Idi rugrugi ti 1990’s, maysa laeng ti panglakayen wenno ministerial nga adipen iti kaaduan a kongregasion idiay Georgia. Gapu ta nagduduma nga ili wenno purok ti ayan dagiti agibumbunannag, gagangay a dagiti kongregasion ket buklen ti nagduduma a grupo nga aggigimong a bukbukodda.

Da Joni Shalamberidze ken Pavle Abdushelishvili, a datin a nagserbi kadagiti adayo a teritoria, ket naibaon a tumulong iti siudad ti Telavi iti rehion ti Kakheti. Tallo gasut ti agibumbunannag iti kongregasion sadiay ngem  awan a pulos ti panglakayen. Addaan dayta iti 13 a grupo nga aggigimong iti nagduduma a lugar.

Di nagbayag, nakita da Joni ken Pavle ti dakkel a lapped iti naespirituan a panagrang-ay dagiti kakabsat a lallaki. Kinuna ni Joni: “Nalawa ti talon ken kaubasan ti adu a kakabsat a lallaki. Gapu ta gagangay kadagiti aw-away nga agtitinnulong dagiti agkakaarruba nga agtrabaho iti talon, adu nga oras a saan a Saksi ti kakadua dagiti kakabsat.”—1 Cor. 15:33.

Inrekomenda da Joni ken Pavle kadagiti kakabsat a lallaki nga agpatulongda kadagiti kapammatianda nga agapit tapno nasayaat a tattao ti makaduada bayat nga agtrabtrabahoda iti talon. (Ecl. 4:9, 10) Kuna ni Joni, “Bimmileg a bimmileg ti nainkabsatan nga ayat iti kongregasion.” Idi pimmanaw da Joni ken Pavle iti rehion ti Kakheti kalpasan ti tallo a tawen, addan 5 a panglakayen ken 12 a ministerial nga adipen sadiay.

Gapu ta saan pay a naan-anay a nawaya ti trabahotayo agingga idi rugrugi ti 1990’s, aggigimong dagiti Saksi iti babassit a grupo. Panagadal ti Kongregasion iti Libro ken Panagadal iti Pagwanawanan laeng ti ang-angayenda. Nupay makaparegta dagita a gimong, saan a nadisenio dagita tapno masanay dagiti kakabsat iti ministerio.

Nagbaliw dayta idi nagpatingga ti Komunista a turay. Imbilinen ti organisasion ni Jehova a maangay ti Teokratiko nga Eskuelaan ti Panagministro ken ti Gimong ti Serbisio kas paset ti linawas a gimongda.

Malaglagip da Naili Khutsishvili ken ti manangna a ni Lali Alekperova dagiti kapadasanda kadagita a gimong. Kinuna ni Lali: “Nakaragragsak dagidi a tiempo. Maragragsakan  ti amin ta mabalinen a makipaset dagiti kakabsat a babbai iti gimong.”

“Iti maysa a demostrasion,” kuna ni Naili, “agbasbasa ti bumalay iti diario iti entablado idi adda nagtuktok. Pinastrekna ida ket immuneg ti dua a babbai iti ridaw ti paggigimongan sa immulida iti entablado!” Innayon ni Lali, “Uray karkarna no dadduma dagita a gimong, nakatulong dagita tapno lumaingkami a mangasaba.”

Adu a tawen a nagim-imprenta dagiti kakabsat kadagiti naibatay-Biblia a literatura iti balayda babaen kadagiti manomano nga alikamen. Tapno maipaay ti umad-adu a kasapulan a publikasion, nagbirok dagiti kakabsat kadagiti kompania a pagimprentaan a saan unay a nangina ti bayadna.

