GEORGIA
Nagpaiwanwan ken Jehova
Tamazi Biblaia
-
NAYANAK 1954
-
NABAUTISARAN 1982
-
ABABA A PAKASARITAANNA Timmulong iti nalimed a panagimprenta ken maysa kadagiti kaunaan nga agdaldaliasat a manangaywan idiay Georgia, bayat a padpadakkelenna ti uppat nga annakna.
PERMI ti unget ni Nanang idi nagbalinkami a Saksi ni Jehova ken Tsitso a baketko. Maysa nga aldaw, pinaayabanna amin a kabagianmi tapno kombinsirendak nga agikkat a Saksi. Pinagpilidak—balbaliwak ti desisionko wenno ilaksiddak iti pamiliami.
Nagdesisionak a pumanaw iti ilimi. Gapu ta maysaak a latero (metalworker), implanok ti umakar idiay Kutaisi, ti maikadua a kadakkelan a siudad ti Georgia, ta pampanunotek a nalakaak laeng a makabirok iti trabaho sadiay. Dakkel met ti panagkasapulan kadagiti agibumbunannag iti dayta a siudad isu a nagkararagak ken Jehova sakbay a nagdesisionak.
Di nagbayag, nakasaritak ti iyad-adalak iti Biblia nga aggigian iti bassit nga ili ti Jvari. Idi naammuanna a planok ti umakar idiay Kutaisi, indawatna nga idiay lattan ilida ti pagakarak. “Adda apartmentmi,” kunana. “Agyankami ken baketko ken dagiti annakmi iti maysa a kuarto ket mabalinyo ti agyan ken baketmo iti maysa a kuarto.”
Gapu ta pampanunotek a baka sungbat daytan ni Jehova, imbagak a patgak ti awisna ket agyankami sadiay iti apagbiit no makabirokak iti trabaho sa kalpasanna, makabirokak met iti bukodmi nga apartment. Diak ekspektaren nga iti dayta met la a rabii, agsubli ti iyad-adalak nga adda tugotna a listaan dagiti trabaho a mabalinko a serkan.
Kalpasan ti sumagmamano nga aldaw, immakarkamin idiay Jvari. Iti umuna nga aldawmi sadiay, adda trabahokon a dakkel ti sueldona. Pinagyannakami ti boss-ko iti maysa a dakkel a balay a kukua ti kompania. Di nagbayag, kiniddaw dagiti kakabsat a tumulongak iti nalimed a panagimprenta kadagiti naibatay-Biblia a literatura. Nakalawlawa ti baro a balaymi isu nga impausarmi ken baketko para iti panagimprenta.
Adu a tawen a naang-angay ti Memorial ken ti dadduma pay nga espesial nga okasion iti balaymi. Nasurok a 500 ti nabautisaran iti balaymi! Maragsakanak unay ta nakitak ti sungbat ni Jehova ket sinurotko ti panangiwanwanna!