dagiti bumalay.” Nakita dagiti agassawa ti imbitasion isu nga inkeddengda ti mapan iti Assembly Hall tapno tabunuan ti programa iti Domingo. Nagsasaritada iti apagbiit sa inawis da Lucio ken Ester dagitoy nga agassawa a mangan iti balayda ket intuloyda ti nagsasarita. Interesado dagitoy nga agassawa a mayadalan iti Biblia. Kanayonda a nakasagana iti panagadalda ket tumabtabuno ken agkomkomentoda itan kadagiti gimong.