Manangipamuspusan dagiti kakabsat no isaganada ti orihinal a kopia ti publikasion a mayimprenta. Imakiniliada ti patarus a Georgian, a kopiaenda ti estilo ti Ingles a magasin. Kartibenda dagiti ladawan iti Ingles a magasin sada ipigket iti immakiniliada a patarusda. Kalpasanna, mangkartibda kadagiti napintas a letra kadagiti diario sada ipigket iti akkub ti Ingles a magasin. Dayta ti usarenda nga akkub ti mayimprenta a magasin. Nakasaganan ti orihinal a kopia!

Idi addan dagiti kompiuter, nagadal ti dua a naubing pay a brother a da Levani Kopaliani ken Leri Mirzashvili no kasano nga usaren dagita. Inyestoria ni Leri: “Bassit laeng ti kapadasanmi, ken no dadduma, adda dagiti problema. Ngem di nagbayag, gapu iti tulong ni Jehova, dakamin ti mangar-aramid kadagiti magasintayo.”

Uray adda dagiti lapped, nangrugin a makaawat dagiti  kongregasion idiay Georgia kadagiti dekolor a magasin a nayimprenta sadiay. Ngem idi agangay, umad-adun dagiti kasapulan a publikasion ket saanen a kabaelan dagiti kakabsat nga ipaay amin dagita. Iti dayta met la a tiempo, tinulongan ti organisasion ni Jehova dagiti kakabsat idiay Georgia.

Bayat ti internasional a kombension idiay St. Petersburg, Russia, idi 1992, nakasarita dagiti kakabsat idiay Georgia dagiti pannakabagi ti sangay a naggapu idiay Germany. “Inlawlawagda no kasano a maar-aramid ti trabaho a panagipatarus,” kinuna ni Genadi Gudadze. “Imbagada nga addanto bumisita kadakami a tumulong iti panagipatarus.”

Saan a nalaka ti agimprenta kadagiti naibatay-Biblia a publikasion iti Georgian. Gapu ta naidumduma dagiti Georgian a letra, awan pay idi dayta iti Multilanguage Electronic Publishing System (MEPS) ti organisasion. Isu a masapul a mangdisenio dagiti kakabsat kadagiti baro a letra para iti photocomposition ken panagimprenta.

Tawtawen sakbay dayta, idi dandanin agleppas ti 1970’s, immakar ti Georgian a pamilia a Datikashvili idiay United States. Idi agangay, nagbalin a Saksi ti maysa kadagiti annak a ni Marina. Dakkel ti naitulongna idi indrowing dagiti kakabsat idiay Brooklyn Bethel dagiti Georgian a letra tapno mainayon iti MEPS. Di nagbayag, nayimprentan idiay Germany ti dadduma a tract ken ti broshur nga “Adtoy! Pagbalinek dagiti Isuamin a Bambanag a Baro.”

Idi 1993, simmangpet ti agassawa a da Michael ken Silvia Fleckenstein idiay Tbilisi a naggapu iti sangay  ti Germany tapno mangorganisar iti translation office. “Malagipko pay laeng idi ti panagsasaritami idiay St. Petersburg,” kinuna ni Michael. “Idi simmangpetkami idiay Tbilisi kalpasan ti 18 a bulan, nasdaawkami ta addan maysa a grupo dagiti agipatpatarus sadiay!”

Iti sumagmamano laeng a bulan, addan 11 a paraipatarus nga agtrabtrabaho iti maysa nga opisina iti bassit nga apartment. Gapu iti panangsanay ti organisasion, regularen a maitultulodan dagiti kongregasion iti naespirituan a taraon.

Idi nagpatingga ti Soviet Union, nariribuk ti kagimongan ken nagbibinnusor dagiti etniko a grupo iti adu a pagilian a dati a paset ti Soviet Union, a pakairamanan ti Georgia. Kas resultana, delikado ti agbiahe, aglalo no bumallasiw iti sabali a pagilian.

