NAADDAAN ti Georgia iti bukodna a gobierno idi 1991, ken iti dayta met la a tawen, nagpatingga ti Soviet Union. Ngem rimmigat ti kasasaad ti biag gapu kadagiti panagbalbaliw iti politika ken riribuk iti kagimongan. Imbaga ti manangaywan idi iti sirkito a ni Genadi Gudadze a dandani agmalmalem a makipila dagiti tattao tapno gumatang iti tinapay.

Gagangay idi a kasabaan dagiti Saksi dagiti nakapila. Kuna ni Genadi: “Kadagidi a narigat a tawtawen, dandani interesado ti amin iti kinapudno. Ginasut ti naawatmi a papel a nakaisuratan ti adres dagiti nagkiddaw nga agpayadal iti Biblia.”

 Kada malpas ti gimong, ibasa dagiti mangidadaulo a kakabsat ti nagan ken adres dagiti mayat a mabisita. Kalpasanna, agboluntario dagiti kakabsat a mangbisita kadakuada.

Inyestoria ni Brother Levani Sabashvili, a panglakayen idi idiay Tbilisi, ti maipapan iti agassawa a nagkiddaw a mabisita. Kinunana: “Innalan dagiti kakabsat ti amin nga adres, ngem awan ti nangala iti adres daytoy nga agassawa. Adayo ti balayda, ken addan sumagmamano nga iyad-adalan ti kaaduan kadakami.”

Kalpasan ti sumagmamano a bulan, nagkiddaw manen ti agassawa a mabisita. Ket iti maikatlo a panagkiddawda, impakaasida a bisitaen idan dagiti kakabsat tapno saan a makabasol dagiti kakabsat iti dara. (Ara. 20:26, 27) Imbaga ni Levani: “Tiempo idi ti panagselebrar dagiti tattao iti Baro a Tawen ket kaaduanna a dikami bumisbisita kadagita a tiempo. Ngem napanunotmi a masapul a mapankamin.”

Kasla saan a mamati ti mabisbisin iti naespirituan nga agassawa a da Roini ken Nana Grigalashvili idi nakitada ni Levani ken ti maysa a brother iti ruanganda iti maysa a nakalamlamiis nga agsapa. Dagus a nakipagadalda iti Biblia. Regular pioneer itan da Roini ken Nana agraman dagiti annakda.

Napalalo ti panagyaman dagiti immawat iti kinapudno isu nga insakripisioda ti panawen, pigsa, ken sanikuada tapno maikasabada ti naimbag a damag. Kas pagarigan, uray no adda annak da Badri ken Marina Kopaliani, ti pamiliada ti maysa kadagiti nagbibiahe kadagiti adayo a  purok tapno tumulong kadagiti tattao nga agbirbirok iti kinapudno.

Kada ngudo ti lawas, da Badri ken Marina, agraman dagiti babbaritoda a da Gocha ken Levani, ket mapmapan iti rehion ti Dusheti, maysa a lugar iti amianan ti Tbilisi nga addaan kadagiti napintas a bambantay. No dadduma, agbiaheda iti agarup 150 a kilometro kadagiti agsikkosikko a dalan tapno madanonda dagiti adayo a purok.

Maysa nga aldaw, inawis ti maysa a babai da Badri ken Marina iti pagtrabtrabahuanna. Kinuna ni Badri: “Idi nakadanonkami, agarup 50 a tattao ti agur-uray kadakami iti uneg ti maysa a dakkel a kuarto! Idi damo, nabiglaak, ngem kalpasan a nagkararagak ken Jehova, inlawlawagko dagiti bersikulo iti Mateo 24 maipapan iti pagilasinan ti maudi nga al-aldaw. Nasdaaw ti maysa kadakuada ket insaludsodna, ‘Apay a saan nga isursuro dagita dagiti padimi?’”

Naammuan ti adu a nasingpet ti panagpuspusona a Georgian ti kinapudno babaen iti Memorial. Kas pagarigan, idi naselebraran ti Memorial iti balay ni Sister Ia Badridze idiay Tbilisi idi 1990, adu a kaarrubana ti nagbalin nga interesado.

Imbaga ni Sister Badridze a mabalin a mausar ti apartmentna para iti Memorial. Iti tulong dagiti annakna, binakanteanda ti salas. Ngem pangalaanna ngay kadagiti tugaw? Idiay Georgia, gagangay nga agabang dagiti pamilia kadagiti lamisaan ken tugaw para kadagiti dadakkel nga okasion. Gapu ta tugaw laeng ti inabangan ni Sister Badridze, insalsaludsod dagiti agpapaabang: “Saanyo a kasapulan ti lamisaan? Kasanokayo a mangan?”

