TALAGA a makaparagsak a makita a pappapartaken ni Jehova ti panagsaknap ti pudno a panagdayaw iti intero a lubong! (Isa. 60:22) Kas resultana, adu latta ti kasapulan a Kingdom Hall. Iti intero a lubong, nasurok a 13,000 ti kasapulan a maibangon wenno ma-renovate.

Tapno mapapartak ti trabaho iti pamay-an a saan unay a dakkel ti magasto, nangaramid ti Bagi a Manarawidwid kadagiti panagbalbaliw iti nadumaduma a construction department. Ti nabiit pay a nabukel a Worldwide Design/Construction Department (WDC) ket adda iti sangalubongan a hedkuarter idiay Brooklyn, New York. Responsabilidad ti WDC nga iyeskediul ken papartaken dagiti  proyekto ti organisasion iti intero a lubong. Trabaho met dagiti Regional Design/Construction Department (RDC), nga adda kadagiti sangay ti Australasia, Central Europe, South Africa, ken United States, nga organisaren dagiti proyekto kadagiti masakupanda a lugar. Panggep dagiti RDC a naparpartak ken saan unay a dakkel ti magasto iti panangibangon kadagiti Kingdom Hall. Sansanayenda met dagiti masakupanda a sangay a mangmantener kadagiti pasilidad ti organisasion iti teritoria ti sangay. Iti met tunggal sangay, iwanwanwan ti Local Design/Construction Department (LDC) ti aktual a panangibangon ken panangmantener kadagiti Kingdom Hall ken Assembly Hall.

Idi Enero 2015, immatender ti amin a panglakayen idiay United States iti maysa a makapagagar a miting babaen ti nai-hook-up a video. Nailawlawag iti dayta ti baro nga urnos ti panangplano, panagibangon, ken panangmantener kadagiti Kingdom Hall. Daytoy ti nasursuroda.

• Panagibangon: Ti disenio ti Kingdom Hall ken dagiti materiales a mausar ket maibatay iti instruksion ti Publishing Committee ti Bagi a Manarawidwid ken maibagay iti kasasaad ti lugar. Napintasto dagita a patakder ngem nalaka laeng a manteneren, ken natibker uray no saan unay a dakkel ti nagasto iti pannakaibangonna.

• Panangmantener: Iti kada kongregasion, adda dagiti kakabsat a masanay a mangaywan ken mangmantener kadagiti Kingdom Hall tapno saan nga alisto a madadael.

Dakkel a trabaho ti kasapulan para iti panagibangon ken panangmantener, ngem dakkel ti maaramidan ti panagkaykaysa ken panagtitinnulong ti ili ti Dios tapno pumartak ti trabaho ken nasayaat ti pannakausar dagiti pondo a naidonar.