“NO AGKARKARARAGAK, agyamyamanak ken Jehova gapu ta mangmangngegko ti maipapan kenkuana iti bukodko a pagsasao,” kinuna ti maysa a sister a ni Gulizar.

Walo a tawen a di bautisado nga agibumbunannag ni Gulizar, ket nabautisaran laeng idi makigimgimongen iti nakayanakanna a pagsasao a Kurdish. Maysa ni Gulizar iti adu a Kurd nga immawat iti kinapudno idiay Georgia iti napalabas a tawtawen. Ngem siasino dagiti Kurd?

Ginasut a tawenen nga aggigian dagiti Kurd idiay Middle  East. Mamati ti dadduma nga eskolar a naggapuda kadagiti nagkauna a Medo a nadakamat iti Biblia. (2 Ar. 18:11; Ara. 2:9) Ti lengguaheda ket karaman iti grupo dagiti Iranian a lengguahe.

Ita, minilion a Kurd ti aggigian iti nadumaduma a pagilian, kas iti Armenia, Iran, Iraq, Syria, ken Turkey. Agarup 20,000 a Kurd ti aggigian idiay Georgia. Managbuteng iti Dios ti kaaduan kadakuada ken ipatpategda unay dagiti naespirituan a bambanag.

Adda itan 500 nga agibumbunannag a Kurd idiay Georgia, ken tallo a Kurdish a kongregasion. Idi 2014, makaparagsak ta naangay ti kaunaan a rehional a kombension a Kurdish idiay Tbilisi nga inatenderan dagiti kakabsat a naggapu idiay Armenia, Germany, Turkey, ken Ukraine.