DOMINICAN REPUBLIC
Agtalinaedda ditoy
Nabirokanda ti Kinapudno
Nakipagadal iti Biblia ni Juana Ventura bayat a maiparparit ti trabaho a panangasaba, ken nabautisaran idi 1960 idiay Ozama River. Naminsan, kayat ti maysa a pastor iti Santo Domingo a maibalud ni Juana gapu ta ag-agawenna kano dagiti pasurot ti pastor. Kayatna a maibabainna ni Juana ken mapaneknekan nga ulbod dagiti Saksi ni Jehova isu a pinaayabanna iti kapilia tapno sungbatanna dagiti saludsod maipapan iti baro a relihionna.
“Tallo ti insaludsodna kaniak,” kuna ni Juana, “‘Apay a dikay agbutbutos? Apay a dikay makiramraman iti gubat? Apay a Saksi ni Jehova ti awagyo iti bagbagiyo?’ Bayat a sungsungbatak manipud iti Biblia dagiti saludsod, sapulen ti amin a pasurotna dagiti teksto iti Bibliada ket nasdaawda iti mabasbasada. Adu kadakuada ti nakabigbig a nabirokandan ti kinapudno. Nakipagadal ti intero a grupo
ket idi agangay, 25 ti nangidedikar iti biagda ken Jehova.” Daytoy a nagsayaat a pasamak ti ad-adda a nangparayray iti trabaho iti Santo Domingo.Nalawag nga Agtalinaed Ditoy Dagiti Saksi ni Jehova
Dakkel ti epektona iti politika ti pannakapapatay ni Trujillo. Inreport ti 1963 a Yearbook: ‘Agkaiwara dagiti soldado iti kalsada, ken uray no aldaw, nakaad-adu ti mapaspasamak a panaglalaban ken kinaranggas.’ Uray no nariribuk iti politika, rimmang-ay latta ti trabaho a panangasaba ken panagaramid-adalan. Iti ngudo ti 1963 a tawen serbisio, dimmanonen iti 1,155 ti bilang dagiti agibumbunannag.
Idi bimmisita ni Nathan Knorr iti Dominican Republic manipud sangalubongan a hedkuarter idi 1962, inyurnosna ti pannakagatang ti daga a pakaibangonan ti daddadakkel a pasilidad tapno maasikaso ti rumangrang-ay a trabaho a panangasaba. Naipatakder ti dua ti kadsaaranna a pasdek ken maysa a Kingdom Hall iti nagatang a lote. Immay met ni Frederick Franz a naggapu met laeng iti sangalubongan a hedkuarter tapno ipaayna ti palawag ti dedikasion dagiti pasilidad ti sangay iti Sabado, Oktubre 12, 1963. Nalawag nga agtalinaed dagiti Saksi ni Jehova iti Dominican Republic. Di nagbayag kalpasan a naidedikar dagitoy a pasilidad, simmangpet da Harry ken Paquita Duffield. Isuda dagiti maudi a misionero a napagtalaw idiay Cuba.
Iyaadu iti Laksid ti Rebolusion
Idi Abril 24, 1965, napasamak ti rebolusion iti pagilian. Nagtultuloy a rimmang-ay ti ili ni Jehova uray kadagiti simmaganad a nariribuk nga al-aldaw. Idi 1970, addan 3,378 nga agibumbunannag iti 63 a kongregasion. Iti napalabas a lima a tawen, nasurok a kagudua dayta a bilang ti nainayon iti organisasion. Inreport ti 1972 a Yearbook:
“Nagduduma ti kasasaadda iti biag: Adda mekaniko, mannalon, drayber iti pangpasada a lugan, accountant, agipatpatakder iti nadumaduma a pasdek, karpintero, abogado, dentista, ken dati a politiko; nagkaykaysada amin gapu iti panagayatda ken Jehova ken iti kinapudno.”