Pagayatan ni Jehova a “maisalakan koma dagiti amin a kita ti tattao ken dumtengda iti umiso a pannakaammo iti kinapudno.” (1 Tim. 2:4) Maitunos iti dayta a panangmatmat ti Dios, inkagumaan dagiti Saksi ni Jehova iti Dominican Republic a danonen dagiti tattao iti amin a suli ti teritoriada, agraman dagiti adda kadagiti pagbaludan.

Idi 1997, dua nga special pioneer ti linawas a bumisbisita iti pagbaludan ti Najayo iti San Cristóbal. Naam-ammoda ni Gloria a taga-Colombia nga agtawen iti 23 ken naibalud gapu iti panagipuslit iti droga. Nakasarsaritana idin ti maysa a kabsat a babai a naibalud uray no awan ti nainkalintegan a rason. Tapno masungbatan dagiti saludsod ni Gloria maipapan iti Biblia, inikkan dagiti kakabsat iti libro a Pannakirinnason Manipud Kadagiti Kasuratan ken dadduma pay a publikasion. Gapu iti kinagagar ken kinapingetna nga agsursuro, naginteres met ti dadduma a balud isu nga immadu dagiti masarsarungkaran iti kada lawas.

Dakkel ti nagbalbaliwan ni Gloria gapu iti kinapudno, ket nakualipikar nga agbalin a di bautisado nga agibumbunannag  idi 1999. Nasurok a 70 nga oras kada bulan ti busbusbosen ni Gloria a mangasaba iti pagbaludan, ken rumangrang-ay ti innem a babbai a balud nga iyad-adalanna iti Biblia. Idi 2000, nagaplay iti presidential pardon ket napatgan dayta gapu iti nasayaat a kababalinna. Nawayawayaan ket nagawid idiay Colombia. Idi 2001, di nagbayag kalpasan ti isasangpetna iti pagilianda, nagpabautisar uray no nakaro ti panangbusor ti pamiliana iti desisionna.

Nagpayunir ni Gloria kalpasan ti bautismona. Nakiasawa iti maysa a panglakayen ket nagserbida a regular pioneer. Agserserbida itan iti maysa a lugar iti Colombia nga addaan iti dakdakkel a panagkasapulan. Natulongan ni Gloria ti sumagmamano nga iyad-adalanna nga agdedikar ken agpabautisar. Iti panagriknana, nakautang ken Jehova isu a ti kasayaatan a pagbayadna ket ti panangtulongna iti sabsabali a mangammo iti kinapudno—kas iti napadasanna.

Ipakita ti kapadasan ni Gloria a saan a lapped dagiti rehas tapno maammuan dagiti balud ti makaispal-biag a kinapudno. Napan nakisarita dagiti pannakabagi ti sangay kadagiti opisial ti General Bureau of Prisons tapno dumawatda iti permit, iti kasta, makaikondukta dagiti kakabsat iti panangyadal iti Biblia iti ad-adu pay a pagbaludan. Kas resultana, 43 a kakabsat a lallaki ken 6 a kakabsat a babbai ti naikkan iti permit a makiraman iti trabaho a panangisuro iti Biblia iti 13 a pagbaludan.

Idi 1999 a tawen serbisio, inreport ti Dominican Republic nga adda 21,684 nga agibumbunannag iti naimbag a damag iti 342 a kongregasion, ken 34,380 a panangyadal iti Biblia, ken 72,679 ti timmabuno iti Memorial. Kas resulta ti irarang-ay, impangag ti ili ni Jehova ti naganat a  sasao ni Isaias: “Pagbalinem a nalawlawa ti disso ti toldam. Ket bay-am nga iyunnatda dagiti lupot ti tolda ti naindaklan a tabernakulom. Dika igawid. Paatiddogem dagiti singdan ti toldam.”—Isaias 54:2.

Ti maysa a karit ket no kasano ti maaddaan iti dakdakkel nga Assembly Hall a makalaon iti ad-adu nga agibumbunannag. Idi 1996, nalpas a naibangon ti Assembly Hall a kaabay ti sanga nga opisina ket us-usaren dayta dagiti adda iti Santo Domingo ken asideg a luglugar. Ngem masapul a matarimaan wenno masukatan pay ketdin ti Assembly Hall idiay Villa González, nga us-usaren dagiti kakabsat iti dadduma pay a paset ti pagilian.

Idi 2001, inaprobaran ti Bagi a Manarawidwid ti pannakaipatakder ti Assembly Hall a makalaon iti 2,500, iti lote iti Villa González. Naragsakan dagiti kakabsat idi naammuanda dayta ta adda pay maibangon a pasilidad a mausar para iti Ministerial Training School (nasukatan itan iti  School for Kingdom Evangelizers). Mayabay dayta iti Assembly Hall ken addaan kadagiti kuarto, maysa a siled a pagadalan, libraria, kosina ken panganan. Ni Brother Theodore Jaracz, a kameng ti Bagi a Manarawidwid, ti nagpalawag iti dedikasion daytoy a baro a pasilidad idi 2004. Manipud idi, 15 a klase ti nagturposen iti eskuelaan.