Idi Hunio 19, 1949, maysa a grupo dagiti napagtalaw a taga-Dominican Republic ti nagsubli iti pagilianda tapno padasenda a padisien ti diktador a ni Rafael Trujillo iti puestona. Nupay dagus a napasardeng ti planoda, imbalud ti gobierno ni Trujillo dagidiay nagkedked nga agsoldado  ken ti asinoman nga imbilang ti gobierno kas kabusor. Karaman da León, Enrique, ken Rafael Glass kadagiti immuna a Saksi a naibalud kasta met dagiti kakabsat a katrabahuan ni Leon gapu ta saanda a kayat ti agsoldado.

“[Siak ken dagiti katrabahuak] ket naaresto ken pinalutpot dagiti miembro ti secret service ti militar,” kinuna ni León. “Pinalubosandakami met laeng kalpasan a binutbutengdakami, ngem kalpasan ti sumagmamano nga aldaw inayabandakami manen para iti serbisio militar. Saan a nasurot ti gagangay a proseso. Naibaludkami idi nagkedkedkami kadagiti ipapaaramidda. Adda  uppat a Saksi a nadanonmi sadiay. Kakabsatko ti dua kadakuada. Kalpasan ti pannakawayawayami, nasentensiaankami manen a maibalud. Namitlo a napasamak ti kastoy, a maysa wenno sumagmamano la nga aldaw ti baet ti tunggal sentensia. Nagpaut iti lima a tawen ti naudi a pannakaibaludmi isu a dandani pito a tawen ti pannakaibalbaludmi.”

Kanayon idi a masubok dagiti kakabsat iti pagbaludan. Aldaw ken rabii a lalaisen ida dagiti balud ken guardia. Kinuna ti komander iti Fort Ozama a damo a nakaibaludanda: “Dakayo a Saksi ni Jehova, ibagayo laeng no kayatyon ti agbalin a saksi ti Diablo ta paruarenkayon.” Ngem saan a kabaelan a dadaelen dagiti bumusbusor ti kinatarnaw dagidiay a matalek a kakabsat. Inlawlawag ni León no apay: ‘Kanayon a pabpabilgennakami ni Jehova nga agibtur ket makitami ti ibaballaetna agpaay kadakami uray kadagiti babassit a detalye. Uray idi masapsaplit, mababaut, ken mapangpang-orkami iti paltog, naibturanmi dagita gapu ta pinabilegnakami ni Jehova.’

Kimmaro ti panangidadanes dagiti bumusbusor iti pudno a panagdayaw iti sadinoman a paset ti pagilian. Ngem idi Mayo 1950, addan 238 nga agibumbunannag iti Dominican Republic malaksid pay kadagiti misionero. Payunir ti 21 kadakuada.

Iti dayta a tiempo, maysa a sekreta wenno secret agent ti militar ti nagsurat iti sekretario ti Presidente a kunkunana: “Intultuloy latta dagiti miembro ti sekta ti relihion a  Saksi ni Jehova dagiti aktibidadda iti intero a siudad [Ciudad Trujillo].” Kinunana pay: “Ipalagipko manen a masapul a siputantayo a naimbag dagiti Saksi ni Jehova gapu ta tirtiritirenda dagiti bambanag babaen ti panangasaba ken dadduma pay nga aktibidadda tapno mabalbaliwanda ti panagpampanunot dagiti tattao, nangnangruna dagiti ordinario a tattao.”

Kiniddaw ni J. Antonio Hungría a Secretary of the Interior and Police, a mangipasa ni Brother Brandt iti surat a mangilawlawag iti takder dagiti Saksi iti panagsoldado, panagsaludo iti bandera, ken panagbayad iti buis. Iti suratna, inusarna ti impormasion iti libro a “Mapapati Coma ti Dios.” Ngem idi Hunio 21, 1950, nangipaulog ni Secretary Hungría iti bilin a mangiparit iti trabaho dagiti Saksi ni Jehova iti Dominican Republic. Napaayaban ni Brother Brandt iti opisina ni Hungría tapno mangngegna a mismo ti bilin. Dinamag ni Brother Brandt no masapul a pumanaw dagiti misionero iti pagilian. Impatalged ni  Hungría a mabalinda ti agtalinaed no la ket ta agtulnogda iti linteg ken dida isarsarita iti dadduma ti maipapan iti relihionda. *