Patgenmi a Kakabsat:

Idi maikapito a siglo B.C.E., adda nakaskasdaaw a nasirmata ni propeta Ezequiel. Adda nakitana a nagdakkel a lugan, maysa a nailangitan a karuahe, a konkontrolen ti Soberano iti uniberso. Nakaskasdaaw unay ti panagtaray dayta a lugan. Kasla kimat ti kapartakna, ken uray no agbaliw iti direksion, saanna a kasapulan ti agmenor wenno agsikko!—Ezeq. 1:4, 9, 12, 14, 16-27.

Ipakita dayta a sirmata nga agtultuloy nga umab-abante ti nailangitan a paset ti organisasion ni Jehova. Ti ngay naindagaan a paset? Ipakita ti napalabas a tawen serbisio a pappapartaken met ni Jehova ti panagrang-ay ti organisasionna ditoy daga!

Ditoy United States, okupado dagiti miembro ti pamilia ti Bethel iti Brooklyn iti panagakarda iti baro a sangalubongan a hedkuarter idiay Warwick, New York, ken iti dadduma pay a pasilidad. Adda met dagiti naibaon nga agserbi iti tay-ak. Okupado met dagiti Bethelite iti dadduma a sangay iti panagibangon kadagiti pasdek, panag-renovate, wenno panagakar iti baro a lokasion. Adda met dagiti sangay a napagtitipon. Dakayo ngay? Uray no saankayo a karaman kadagita, sigurado nga okupadokayo met iti sabali a pamay-an.

Maparparegta ken maragragsakan ti puso dagiti miembro ti Bagi a Manarawidwid a makakitkita a nakaregregta  ti ili ti Dios iti intero a lubong bayat a makidangdanggayda iti organisasion ni Jehova. Adu ti immakar kadagiti lugar a dakdakkel ti panagkasapulanna. Adda dagiti nangpadas iti sabali a pamay-an ti panagserbi, kas iti panangasaba iti sabali a lengguahe. Adu met ti nangpadas kadagiti baro a pamay-an ti panangasaba uray no saanda a pamiliar kadagita. Adu pay ti nangpalawa iti ministerioda iti sabali a pamay-an. Ken amin a matalek a Kristiano, a pakairamanan dagiti nataengan ken masaksakit, itultuloyda a tartarayen ti lumba ti biag. Naregtada nga agserserbi ken Jehova ket ipakpakaammoda nga ulbod ni Satanas!—1 Cor. 9:24.

Masiguradoyo a makitkita ni Jehova ti kinamatalekyo. (Heb. 6:10) Ti kinatulokyo ipalagipna kadakami ti ulidan da Abraham ken Sara. Idi agtawen ni Abraham iti  nasurok a 70, pimmanaw iti Ur a siudad dagiti Caldeo sa impanna ti pamiliana iti adayo a daga ti Canaan ket naggigian kadagiti tolda iti nabatbati a sangagasut a tawen ti panagbiagna. Talaga a natulok da Abraham ken Sara!—Gen. 11:31; Ara. 7:2, 3.

Kastakay met kadi? Aminkayo a simamatalek nga agib-ibtur bayat dagiti narigat a kasasaad tungtungpalenyo ti imbilin ni Jesus kadatayo. Kinunana: “Inkayo ngarud ket mangaramidkayo iti ad-adalan kadagiti tattao iti amin a nasion, a bautisaranyo ida iti nagan ti Ama ken ti Anak ken ti nasantuan nga espiritu.”—Mat. 28:19.

Uray ti imbaga ni Jesus nga “inkayo” ipakitana a masapul nga agbalintayo nga okupado ken aktibo iti panagserbi. Talaga a makaparagsak a makita ti nagapuanan dagiti naregta a pasurot ni Kristo iti napalabas a tawen! Nalawag a bembendisionan ni Jehova ti trabaho a panangipakaammo iti naimbag a damag maipapan iti Pagarian iti amin a nasion.—Mar. 13:10.

Adu ti umaw-awat iti mensahetayo. Ti kangatuan a bilang ti agibumbunannag iti napalabas a tawen ket 8,340,847, ken agpromedio iti 10,115,264 ti naikondukta a panagadal iti Biblia iti kada bulan. Nalawag nga umab-abante ti nailangitan a karuahe, ken uray dakayo! Itultuloyyo ti kinaregtayo iti daytoy ababa a tiempo a nabatbati sakbay nga iserra ni Jehova ti ridaw nga agturong iti pannakaisalakan.

Maitutop la unay a ti tekstotayo iti tawen 2017 ket “Agtalekka ken Jehova ket aramidem ti naimbag”! (Sal. 37:3) No tungpalenyo dayta ket aramidenyo ti naimbag babaen iti panagserbiyo ken Jehova, ipakpakitayo nga agtaltalekkayo kenkuana. Kanayon koma a laglagipenyo  a saankayo nga agmaymaysa. Tungtungpalen ni Jesus ti imbagana: “Adtoy! addaak kadakayo iti amin nga al-aldaw agingga iti panungpalan ti sistema ti bambanag.”—Mat. 28:20.

Masiguradoyo nga agtultuloy a bendisionan ni Jehova ti matalek a panagserbiyo. Dakkel man wenno bassit ti maar-aramidanyo, ti napateg ken Jehova ket ipapaayyo ti amin a kabaelanyo ken umiso ti motiboyo. Apresiarenna unay dagita a regaloyo ken maragsakan ti pusona. (2 Cor. 9:6, 7) Itultuloyyo ngarud ti umasideg iti naayat nga Amayo babaen ti regular a panagkararag, panagadal iti Sao ti Dios, pannakigimong, ken aktibo a pannakiraman iti ministerio.

Bayat a maib-ibus ti ‘ababa a periodo ti tiempo’ ti Diablo, determinado dayta a rebelde a mangaramid iti amin a kabaelanna tapno saantayo a makapagtalinaed a matalek ken Jehova. (Apoc. 12:12) Agtalinaedkayo a nadekket ken Jehova, ket saanto a pulos agballigi ti aniaman a panangikagumaan ti Diablo. (Sal. 16:8) Ay-ayatendakayo unay ken apresiarenmi ti suportayo kadagiti aktibidad mainaig iti Pagarian ti Apo kadagitoy maudi nga al-aldaw.

Dagiti kakabsatyo,

Bagi a Manarawidwid Dagiti Saksi ni Jehova