Maysa nga aldaw, idi Nobiembre 1994, bumalballasiw iti sabali a pagilian ni Aleko Gvritishvili ken ti dua pay a brother idi pinasardeng ida dagiti armado a lallaki ken pinababada  ida iti lugan. “Nakaungetda idi nakitada dagiti publikasion a tugotmi,” kuna ni Aleko. “Pinagliliniadakami a kasla patayendakamin. Nagkarkararagkami ken Jehova. Kalpasan ti agarup dua nga oras, imbaga ti maysa kadakuada, ‘Alaenyo dagiti publikasionyo ket pumanawkayon—ngem no agsublikayo, puoranmi ti luganyo ken patayendakayo.’”

Iti laksid dagiti kasta a pamutbuteng, intultuloy latta dagiti kakabsat ti nagitulod iti naespirituan a taraon. Kinuna ni Brother Zaza Jikurashvili, a maysa kadagiti agsaksakripisio idi a mangitulod kadagiti publikasion idiay Georgia: “Ammomi a kasapulan dagiti kakabsatmi ti naespirituan a taraon. Dakkel ti naitulong kadakami dagiti dungdungnguenmi nga assawa.”

Imbaga ni Aleko, “Adda pamilia ti adu kadagiti kakabsat a lallaki a timmulong iti panagitulod kadagiti literatura.” Apay nga intultuloyda latta dayta uray no delikado? Intuloy ni Aleko: “Ti kasta unay a panagyaman ken panagayatmi ken Jehova ti kangrunaan a rason. Kayatmi met a tuladen ti pamay-an ni Jehova a mangaywan kadagiti ay-ayatentayo a kakabsat.”

Gapu kadagita a managsakripisio a kakabsat, saan a pulos nagsardeng ti pannakaitulod dagiti publikasion kadagidi a narigat a tawtawen. Idi agangay, nakabirok dagiti kakabsat iti nataltalged a dalan a mapan idiay Georgia nga aggapu idiay Germany.

Idi simmayaaten ti kasasaad ti politika idi 1995, implano dagiti kakabsat ti pannakaangay ti kaunaan a kombension distrito idiay Georgia. Idi 1996, agarup 6,000 a delegado a naggapu iti nagduduma a lugar iti Georgia  ti immatender iti kombension distrito a naangay idiay Gori, Marneuli, ken Tsnori.

Nakallalagip ti kombension idiay Gori para kadagiti immatender. Saanen a kasla idi nga agduadua dagiti kakabsat no mapunnoda ti auditorium para iti Memorial! Iti dayta a kombension, nasurok a dua a ribu ti namnamaenda nga umatender ngem awan ti mabirokanda a pasdek nga umanayan dayta a bilang. Nagdesisionda nga angayenda ti kombension iti maysa a napintas a bantay iti siudad.

Kinuna ni Brother Kako Lomidze, a miembro ti Convention Committee: “Kalpasan ti programa, nagiinnestoria ken nagkakanta dagiti kakabsat. Nakita ti amin nga agkaykaysa ti ili ti Dios gapu iti nabileg nga ayat.”—Juan 13:35.

Sipud idi 1996, nayurnos nga agbisita iti makalawas dagiti agdaldaliasat a manangaywan iti amin a kongregasion iti pagilian. Gapuna, adda dagiti baro a nadutokan nga agdaldaliasat a manangaywan a nainayon kadagiti datin nga agserserbi iti makinlaud ken makindaya a Georgia.

Dakkel ti naitulong ti ‘naayat a panagbannog’ ken ti panagserbi dagitoy nga agdaldaliasat a manangaywan tapno rumang-ay dagiti kongregasion ken ad-adda a masurotda dagiti urnos ti organisasion. (1 Tes. 1:3) Idi 1990, agdagup laeng iti 904 ti bilang dagiti agibumbunannag ngem kalpasan laeng ti pito a tawen, addan 11,082 a mangikaskasaba iti naimbag a damag!

Ti naespirituan a panagrang-ay a nangrugi kadagiti napalabas a dekada ket nalawagen a makita ken nagsaknapen iti intero a pagilian. Ngem adu pay a bendision ni Jehova ti agur-uray kadagiti adipenna idiay Georgia.