Nakaskasdaaw ta immanay ti 200 nga immatender iti Memorial iti apartment ni Sister Badridze nga adda iti maika-13 a kadsaaran! Kalpasan ti Memorial, adu kadagiti kaarrubana ti nagsalsaludsod maipapan kadagiti Saksi ni Jehova.

Idi 1992, maab-abangan dagiti dadakkel nga auditorium iti nadumaduma a paset ti pagilian para iti  Memorial. Inyestoria ni Davit Samkharadze, nga aggigian idiay Gori, ti panagsaludsod ti agdaldaliasat a manangaywan maipapan iti planoda para iti Memorial.

Idi naammuanna a plano dagiti kakabsat nga angayen ti Memorial iti maysa a balay, imbagana: “Di kad adda dakkel nga auditorium iti siudad? Apay a diyo abangan?” Gapu ta nasurok a 1,000 ti malaon ti auditorium, pampanunoten dagiti kakabsat a saanda a kasapulan ti kasta kadakkel nga auditorium ta nasurok laeng a 100 ti bilangda.

Insingasing ti agdaldaliasat a manangaywan, “No 10 ti maimbitaran ti kada agibumbunannag, mapunno ti auditorium.” Nupay kasla imposible, inkagumaan dagiti kakabsat a suroten ti singasingna. Permi ti ragsakda ta 1,036 ti immatender iti Memorial! *

Idi 1992, saan pay a naidanon ti mensahe ti Biblia iti dadduma a rehion idiay Georgia. Kasano a madanon ti ili ni Jehova dagitoy a baro a teritoria ket nakaro ti krisis ti ekonomia iti pagilian?

“Minitingnakami ti maysa nga agdaldaliasat a manangaywan tapno ibagana ti mabalinmi nga aramiden,” kuna ni Tamazi Biblaia nga aggigian idi iti makinlaud a Georgia. “Bassit laeng ti ammomi maipapan iti urnos ti panagserbi kas special pioneer. Ngem ammomi a kasapulan unay a maikasaba ti naimbag a damag.” (2 Tim. 4:2) Gapuna, nangpilida iti 16 a payunir ket imbaonda ida iti nagduduma a lugar iti pagilian.—Kitaem ti mapa.

 Idi Mayo 1992, adda naaramid a tallo nga oras a miting idiay Tbilisi tapno maparegta dagiti payunir a maibaon kadagita a teritoria iti lima a bulan. Bayat nga addada iti teritoriada, binulan a bumisbisita dagiti panglakayen tapno paregtaen ken ipaayanda ida kadagiti material a kasapulanda.

Naibaon ti dua a payunir a sister a da Manea Aduashvili ken Nazy Zhvania iti ili ti Ozurgeti. Agtawen idi ni Manea iti 60. Inyestoriana: “Ammomi nga adda interesado iti asideg ti Ozurgeti isu nga idi nakasangpetkamin, kinontakmi ket imbagami a kayatmi a bisitaen. Idi nakadanonkamin iti balay ti babai, agur-uray a kaduana ti agarup 30 a tattao nga inawisna. Iti dayta nga aldaw, nakairugikami iti sumagmamano a panagadal iti Biblia.”

Kasta met laeng kaballigi ti simmaruno a bulbulan. Kalpasan laeng ti lima a bulan, addan 12 a nakasagana a mabautisaran!

Naibaon ti dua a payunir a brother a da Pavle Abdushelishvili ken Paata Morbedadze idiay Tsageri. Kaaduan kadagiti aggigian sadiay ti mangsursurot kadagiti kadaanan a tradision a nalaokan kadagiti sursuro ti Kakristianuan.

Idi dandanin ti lam-ek, dandani metten agpatingga ti lima a bulan a panagserbi da Pavle ken Paata idiay Tsageri. Naawis ni Paata iti trabaho a panagipatarus iti sabali a lugar isu a masapul nga agdesision ni Pavle. Kinunana: “Ammok a narigat ti agyan idiay Tsageri no lam-ek. Ngem kasapulan pay dagiti iyad-adalanmi ti tulong, isu a nagtalinaedak.”

“Nakipagyanak iti maysa a pamilia,” kuna ni Pavle. “Kaaduanna nga agmalmalemak a mangasaba. No rabiin, kumaduaak iti pamilia iti salas ket agyankami iti abay ti paginuduan. Ket no maturogakon, umuliak iti kuartok, agboneteak sa agulesak iti napuskol.”

Idi binisita dagiti panglakayen ni Pavle kalpasan ti lam-ek, addan 11 a kualipikado nga agbalin a di bautisado nga agibumbunannag. Di nagbayag, nabautisaranda.