IDI Sabado, Oktubre 5, 2013, adda 257,294 iti 21 a pagilian a timmabuno iti maika-129 a tinawen a miting ti Watch Tower Bible and Tract Society of Pennsylvania, iti mismo a nakaangayanna wenno babaen ti Internet (live Webcast). Iti dayta met la a lawas, naipabuya kadagiti adu pay a kakabsat ti replay ti programa. Adda 1,413,676 a timmabuno manipud iti 31 a pagilian. Dayta ti kadakkelan a taripnong dagiti Saksi ni Jehova.

Manipud idi dekada 1920, agus-usaren dagiti Saksi ni Jehova kadagiti telepono ken estasion ti radio tapno dagiti kombension ket mangngegan kadagiti nadumaduma a pagilian. Ita, babaen ti Internet, uray dagiti adda kadagiti  nasulinek a lugar mangngeg ken mabuyadan dagiti pasamak—kabayatan wenno kalpasan a mapasamak dagita.

Nasurok a makatawen nga insagana dagiti kakabsat manipud iti sumagmamano a sangay ti pannakai-set-up ti Webcast. Iti ngudo ti lawas a nausar ti Webcast, 24 nga oras a binantayan dagiti teknesian ti programa manipud iti control center iti Brooklyn, New York bayat a maipabpabuya dayta iti 15 a lugar iti nagduduma nga oras.