Dakkel a Bunggoy iti Saklang ti Trono ni Jehova
Kapitulo Trese
Dakkel a Bunggoy iti Saklang ti Trono ni Jehova
1. (a) Sakbay nga awatenda ti gunggonada, ania ti mapasaran ti 144,000 wenno dagiti adipen ti Dios a nagbiag sakbay ti panawen Kristiano? (b) Ania ti manamnama ti “maysa a dakkel a bunggoy” a sibibiag ita?
DAGITI matalek nga adipen ti Dios mangrugi ken Abel agingga ken Juan a Mammautisar impangpangrunada iti biagda ti panagaramid iti pagayatan ti Dios. Ngem natayda aminen ket ur-urayenda ti panagungarda ditoy daga iti baro a lubong ti Dios. Ti 144,000, a makipagturay ken Kristo iti nailangitan a Pagarian ti Dios, masapul met a matayda sakbay nga awatenda ti gunggonada. Nupay kasta, ipakita ti Apocalipsis 7:9 a kadagitoy maudi nga al-aldaw, “maysa a dakkel a bunggoy” manipud iti amin a nasion ti saanto a matay no di ket mangnamnama nga agbiag nga agnanayon ditoy daga. Maysakayo kadi kadakuada?
Panangilasin iti Dakkel a Bunggoy
2. Kasano a limmawag ti pannakaawat iti kinasiasino ti dakkel a bunggoy iti Apocalipsis 7:9?
2 Idi 1923, naawatan dagiti adipen ni Jehova a ti “karnero” iti pangngarig ni Jesus a masarakan iti Mateo 25:31-46 ken ti “sabsabali a karnero” a tinukoyna iti Juan 10:16 ket tattao nga addaan iti gundaway nga agbiag nga agnanayon ditoy daga. Idi 1931, dagidiay nadeskribir iti Ezequiel 9:1-11 a namarkaan kadagiti mugingda ket nabigbig met kas dagidiay addaan iti naindagaan a namnama. Sa idi 1935, natarusan a ti dakkel a bunggoy ket paset ti sabsabali a karnero a tinukoy ni Jesus. Daytoy a naparaburan a dakkel a bunggoy ti agdagup iti minilion ita.
3. Apay a ti sasao a “sitatakder iti sanguanan ti trono” dina tukoyen ti maysa a nailangitan a klase?
3 Iti Apocalipsis 7:9, dina kinuna nga adda idiay langit ti dakkel a bunggoy. Ti ‘panagtakderda iti sanguanan ti trono’ ti Dios dina kaipapanan nga addada idiay langit. Kayatna laeng a sawen nga addada iti imatang ti Dios. (Salmo 11:4) Ti dakkel a bunggoy, “nga awan ti tao a nakabael a mangbilang,” ket saan a nailangitan a klase, kas ipakita ti saan nga espesipiko a bilangna no maidilig iti nailanad iti Apocalipsis 7:4-8 ken Apocalipsis 14:1-4. Ipalgakda a 144,000 ti bilang dagidiay napili ditoy daga a mapan idiay langit.
4. (a) Ania ti “dakkel a rigat” a malasatan ti dakkel a bunggoy? (b) Kas nadakamat iti Apocalipsis 7:11, 12, siasino dagiti umim-imatang iti dakkel a bunggoy ken makidanggay kadakuada iti panagdayaw?
4 Kuna ti Apocalipsis 7:14 maipapan iti dakkel a bunggoy: “Dagitoy isuda dagidiay naggapu iti dakkel a rigat.” Malasatanda ti kakaruan pay laeng a rigat a mapasaran ti sangatauan. (Mateo 24:21) Inton agyamanda iti Dios ken ni Kristo gapu iti pannakaisalakanda, makidanggaydanto kadagiti amin a matalek a parsua idiay langit iti panangikuna: “Amen! Ti bendision ken ti dayag ken ti sirib ken ti panagyaman ken ti dayaw ken ti pannakabalin ken ti bileg maadda koma iti Diostayo iti agnanayon ken awan inggana. Amen.”—Apocalipsis 7:11, 12.
