SAKBAY pay a mayanak ni Sanel, imbagan dagiti doktor kadagiti nagannakna a no bilang agbiag, maaddaan iti nakaro a sakit. Ket idi nayanaken, kasapulanna a dagus ti maoperaan. Aggigian dagiti nagannakna idiay Abkhazia—maysa a rehion a simmina iti Georgia—ket awan mabirokanda a doktor a mangopera ken Sanel a di agusar iti dara.

Nakisarita dagiti nagannakna iti Hospital Liaison Committee (HLC) iti lugarda. * Nabang-aranda ta nakabirok a dagus ti HLC iti doktor a mayat nga agopera a di agusar iti dara idiay Tbilisi a kabesera ti Georgia. Ngem saan pay a makabiahe ti nanang ni Sanel gapu ta nakapsut pay laeng. Isu a dagiti lola ni Sanel nga agpada a Saksi ti nangipan kenkuana iti ospital idiay Tbilisi.

Nagballigi ti delikado nga operasion. Di nagbayag, insurat dagiti lola ni Sanel: “Nasurok a 20 nga aldaw nga addakami iti ospital. Adu a kakabsat a Georgian ti bimmisbisita ken timmulong kadakami. Adu ti nangliwliwa kadakami. Mabasbasami laeng idi ti maipapan iti ayat nga ipakpakita dagiti kakabsat, ngem ita, napadasanmi a mismo dayta.”