Nagdakkel ti naitulong dagiti gimong tapno bumileg ti pammati dagiti kabbaro. Kinapudnona, kas kadagiti nabayagen iti kinapudno, maragsakan met dagiti nabiit pay a nabautisaran a mangipausar kadagiti balayda para kadagiti gimong. Nainggayyeman a naabrasa ti amin nga umat-atender isu nga ad-adda a bimmileg ti ayatda iti maysa ken maysa.

No adda dagiti kualipikadon a mabautisaran, siaannad a maangay dagiti espesial a gimong. Idi Agosto 1973, nangangay dagiti kakabsat iti kasta a gimong iti ruar ti Sokhumi nga asideg iti Black Sea. Ngem saan a naitaneb ti 35 a kandidato iti bautismo ta idi dandanin malpas ti gimong, simmangpet dagiti polis ket inarestoda ti  dadduma a kakabsat, a pakairamanan ni Vladimir Gladyuk.

Idi nawayawayaanen ni Vladimir ken ti dadduma pay a kakabsat, kinasaritada manen dagiti kandidato iti bautismo. Dua nga aldaw kalpasan ti espesial a gimong, nabautisaranda met laengen. Kinuna ni Vladimir: “Nariknami a tultulongannakami ni Jehova. Kalpasan ti bautismo, nagkararagkami ket inyebkasmi ti panagyamanmi ken Jehova.”

Dua nga aldaw kalpasan ti bautismo, naaresto manen ni Vladimir Gladyuk. Idi agangay, nasentensiaan a maibalud iti sumagmamano a tawen a kaduana da Itta Sudarenko ken Natela Chargeishvili. Nupay naladingitan dagiti kakabsat, determinadoda nga agtultuloy a mangasaba, ngem naan-annaddan.

Tapno saan a makadlaw dagiti autoridad, nangasaba dagiti kakabsat kadagiti sabali nga ili ken purok. Kas resultana, nakatulong ti ibubusor tapno maidanon ti naimbag a damag iti ad-adu pay a lugar.

Bayat ti Komunista a turay, nangasaba dagiti agibumbunannag nga aggigian kadagiti dadakkel a siudad kadagiti naulimek a kalye ken parke. Kaaduanna a makasaritada dagiti naggapu iti sabali nga ili ken purok a mapan aggatang wenno bumisita kadagiti kabagianda. No adda interesado, alaen dagiti agibumbunannag ti adresna ken pagsaritaanda no kasanodanto a makasarita manen.

Maysa ni Babutsa Jejelava kadagiti nagbibiahe iti adu a lugar iti makinlaud a Georgia. Inyestoriana: “Gapu ta  adda kakabagiak iti nagduduma a lugar, awan ti nagsuspetsa iti kanayon a panagbiahek. Kalpasan ti agarup dua a tawen, nasuroken a 20 ti iyad-adalak idiay Zugdidi ken 5 iti ili ti Chkhorotsku. Nabautisaranda amin idi agangay.”

Di nagbayag, nakita dagiti kakabsat a kasapulan unay dagiti publikasion a Georgian. No agsarungkar wenno mangyadalda, makitada a kasapulan ti Biblia ken naibatay-Biblia a literatura iti lengguahe dagiti iyad-adalanda. *

Inyestoria ni Babutsa no kasano idi karigat ti mangyadal iti Biblia nga awan ti aniaman a publikasion iti Georgian. Imbagana, “Russian laeng a Biblia ken publikasion ti adda kaniak, isu a kaaduanna nga ipatarusko pay ti adalenmi para kadagiti iyad-adalak.” Nagipatarus ni Babutsa kadagiti artikulo dagiti magasin a diksionario laeng ti inusarna. Impatarusna pay ti intero nga Ebanghelio ni Mateo!

Nagustuan unay dagiti interesado dagiti artikulo a naipatarus iti nakayanakanda a lengguahe nga uray la kinopiada a manomano dagiti publikasion tapno adda bukodda a kopia. Gapu ta narigat ti makabirok iti Biblia a Georgian, dadduma a mayad-adalan iti Biblia ti nagbalin pay ketdi a “managkopia” iti Sao ti Dios.

Nagsisinnublatan dagiti kakabsat ken dagiti  interesado dagiti publikasion a naipatarus iti Georgian tapno mabasa ti amin. Sumagmamano laeng nga aldaw wenno lawas ti maited iti maysa tapno basaenna ti maysa a publikasion. Isu nga idi nakaala dagiti kakabsat iti kopia ti Griego a Kasuratan iti moderno a Georgian, ginundawayan ti maysa a pamilia a kopiaen dayta.

