Dagiti Tampok iti Napalabas a Tawen

I-PLAY

BAYAT a makapaspasar ti lubong ni Satanas iti agsasaruno a didigra, dagiti pudno nga agdaydayaw ken Jehova agtultuloy nga ‘adu ti ar-aramidenda iti trabaho ti Apo.’ (1 Cor. 15:58) Ipakita dagiti sumaganad a report no kasano nga ikagkagumaan dagiti Saksi ni Jehova iti intero a lubong nga ipakita nga ‘agtaltalekda ken Jehova, ar-aramidenda ti naimbag, ken makilanglangenda buyogen ti kinamatalek.’—Sal. 37:3.

Pannakayakar ti Sangalubongan a Hedkuarter ken Sanga nga Opisina

Idi Pebrero 1, 2016, nalpasen ti pannakapalawa dagiti pasilidad idiay Wallkill, New York, ket nayakaren sadiay ti United States Branch Committee, ti Service Department, ken ti dadduma pay a departamento ti sangay. Malmalpas metten ti baro a sangalubongan a hedkuarter idiay Warwick, isu nga inrugin ti pamilia ti Bethel idiay Brooklyn ti umakar manipud New York City a mapan iti away.

Inton Lunes, Abril 3, 2017, mabalinen ti ag-tour idiay Warwick. Iti dayta a tour, adda nayurnos a panagpasiar nga adda tour guide ken adda tallo nga eksibit a mapasiar nga awan ti tour guide.

Iti “The Bible and the Divine Name,” adda dagiti nakadispley a Biblia a manmano ti kopiana, ken naitampok ti kinapudno nga agparang ti nagan ti Dios iti Kasuratan.
Iti “A People for Jehovah’s Name,” naitampok ti pakasaritaan dagiti Saksi ni Jehova a mangipakita nga iwanwanwan, isursuro, ken or-organisaren ni Jehova ti ilina tapno maaramidda ti pagayatanna.
Makita iti “World Headquarters—Faith in Action” no kasano a tultulongan dagiti komite ti Bagi a Manarawidwid ti ili ni Jehova tapno makapagtataripnongda, makaaramidda kadagiti adalan, mataraonanda iti naespirituan, ken maipakitada ti ayat iti maysa ken maysa.

Mabalinto a mapasiar dagitoy nga eksibit nga awan ti tour guide manipud Lunes agingga iti Biernes iti 8:00 a.m. agingga iti 4:00 p.m. Adda met 20 a minuto a panagpasiar nga adda tour guide a mangipakita iti dadduma a paset ti Offices/Services Building ken ti aglawlaw ti Bethel. Ti panagpasiar nga adda tour guide ket maaramidto manipud Lunes agingga iti Biernes iti 8:00 a.m. agingga iti 11:00 a.m. ken 1:00 p.m. agingga iti 4:00 p.m.

Sakbay nga iplanoyo ti bumisita, pangngaasiyo ta luktanyo ti jw.org/ilo ket kitaenyo ti MAIPAPAN KADAKAMI > OPISINA KEN PANAGPASIAR > United States.