IDI Mierkoles, Septiembre 23, 2015, impakaammo ti Bagi a Manarawidwid kadagiti sangay iti intero a lubong dagiti panagbalbaliw iti organisasion tapno mausar dagiti donasion iti kasayaatan a pamay-an. Kalpasanna, idi Sabado, Oktubre 3, 2015, inlawlawag ti Bagi a Manarawidwid: “Naibilin kadatayo iti Filipos 1:10 a ‘siguraduentayo ti napatpateg a bambanag.’ Maitunos iti dayta a balakad, kayat [ti Bagi a Manarawidwid] a maipangpangruna dagiti aktibidad a dakdakkel ti maitulongna iti pannakapabileg ti espiritualidad ti ili ti Dios ken panagrang-ay ti sangalubongan a panangasaba.”

 Inlawlawag pay ni Stephen Lett, a miembro ti Bagi a Manarawidwid, iti JW Broadcasting: “Tarigagayan la unay ti Bagi a Manarawidwid a rumang-ay ti trabaho iti tay-ak isu nga inadalmi manen a naimbag dagiti pamay-an a mangkissay kadagiti paggastuan iti amin a sangay tapno ad-adu a pondo ti mausar iti tay-ak. Kas pagarigan, adda dagiti nabayagen nga urnos ken serbisio iti Bethel a napasimple wenno naikkat. Iti kasta, bumassit ti kasapulan a Bethelite.”

Gapuna, sipud idi Septiembre 2015, agarup 5,500 a miembro ti pamilia ti Bethel iti intero a lubong ti naibaonen nga agserbi iti ruar ti Bethel. Uray no saan a nalaka dagitoy a panagbalbaliw, nalawag a bembendisionan ni Jehova dagita, ken gapu iti dayta, ad-adda a rimmang-ay ti trabaho a panangasaba ken panangisuro.

Maysa nga agassawa idiay Sri Lanka a naibaon nga agserbi iti ruar ti Bethel ti nangibaga nga ibilangda dayta a panagbalbaliw kas gundaway tapno maipakitada ti pammatida ken Jehova ken ti panagtalekda iti organisasionna. Insuratda: “Dimi ammo no ania ti mapasamak kadakami. Ngem masiguradomi a dinakami baybay-an ni Jehova. Isu nga inkararagmi, ‘Jehova, pangngaasim ta tulongannakami tapno makapagpayunirkami a dua aniaman ti pakaipasanguanmi.’ Iti umuna a bulan, bassit laeng ti kuartami. Ngem nariknami ti ayat ken panangaywan ni Jehova, ket adda itan regular a pagsapulanmi. Busy-kami iti trabaho iti balay, sekular a trabaho, ken panagpayunir. Ngem mabalansemi ti tiempomi gapu ta nasanaykami iti Bethel. Awanen ti ad-adda pay a makaparagsak ngem iti panangtulong kadagiti tattao a  mangammo iti kinapudno, ket maragsakankami ta maaramidmi dayta kas payunir.”

Dadduma kadagiti Bethelite idiay Colombia a naibaon nga agserbi iti ruar ti Bethel ti nagsursuro iti sabali a lengguahe ken immakar kadagiti adayo a lugar tapno maikasabada ti mensahe maipapan iti Pagarian. Dakkel met ti maitultulongda iti kongregasion nga immakaranda. Insurat ti maysa a manangaywan iti sirkito maipapan iti agassawa a naibaon iti maysa a kongregasion iti sirkito a pagserserbianna: “Ap-apresiaren dagiti kakabsat iti kongregasion ti tulongda. Naregregta itan dagiti kakabsat iti ministerio, ken masansanay dagiti kakabsat a lallaki a mangibaklay kadagiti responsabilidad iti kongregasion.” Adda met dagiti dati a Bethelite nga agbolboluntario iti Bethel kas part-time commuter iti maysa wenno ad-adu pay nga aldaw iti kada lawas.

