Gapu ta adu ti refugee idiay Germany ken adu ti immakar a naggapu iti sabali a pagilian, immadu dagiti agsasao iti sabali a lengguahe a mabalin a makasabaan. Itay nabiit, 229 a grupo ken pregroup iti sabali a lengguahe ti nairugi iti uneg ti siam a bulan. Adda maar-aramid nga agarup 30 a klase iti panagadal iti lengguahe iti 13 a pagsasao ket sumurok-kumurang a 800 nga agibumbunannag ti umat-atender kadagita.

Mangaskasaba dagiti kakabsat kadagiti refugee camp. Babaen kadagiti cart a naipuesto iti nasurok a 200 a lokasion, nakaipaimada iti agarup 640,000 a publikasion.

 Inaprobaran ti Bagi a Manarawidwid ti espesial a kampania a panangasaba manipud Mayo agingga iti Hulio 2016. Agarup 700 nga agibumbunannag nga agsasao iti Arabic a naggapu iti 7 a pagilian ti napan iti 10 a lugar idiay Austria ken Germany tapno mangasaba iti adu a tattao nga agsasao iti Arabic.

Masansan a magmagna ti 50 nga agibumbunannag iti Faber’s Road Kriol Congregation idiay Belize no mapanda mangasaba. Marigrigat ti kaaduan a kakabsat, ngem mangpampanunotda iti pamay-an tapno makaitedda latta iti donasion. Sumagmamano a tawenen ti napalabas, nangrugi a nagpidut dagiti kakabsat kadagiti baria a makitada iti dalan no agbalaybalayda. Sipud idin, kada agleppas ti tawen, agkakaduada a mangbuggo, mangyurnos, ken mangbilang kadagiti baria a napidutda.

Uray no bassit laeng ti gatad ti kaaduan kadagiti mapidpidutda a baria (agarup kagudua a U.S. cent), makaurnongda iti katupag ti $225 (U.S.) iti kada tawen. Us-usarenda ti kagudua ti maur-urnongda a kuarta para kadagiti paggastuan iti Kingdom Hall, ken ipatpatulodda ti kagudua para iti sangalubongan a trabaho.

Maysa kadagiti nakallalagip a pasamak iti pakasaritaan dagiti Saksi idiay Burundi ket napasamak idi Marso 5, 2016, bayat ti panangbisita ti pannakabagi ti hedkuarter a ni Anthony Griffin iti sangay. Naibrodkas iti kangrunaan nga estasion ti radio iti pagilian ti maysa nga espesial a programa para kadagiti kongregasion. Natantia nga agarup uppat a milion ti dimngeg!

Gapu iti dayta, adu ti nakasabaan ket positibo ti komento ti adu a dimngeg. Imbaga ti maysa kadagiti technician  a timmulong iti pannakaibrodkas ti programa, “Ad-adu koma pay ti ibrodkasyo a kas iti daytoy!” Insurat ti maysa a lalaki nga agtrabtrabaho iti estasion ti radio: “Itultuloyyo koma [ti mangibrodkas iti kas iti daytoy a programa], ta sigurado nga adu a biag ti maisalakan babaen iti dayta.” Naipangngeg ti programa iti adu a bus ken taksi.

Iti aldaw sakbay ti Memorial idi 2016, nagproblema dagiti kakabsat iti maysa a bassit a grupo nga adda iti adayo a lugar idiay Nepal idi naammuanda nga adda maaramid a dakkel a konsierto iti eskuelaan a kaabay ti pasdek nga inabanganda.

Nakatagtagari dagiti kasta a konsierto. Idi agdaldalus dagiti kakabsat iti pasdek iti agsapa ti Memorial, imbaga ti maysa kadagiti nangyurnos iti konsierto, “Musikaminto laeng ti mangngegyo.”

