AGARUP maysa a bulan kalpasan ti pannakapapatay ni Trujillo idi 1961, nabautisaranak bayat nga agad-adalak iti abogasia iti maysa nga unibersidad. Kayat ni tatangko nga agbalinak nga abogado, ngem makitak a napatpateg ti edukasion nga ipapaay ti Dios isu nga insardengko ti ageskuela uray no saan a kayat ni tatangko. Di nagbayag kalpasanna, nadutokanak kas special pioneer.

Ti maysa kadagiti nakaidestinuak ket ti La Vega, a nabayagen a baluarte dagiti Katoliko. Bayat ti kaaddak sadiay, awan a pulos ti nagbalin a Saksi. No agpalawagak idi, ti laeng kaduak a payunir ti agdengdengngeg. Ngem pinabpabilegnak ni Jehova babaen ti personal a panagadal iti Biblia, itatabuno kadagiti asamblea, ken napasnek a panagkarkararag. Iti kararagko, dinamagko ken Jehova no addanto pay ngata mabuangay  a kongregasion iti La Vega. Maragsakanak a mangibaga nga addan 6 a baro a Kingdom Hall, 14 a kongregasion, ken nasurok a 800 nga agibumbunannag iti Pagarian sadiay.

Nagkasarkami ken baketko nga Ángela idi 1965, ket naawiskami iti Bethel idi 1981. Idi nabautisaranak, adda laeng 681 nga agibumbunannag iti pagilian. Ita, nasuroken a 36,000 ti agibumbunannag, ken rinibu ti umat-atender iti nadumaduma nga asamblea. No lagipek ti napalabas, pagsidsiddaawak no kasano a tigtignayen ni Jehova ti puso dagiti tattao tapno maammuanda dagiti kinapudno iti Biblia.