Maysa a brother a nagserbi iti Bethel idiay Japan iti 31 a tawen ti naibaon iti kongregasion nga addaan laeng iti dua a panglakayen. Gapu ta nakaeskediul a ma-renovate ti Kingdom Hall-da, dua a lawas a saan pay laeng a nagtrabaho iti sekular. Ngem sakbay ti pannaka-renovate ti Kingdom Hall, nagginggined iti magnitude 7.0 idiay Kumamoto, nga ayan ti kongregasionna. Gapu ta saan pay laeng a nagtrabaho, naidauluanna ti panangtulong ken panagipastor kadagiti naapektaran iti ginggined. Imbagana, “No pampanunotek ti napasamak, maikunak nga inkabilnak ni Jehova iti lugar a talaga nga agkasapulan.”

Nagserbi idi da Phil ken Sugar iti sangay ti Australasia. Imbagada: “Idi naibaonkami nga agserbi iti ruar ti Bethel, kayatmi a pagtalinaeden a simple ti biagmi.  Inkararagmi ken Jehova nga iwanwan ken tulongannakami tapno umiso dagiti agbalin a desisionmi ken bendisionanna dagita. Kayatmi ti agboluntario iti maysa a kongregasion iti sabali a pagilian. Talaga a binendisionan ni Jehova dagiti desisionmi ken pinagbalinna a nalaklaka dagiti bambanag tapno makapagserbikami kenkuana iti amin-kararua!” Agserserbida itan iti Pilipinas, iti maysa a grupo ti English idiay Samal Island, Davao, nga addaan iti 34 nga agibumbunannag ken 9 a regular pioneer. Adda itan agarup 120 nga adres dagiti interesado a mabalin a sarungkaran da Phil ken Sugar. Imbagada: “Nakaad-adu pay a makaparagsak a trabaho ti masapul a maileppas. Naragsakkami ta naan-anay a nagpaiwanwankami ken Jehova ket ad-adda a bimmileg ti pammati ken ayatmi kenkuana!”

Imbaga ti maysa a single a sister idiay Russia a naibaon kas special pioneer: “Babaen iti panagpayunirko, ad-adun ti panawenko para iti kapatgan ken dinton pulos maulit a trabaho—ti panangikasaba iti Pagarian ti Dios. Maragragsakanak ta us-usarennak ni Jehova.” Mangikonkondukta itan ti sister iti innem a panagadal iti Biblia. Adda dagiti iyad-adalanna a naggapu idiay Iraq, Nigeria, Sri Lanka, Syria, ken Zambia.

Adu a miembro ti pamilia ti Bethel idiay Zambia ti naibaon kas regular pioneer. Maragragsakanda ta ad-adun ti panawenda iti ministerio. “Di nagbayag kalpasan a rimmuarkami iti Bethel, adda dua a tattao a sinuruanmi nga agbasa ken agsurat,” inyestoria ni Andrew, nga agpaypayunir a kadua ti asawana. “Dandanin agpaset iti gimong ti maysa nga ubing nga iyad-adalanmi  a 10 ti tawenna. Maysa nga agassawa a nakasabaanmi ti immatender iti Memorial ket sipud idin, regulardan a makigimgimong. Mayad-adalandan iti Biblia ket nagpartak ti panagrang-ayda. Ammomi a saan koma a napasamak amin dagitoy no saanmi a sinurot ti panangiwanwan ni Jehova, saankami a nagpannuray kenkuana, ken saanmi nga inuray ti panangbendisionna.”

Sumagmamano a bulan pay laeng nga agassawa da Edson ken Artness a taga-Zambia idi naibaonda nga agserbi iti ruar ti Bethel. Imbaga ni Artness: “Nasursuromi idiay Bethel no kasano ti nasayaat a panangiggem iti kuarta ken no kasano ti agtalinaed a naragsak ken saan nga umut-utang. Dimi pagbabawyan ti panagserbimi idiay Bethel. Nasursuromi no kasano a balbaliwan dagiti naespirituan a kalatmi ken ragpaten dagita babaen iti tulong ni Jehova. Timmibker ti pammatimi ken Jehova, ken determinadokami nga agtalinaed a nasungdo ken Jehova.”