Nangrugi ti konsierto iti tengnga ti aldaw, ket nakatagtagari dayta. Uray no nagabang dagiti kakabsat iti loudspeaker a dakdakkel ngem iti planoda nga usaren, dida pay mangngeg uray ti panangtesting laeng iti mikropono. Kasta unay ti pannakaupayda ngem sipapasnek a nagkararagda. Kalpasanna, 30 a minuto sakbay ti Memorial, idi agsangpeten ti adu a kakabsat, bigla a nagsardeng ti musika. Adda dagiti agiinum a naglalaban isu a pinasardeng dagiti polis ti konsierto. Naselebraran dagiti kakabsat ti Memorial iti nadayaw a pamay-an ken iti nakaul-ulimek ken nakataltalna nga aglawlaw.

Regular pioneer ni Giuseppe idiay Italy ken agtrabtrabaho iti balayna para iti maysa nga Internet consulting firm. Idi Mayo, nakimiting a kadua ti agarup 70  a katrabahuanna tapno pagsasaritaanda dagiti baro nga ideya a mabalin nga ipatungpal ti kompania. Inrugi ti chief executive officer (CEO) ti kompania ti miting babaen ti panangibagana nga adda dagiti website a mabalin a tuladen ti kompaniada. Nangipakita ti CEO iti sampol iti iskrin. Nakigtot ni Giuseppe idi nagparang iti iskrin ti home page ti jw.org. Imbaga ti CEO, “Daytoy ti kasayaatan a website iti intero a lubong!” Idi kuan, impakitana ti sumagmamano a paset ti jw.org. Imbagana a magustuanna dagiti link a nalaka a biroken ken dagiti makaawis a disenio ken ladawan.

“Nagbilib dagiti katrabahuak idi naammuanda a maluktan ti website iti nagadu a lengguahe,” imbaga ni Giuseppe. “Kalpasan ti presentasion, imbaga ti superbisorko kadagiti nakimiting ken iti CEO: ‘Saksi ni Jehova ni Giuseppe.’  Imbaga kaniak ti CEO: ‘Apresiarek unay ti organisasionyo. Nangdiseniokayo iti website nga apalan ti amin a kompania wenno organisasion iti intero a lubong. Nagrigat la ketdi a pagtalinaeden nga updated ken nalaka nga usaren ti website-yo. Talaga nga isagsaganayo a naimbag dagiti linaonna, uray dagiti babassit a detalye.’ Medio mabainak a mapadayawan iti banag a saanko met nga inaramid. Ngem kasta unay ti ragsakko ta naipakaammo ti maipapan iti organisasiontayo kadagiti saan a pulos makaam-ammo kadagiti Saksi ni Jehova. Regular itan a kaskasabaak ti dadduma a katrabahuak ken narugiak payen nga iyadalan iti Biblia ti tallo kadakuada.” Bayat nga “ad-adalen” ti kompania a pagtrabtrabahuan ni Giuseppe ti website a jw.org, itultuloyna met a kaskasabaan dagiti katrabahuanna.

Aggigian idiay Argentina ti agtutubo a ni Jorge. Idi rugrugi ti 2010, naammuanna ti kinapudno iti maysa a kaklasena. Kalpasanna, nakipagadal iti Biblia babaen iti libro nga Ania a Talaga ti Isursuro ti Biblia? Player idi ni Jorge iti soccer. Nalaing isuna iti soccer ket nakualipikar a maikkan iti puesto iti maysa kadagiti kadakkelan a soccer team iti pagilian. Idi Abril 2014, naawis nga agbalin a miembro ti maysa a team idiay Germany. Maragragsakan a mangpampanunot nga agbalinen a professional soccer player isu nga inawatna ti awis. Sumagmamano nga aldaw sakbay a mapan idiay Europa, imbaga kenkuana ti coach-na: “Di kad maysaka a Saksi ni Jehova? Masayang laeng ti biagmo no mapanka. Idi agtutuboak, maysaak met a Saksi. Naawisak nga agbalin a miembro ti maysa a team idiay Asia. Adu ti inkarida ket naallukoyak kadagita. Isu a  napanak ken ti pamiliak, ngem nagawidkami a dismayado.” Kuna ni Jorge: “Dakkel ti epekto ti imbagana kaniak, isu a saanakon a napan idiay Europa. Idi 2015, nagbalinak a di bautisado nga agibumbunannag sa nabautisaranak.”

