SIREREGTA nga inkaskasaba dagiti adipen ni Jehova idiay Georgia ti naimbag a damag, ket binendisionan ni Jehova ti panagreggetda. Kas resultana, naidanonen ti naimbag a damag iti dandani amin a suli ti pagilian.

Ngem iti napalabas a tawtawen, ad-adda a nagpokus dagiti naregta nga agibumbunannag ken payunir kadagiti manmano a makasabaan a teritoria. Iti kabambantayan,  adda dagiti adayo a purok ken sitio a madanon laeng babaen iti four-wheel-drive a lugan wenno cable car.

Sipud idi 2009, tinawen a mangipatpatulod ti sangay ti Georgia kadagiti kongregasion iti listaan dagiti teritoria nga awan pay ti nakaitedanna ket aw-awisenda dagiti agibumbunannag a tumulong iti panangasaba kadagita a lugar. Dakkel ti insakripisio ti adu a kakabsat tapno masuportaranda dayta.

Kakaskasar pay laeng da Temuri ken Ana Bliadze idi naammuanda nga adu ti kasapulan nga agibumbunannag iti kabambantayan a rehion ti Ajaria. Kagatgatangda iti lote a pagipatakderanda iti balay. Ngem ita, adda oportunidadda a mangpalawa iti ministerioda.

Nagyanda pay laeng iti rehion ti Ajaria iti makalawas. Inyestoria ni Temuri ti obserbasionna idi kasangsangpetda: “Adayo ti pagpagnaen dagiti agibumbunannag tapno madanonda dagiti sitio. Adda four-wheel-drive a luganmi, ket napanunotko a dakkel ti maitulongna dayta.”

Innayon ni Ana: “Nagrigat ti umakar ta nakadekdekketkami kadagiti kakongregasionmi ken iti pamiliami. Ngem binendisionannakami ni Jehova.” Nasurok a tallo a tawenen a supsuportaran da Temuri ken Ana ti maysa a grupo idiay Keda, maysa nga ili iti rehion ti Ajaria.

Nagdakkel ti maitultulong dagiti temporary special pioneer iti trabaho a panangasaba kadagiti adayo a lugar. No agpatinggan ti panagserbi dagiti payunir, adu kadakuada ti agtalinaed iti lugar a nakaibaonanda tapno agtultuloy a matulonganda dagiti iyad-adalanda iti Biblia.

Naibaon ti dua a payunir a sister, nga agpada a Khatuna ti naganda, iti napintas nga ili ti Manglisi. Awan ti Saksi  nga aggigian sadiay, ngem nakabungbunga ti ministerioda. Iti immuna a bulan, siam ti ikonkonduktada a panagadal. Iti simmaruno a bulan, nagbalin a 12, ket iti simmaruno, 15, sa idi kuan, 18! Tapno agtultuloy a matulonganda dagiti iyad-adalanda, nagtalinaedda idiay Manglisi.

Masapul nga agbalin a manangipamuspusan dagiti sister tapno masuportaranda ti bagida iti pinansial. Magusgustuan dagiti mapmapan idiay Manglisi ti pagpampannakkel a makan dayta a lugar—jam a naaramid iti pinecone (bunga ti pine tree), a pagaammo a nasayaat iti salun-at. Isu nga idi damo, agal-ala dagiti sister kadagiti berde a pinecone nga aramidenda a jam, sada ilako iti palengke. Ngem idi kuan, adda naawatda a di ninamnama a pangalaan iti kuarta.

Maysa nga aldaw, nangted ti iyad-adalanda iti Biblia kadagiti piek. Imbagana a nagitlog ti maysa kadagiti manokna  iti nalemmeng a lugar ket idi nagpessa, inyawid ti manok dagiti piek. Impadawat ti babai kadagiti sister ti dina ninamnama a nayon dagiti piekna. Napadasan idi ti maysa kadagiti sister ti nagtaraken iti manok isu nga inrugida ti agtaraken tapno masuportaranda ti bagida.

Imbaga ti maysa kadagiti sister: “Iti tulong ni Jehova ken iti tulong dagiti kakabsat ken dagiti iyad-adalanmi iti Biblia, nakapagyankami iti Manglisi iti lima a tawen.” Adda itan naregta a grupo dagiti kakabsat sadiay.

Iti napalabas a tawtawen, nagadu ti mapmapan idiay Georgia a naggapu iti sabali a pagilian. Nakita dagiti payunir nga adda nakalukat a sabali a pamay-an ti panangasaba. Isu a nagsursuroda iti nagduduma a lengguahe kas iti Arabic, Azerbaijani, Chinese, English, Persian, ken Turkish.

Adu a payunir ti simmuporta kadagiti grupo ken kongregasion a sabali ti pagsasaona, ken adda met dagiti immakar iti sabali a pagilian a dakdakkel ti panagkasapulanna. Nasurok a 20 ti tawen ti dua a brother a da Giorgi ken Gela idi nagboluntarioda iti pagilian nga asideg iti Georgia. “Kayatmi nga ited ken Jehova ti kasayaatan isu nga immakarkami sadiay,” kinuna Giorgi.

Inyestoria ni Gela: “Adu ti nasursurok iti panagserbik kas maysa a panglakayen iti kasta a teritoria. Makaparagsak no usarennaka ni Jehova a tumulong kadagiti ‘babassit a karnerona.’”—Juan 21:17.

Innayon ni Giorgi: “Adu ti pakarigatan, ngem nagpokuskami iti panagserbimi ken dimi pinanunot a kamali ti desisionmi. Ammomi nga inaramidmi laeng ti masapul nga aramidenmi.”

 Sumagmamano a tawen a nagserbi idiay Turkey ti maysa pay a brother nga agnagan met laeng iti Gela. Imbagana: “Idi damo, mapukpukaw ti ragsakko ta marigrigatanak nga agsursuro iti pagsasaoda. Ngem idi kabaelakon ti makisarita kadagiti kakabsat ken kadagiti tattao iti teritoria, nakaragragsakakon.”

Nasurok a 10 a tawenen nga agpaypayunir ti sister a ni Nino idiay Istanbul, Turkey. Imbagana: “Sipud iti umuna nga aldawko ditoy, nariknak ti tulong ni Jehova. No agpaypayunirka iti sabali a pagilian, dandani inaldaw nga adda ‘pang-Yearbook a kapadasam.’”