Idiay Australia, idi adda pay laeng ni Olivia iti kindergarten, inawisna ti maestrana iti Memorial, ket intultuloyna nga inaw-awis iti simmaruno a walo a tawen. Kamaudiananna, idi 2016, timmawag kenkuana ti maestrana ket imbagana a kayatna ti umatender. Imbagana a maragsakan ta tinawen nga aw-awisen ni Olivia. Isu nga immatender ti  maestra iti Memorial a kaduana ti lakayna. Gapu ta agtrabtrabaho idi ti lakayna iti konseho ti ili, nalagipna ti pannakaibangon ti Kingdom Hall. Imbagana kadagiti kakabsat a permi a nagbilib iti kinaorganisado ti pannakaibangon ti Kingdom Hall. Naragsakan unay ti maestra ken ti lakayna iti dayta a rabii nga uray la karamanda kadagiti naudi a nagawid.

Aggigian idiay Timor-Leste ni Jacintu ken ti baketna. Gapu ta napeklanda a Katoliko, dida maawatan no apay a nagbalin a Saksi ni Jehova ti kaanakanda ken saanen a makimismisa a kadua ti pamiliada. Kayat ni Jacintu a paneknekan a kamali ti kaanakanna isu a binasana ti libro nga Ania a Talaga ti Isursuro ti Biblia? tapno agbirok iti ulbod a sursuro. Idi agangay, imbagana ken baketna, “Binasak ti libro ket mayat met.”

“Baka saanmo a binasa a naimbag,” insungbat ti baketna. “Basaem manen, ngem in-inayadem.”

Inaramid dayta ni Jacintu ket imbagana manen ken baketna: “Mayat met.” Innayonna pay: “Naggapu amin iti Biblia ti linaonna. Uray ti ibagbagana maipapan iti panagdayaw kadagiti natay ket naggapu iti Biblia.”

Imbaga ti baketna: “Basaem manen, ngem ita, ugedam ti kada parapo ken adalem a naimbag. Sigurado a kamali dayta.”

Inadal a naimbag ni Jacintu ti libro ken minarkaanna ti kada parapo. Kalpasan ti maikatlo a panagbasana,  imbagana: “Pudno amin a linaonna! Husto ti kaanakanta.” Makipagad-adal itan ni Jacintu kadagiti Saksi ni Jehova.

Binisita ti maysa a payunir a sister nga aggigian idiay Guam ti maysa a babai nga agsasao iti Pohnpeian ket impabuyana ti video nga Apay nga Adalem ti Biblia? Imbaga ti sister nga agsublinto. Namin-ano a nagsubli ti sister ngem saanna a nadandanon ti babai. Naminsan, ti balasitang ti babai ti nanglukat iti ridaw isu a nangipabuya ti sister iti maysa a video iti serye nga Agbalinka a Gayyem ni Jehova. Nagustuan unay ti balasitang ti video. Idi nagsubli ti sister, ti nanang ti balasitang ti nanglukat iti ridaw ket naginteres iti mensahe ti Biblia. Sakbay dayta, imbaga ti balasitang iti nanangna a masapul a mapanda iti simbaan ti babai a nangipabuya kenkuana iti video.  Mabalin a dayta ti nangriing iti interes ti nanang ti balasitang. Impakita ti sister no kasano ti panagadal iti Biblia sa pinagsaritaanda no kasanoda a maitultuloy ti panagadalda.

Napan ti manangaywan iti sirkito a ni Terence ken ni Stella a baketna idiay Inakor, maysa a teritoria idiay Papua New Guinea a di pay nakaskasabaan. Inyestoria ni Terence: “Iti parbangon ti umuna nga aldawmi sadiay, bayat a matmaturogkami pay laeng, adda nagtuktok iti ridaw. Nagadu ti agur-uray iti ruar isu a nangasabakami manipud alas sais agingga iti tengnga ti aldaw.  Nagsardengkami tapno agdigus ket idi kuan, nakitami nga adu pay ti agur-uray. Isu a nangasabakami manen manipud iti alas dos ti malem agingga iti tengnga ti rabii.” Kabigatanna, nakasapsapa a pimmanaw ti agassawa a napan iti sabali a lugar. Adu manen ti napan iti dagusda ngem saanda ida a nadanon. Imbaga ni Terence: “Idi naammuanda no sadino ti napananmi, sinurotdakami. Idi nabirokandakami, nangasabakami manen agingga iti tengnga ti aldaw. Idi nagsublikamin iti dagusmi, adda sabali a grupo nga agur-uray kadakami. Inaldaw a dandani kasta ti mapaspasamak. Dagiti tattao sadiay ket ‘kasla karkarnero nga awanan pastor.’”—Mat. 9:36.

Idiay New Caledonia, napan iti therapist ti payunir a ni Agnès ta agsaksakit ti imana. Bayat ti therapy, imbaga ti therapist ken Agnès a nagadun ti nakitana nga agrigrigat isu a pampanunotenna no naulpit ti Dios. Siuulimek a nagyaman ni Agnès ken Jehova ta inikkanna iti gundaway a mangidepensa kenkuana. Kalpasanna, impakitana ti tract nga Agpatingganto Pay Ngata ti Panagrigrigat? sana imbasa ti Apocalipsis 21:3, 4.

Imbaga ti therapist, “Ebanghelio laeng ti adda iti Bibliak, isu a diak sigurado no adda iti Bibliak ti binasam.” Idi nabigbigna a maysa a Saksi ni Jehova ni Agnès, imbagana nga adda idi nakasarsaritana a Saksi iti pagilianda a Chile.

Nalagip ni Agnès nga adda video iti JW Broadcasting maipapan iti report ti sangay ti Chile. Isu nga idi bimmisita manen, intugotna ti tablet-na ket impabuyana ti video iti therapist. Natukay ti rikna ti therapist idi  nakitana ti Bethel ken ti Assembly Hall idiay Chile. Kalpasanna, imbaga ni Agnès, “Kayatko met nga ited daytoy kompleto a Biblia tapno mabasam ti Apocalipsis 21:3, 4, ti teksto nga imbasak idi napan a lawas!” Dagus a timmakder ti therapist iti tugawna sa inarakupna ni Agnès ket imbagana, “Pagyamanan unay kadagitoy nagmayat a regalom!”

Idi nagsubli manen ni Agnès, intugotna ti libro nga Ania a Talaga ti Isursuro ti Biblia? sana intuloy nga inlawlawag ti makagapu iti panagrigrigat ditoy daga. Imbaga ti therapist nga agbakasion isuna idiay Chile ket itugotna ti libro tapno malpasna a basaen.