IDI Mayo 7 ken 8, 2016, magagaran dagiti tattao iti lobby ti sangalubongan a hedkuarter iti 25 Columbia Heights, Brooklyn, New York. Gagangay a nakaserra ti lobby ken eksibit no ngudo ti lawas ngem kadagita nga aldaw, naawis dagiti tattao nga aggigian iti aglawlaw ti Bethel a mangbisita iti eksibit ti Biblia.

Nakaipaay iti nasayaat a panangsaksi iti komunidad ti kampania a panagimbitar, ken napabileg dagiti nakiraman iti dayta. Makaparegta met a mangngeg dagiti positibo a komento dagiti nabayagen a kaarruba ti Bethel.

“Nagakar-akarakon iti pagyanan [iti aglawlaw ti Bethel]  sipud pay idi 1960’s,” kinuna ti maysa lalaki, “ket dakayo ti kasayaatan a kaarruba. Mailiwkaminto kadakayo. Dikay latta koman pumampanaw.”

“Saan koma a kastoy kasayaat daytoy a lugar no awankayo,” inkomento ti maysa a babai. “Agyamankami la unay ta nagbalinkayo a kaarrubami iti adu a tawen.”

Maragsakan dagiti payunir a nagimbitar ta mannakigayyem ken dumdumngeg dagiti lumugar. Maysa a lalaki a miembro ti maysa nga asosasion iti dayta a lugar ti nangibaga nga ap-apresiarenna la unay ti organisasiontayo. Imbagana pay a talaga a kayatna koma ti mapan iti eksibit ngem adda met nakaeskediul a papananna.

Talaga a makaparegta ti resulta daytoy a kampania. Iti dua nga aldaw, 48 a saan a Saksi ti nagpasiar iti eksibit. Bayat ti eksibit, adda dagiti Bethelite iti lobby a nangabrasa ken nakisarita kadagiti kaarruba a bimmisita.

Agarup kagudua nga oras nga adda iti eksibit ni Sally, maysa a propesional a dandani 30 ti tawenna. Idi napan iti eksibit, apagisu nga adda iti lobby dagiti payunir a nangawis kenkuana. Imbaga ni Sally a dina ninamnama nga adda gayam dagiti nakadispley a Biblia iti eksibit. Imbaga dagiti payunir ken Sally a maragsakanda ta naam-ammoda ti maysa a naubing pay a propesional a mangipatpateg iti Biblia. Imbaga ni Sally: “Nagpateg dayta. Maammuantayo laeng ti mensahe ti Dios babaen iti Biblia. Sibibiag dayta a dokumento a makatulong iti panagbiagtayo.”

Imbaga ni Sally a gapu ta ipatpategna ti Biblia, inadalna ti lengguahe a Latin ken Griego, ken imbagana a talaga nga interesado isuna iti panagipatarus. Para  kenkuana, napateg ti umiso a panagipatarus tapno saan a maimpluensiaan ti mensahe iti kapanunotan ti tao. Idi imbaga dagiti payunir a naglaon ti website-tayo a jw.org kadagiti naibatay-Biblia a publikasion a naipatarus iti nasurok a 800 a lengguahe, permi a nagsiddaaw ken nagbilib ni Sally. Idi inlawlawag dagiti sister ti inaramid dagiti agipatpatarus iti nagan ni Jehova, nakigtot ket insaludsodna, “Apay nga inikkatda ti nagan ni Jehova iti Biblia?” Idi pumanawen, imbaga ni Sally, “Dimmakkelak iti daytoy a lugar, ket dakayo ti kasayaatan a kaarruba.”

Iti kalunesanna kalpasan ti eksibit, adda ministro nga immasideg ken John, maysa a Bethelite nga agbambantay iti cart iti asideg ti Bethel. Imbaga ti ministro a naragsakan iti eksibit ken ap-apresiarennatayo ta sursurotentayo ti Biblia. Nagtultuloy ti saritaanda ngem idi kuan, imbaga ti ministro, “Masuronak kadagiti Saksi!” Saan a maawatan ni John ti kayatna a sawen isu a dinamagna no apay. “Gapu ta umakarkayon! DIKAY LATTAN PUMAMPANAW! Gumatangkayo iti dakdakkel a pasdek, wenno agibangonkayo iti uray ania, basta dikay pumampanaw. Dakkel ti naitulongyo iti daytoy a lugar. Nalidayak ta umakarkayon!”

Nakaipaay iti nasayaat a panangsaksi iti komunidad ti kampania a panagimbitar ken ti eksibit ti Biblia, ken naitampok ti nagan ti Dios iti dayta a lugar iti pamay-an a saan pay idi a naar-aramid.