Trese pay laeng ti tawen ni Raul Karchava idi impakopia ni tatangna kenkuana ti Griego a Kasuratan. Imbagana: “Inggatangannak ni Tatang iti sangakarton a notebook ken nadumaduma a bolpen ken lapis tapno maengganioak nga agkopia. Panagriknak idi, diak kaya, ngem inaramidko latta. Agmalmalem a nagkopiaak. Agsardengak laeng no unnatek ti imak.”

Gapu ta kayat ti amin a masublat dayta a libro, napalalo  ti ragsak dagiti kabagian ni Raul idi naammuanda nga impalubos dagiti kakabsat nga agtalinaed ti libro kadakuada iti sumagmamano pay a lawas tapno malpas ni Raul a kopiaen. Kalpasan laeng ti dua a bulan, nakopiana ti 27 a libro ti Kristiano a Griego a Kasuratan!

Uray no nakagaggaget dagiti managkopia, saanda latta a naan-anay a maipaay ti naespirituan a kasapulan ti umad-adu a mayad-adalan iti Biblia. Isu nga uray no delikado, nagimprenta dagiti natured a kakabsat kadagiti publikasion iti balayda sada inwaras.

Napartak ti panagrang-ay ti trabaho a panangasaba iti makinlaud a Georgia. Ngem iti ngay makindaya a paset ti pagilian? Adda kadi asinoman iti kabesera a Tbilisi a mabalin a tumulong kadagiti napasnek nga agbirbirok iti  kinapudno kas ken Vaso Kveniashvili, a nadakamat iti rugi?

Idi 1970’s, kayat a pasardengen dagiti autoridad ti Soviet ti trabaho dagiti Saksi isu a kanayonda ida a papanawen iti balayda. Kasta ti napasamak iti agassawa a da Oleksii ken Lydia Kurdas a taga-Ukraine nga immakar idiay Tbilisi. Adu a tawen a naibaludda kadagiti pagbaludan ti Soviet gapu iti pammatida.

Inranud da Oleksii ken Lydia ti kinapudno iti relihioso nga agassawa a da Zaur ken Eteri Kessaev. Agtawen iti 15 ni Larisa, a balasang da Zaur ken Eteri, idi damo a nakasaritada da Oleksii ken Lydia. Inyestoria ni Larisa: “Kayatmi idi a paneknekan a ti laeng Orthodox Church ti pudno a relihion. Idi bimmayagen ti saritaanmi, awanen ti maibagami, ngem intultuloyda a pinaneknekan ti kinapudno babaen ti Kasuratan.”

Intuloy ni Larisa: “Kada mapankami iti simbaan, basaek ti Sangapulo a Bilin a naisurat iti nagbaetan ti dua nga imahen nga adda iti diding. Ngem iti dayta a rabii, nakigtotak idi imbasa ni Oleksii ti Exodo 20:4, 5. Saanak a nakaturog ta pinampanunotko, ‘Talaga kadi a suksukirenmi ti bilin ti Dios no agdayawkami iti imahen?’”

Kayat unay ni Larisa a masungbatan ti saludsodna, isu a nasapa kabigatanna, nagtartaray a napan iti simbaan ket binasana manen ti bilin a “Dika mangaramid maipaay kenka iti maysa a kinitikitan a ladawan . . . Dika agruknoy kadakuada.” Iti dayta laeng a gundaway a naawatanna ti kaipapanan dayta a bilin ti Dios. Idi agangay, nabautisaran ni Larisa ken dagiti nagannakna. Ti pamiliada  ti maysa kadagiti immuna a nagbalin a Saksi idiay Tbilisi.

Dandani 20 a tawen kalpasan a naammuan ni Vaso Kveniashvili ti kinapudno, adda naam-ammona nga umat-atender iti gimong dagiti Saksi ni Jehova idiay Tbilisi. Naragsakan ni Vaso idi nakitana manen dagiti Saksi. Nakabaybayag a nagur-uray.

Ngem idi damo, saan a kayat dagiti kakabsat a makiraman ni Vaso kadagiti aktibidadda ta pagaammo a dati a kriminal. Impagarup pay ti dadduma nga isu ket espia ti Soviet. Gapuna, uppat a tawen a saan a napalubosan a makigimong.

Idi nabigbig dagiti kakabsat a nasayaat ti motibo ni Vaso, impalubosdan nga agbalin a paset ti kongregasion ket nabautisaran. Ad-addan a makaasideg ni Vaso iti  Dios ti kinahustisia a binirbirokna sipud pay kinaagtutubona! (Isa. 30:18) Saan a bimmaaw ti regtana a nagserbi ken Jehova agingga a natay idi 2014.

Idi 1990, rumangrang-ayen ti trabaho a panangasaba iti makinlaud ken makindaya a Georgia. Mangikonkonduktan ti agarup 900 nga agibumbunannag iti 942 a panagadal iti Biblia. Naipasdeken ti pundasion para iti napartak a panagrang-ay kadagiti simmaruno a tawtawen.