Idi Septiembre 2015, naangay idiay Kampala, Uganda ti “Tuladenyo ni Jesus!” a Rehional a Kombension. Naragsakan dagiti immatender idi inruar ni Mark Sanderson, a miembro ti Bagi a Manarawidwid, ti Baro a Lubong a Patarus ti Nasantuan a Kasuratan iti lengguahe a Luganda.

Imbaga ti maysa a babai a mayad-adalan iti Biblia: “Maragragsakanak unay idi inawatko daytoy nagpintas a Biblia! Agsagsagana idi dagiti tattao iti panagbisita ti papa. Tapno makaurnong ti Simbaan iti pondo, nagilakoda kadagiti ‘nabendisionan’ a rosario nga aggatad iti $30 (U.S.). Kayat dagiti tattao ti mabendisionan, ngem awan kuarta ti kaaduan. Nupay kasta, immawatak iti pudpudno a bendision nga awan bayadna. Inted dayta ni Jehova iti amin a nakikombension, ket makaammon ti tunggal maysa a mangted iti donasion nga aggapu iti pusona. Iti kada aldaw, no basbasaek ti Sao ni Jehova iti nakayanakak a lengguahe ken mas maam-ammok isuna, mariknak a talaga a nabendisionannak. Agyamyamanak ken Jehova ta inikkannak iti bukodko a Biblia.”

Iti maysa a rehion idiay Congo (Kinshasa), kayat dagiti lider ti dadduma a relihion a padaksen ti www.pr418.com isu nga insuroda kadagiti pasurotda a dagiti publikasion dagiti Saksi ni Jehova ket mayim-imprenta iti lubong dagiti espiritu. Ibagbagada a dagiti letra a “www” ket tumukoy iti numero a 666 iti libro ti Apocalipsis. (Apoc. 13:18)  Gapu iti dayta, nagsardeng ti dadduma a makipagadal iti Biblia.

Kalpasan nga inkararag ti maysa nga agassawa a payunir ti maipapan iti dayta, inawisda iti balayda dagiti iyad-adalanda iti Biblia ken ti assawada. Tallo nga agassawa ti napan, ket kalpasan ti pannanganda, impabuya ti agassawa a Saksi ti video a Dagiti Saksi ni Jehova—Organisado a Mangikasaba iti Naimbag a Damag. Gapu iti nabuya dagiti bisita, napaneknekanda nga ulbod ti nangnangngegda maipapan iti naggapuan dagiti publikasiontayo. Iti simmaruno a lawas, impilit ti asawa ti maysa a mayad-adalan nga awaten ken ipatulod ti agassawa a Saksi ti kontribusionna a $100 (U.S.) para iti sangalubongan a trabaho, uray no saan pay a makipagad-adal.

Uray no awan ti Internet dagiti kakabsat iti maysa nga adayo a lugar idiay Papua New Guinea, kayatda unay a masursuro dagiti kabaruan a kanta ti Pagarian. Isu a mangibabaon ti Mundip Congregation iti maysa a kabsat iti kaasitgan nga ili. Dua nga oras a magmagna ti kabsat sa aglugan iti bus iti dua pay nga oras. No nakadanonen, kopiaenna ti liriko dagiti baro a kanta iti Internet ket isuratna iti notebook, sa inton makaawid, isuratna dagiti liriko iti blackboard iti Kingdom Hall tapno makita ti amin. Kopiaen met dagiti kakabsat ti baro a kanta para iti gimong. Talaga a maragragsakanda a makigiddan kadagiti kongregasion iti intero a lubong nga agkanta kas paset ti panagdayawda ken Jehova.