Panangpaneknek a Maikarida
5. Kasanotayo a maammuan no ania ti makalikaguman kadagiti agbalin a paset ti dakkel a bunggoy?
5 Maitalimeng ti dakkel a bunggoy iti dakkel a rigat maitunos kadagiti nalinteg a pagalagadan ni Jehova. Nailawlawag
iti Biblia dagiti galad a pakailasinan dagiti maispal. No kasta, nasken a paneknekan ita dagiti mangay-ayat iti kinalinteg a maikarida a makalasat. Ania ti masapul nga aramidenda?6. Apay a maitutop a mayarig ti dakkel a bunggoy iti karnero?
6 Nasingpet ken natulnog dagiti karnero. Isu nga idi kinuna ni Jesus nga adda sabali a karnerona a saan a paset ti nailangitan a grupo, tuktukoyenna dagiti tattao a saan laeng nga agtarigagay nga agbiag nga agnanayon ditoy daga no di pay ket natulnog kadagiti sursurona. “Imdengan dagiti karnerok ti timekko, ket am-ammok ida, ket surotendak,” kinunana. (Juan 10:16, 27) Isuda dagiti pudno a mangipangpangag ken agtultulnog iti bilin ni Jesus kas ad-adalanna.
7. Aniada a galad ti masapul a sukayen dagiti pasurot ni Jesus?
7 Aniada pay a galad ti masapul a sukayen dagitoy a pasurot ni Jesus? Sumungbat ti Sao ti Dios: “Ikkatenyo koma ti daan a personalidad a mayannurot iti sigud a dana ti kababalinyo ken . . . ikawesyo koma ti baro a personalidad a naparsua maitunos iti pagayatan ti Dios iti pudno a kinalinteg ken kinasungdo.” (Efeso 4:22-24) Sukayenda dagiti galad a mangpalagda iti panagkaykaysa dagiti adipen ti Dios—“ayat, rag-o, talna, mabayag a panagitured, kinamanangngaasi, kinaimbag, pammati, kinaalumamay, panagteppel.”—Galacia 5:22, 23.
8. Ania ti mapasaran ti dakkel a bunggoy gapu iti panangsuportada iti natda?
8 Supsuportaran ti dakkel a bunggoy dagidiay bassit ti bilangda a para langit, a mangidadaulo iti trabaho a panangasaba. (Mateo 24:14; 25:40) Sumuporta ti sabsabali a karnero nupay ammoda a maipasangoda iti ibubusor gapu ta iti rugrugi daytoy maudi nga al-aldaw, ni Kristo Jesus ken dagiti anghelna intapuakda ni Satanas ken dagiti demoniona manipud langit. Nagbanag daytoy ‘iti rigat iti daga . . . agsipud ta ti Diablo immulog kadakayo, nga addaan iti dakkel nga unget, yantangay ammona nga ababan ti periodo ti tiempona.’ (Apocalipsis 12:7-12) Dayta ti makagapu a kumarkaro ti panangbusor ni Satanas kadagiti adipen ti Dios bayat nga umas-asideg ti panungpalan daytoy a sistema.
9. Kasano kaballigi dagiti adipen ti Dios no maipapan iti panangikasaba iti naimbag a damag, ken apay?
9 Iti laksid ti nakaro a pannakaidadanes, rumangrang-ay latta ti panangasaba. Nupay sumagmamano la a ribu Isaias 54:17) Uray ti maysa a kameng ti nangato a korte dagiti Judio nabigbigna a di mapaay ti aramid ti Dios. Kinunana kadagiti Fariseo idi umuna a siglo maipapan kadagiti adalan: “Baybay-anyo ida; (agsipud ta, no daytoy a gandat wenno daytoy nga aramid ket aggapu kadagiti tattao, maduprakto dayta; ngem no aggapu iti Dios, saanyonto a kabaelan a dupraken ida;) ta no saan, amangan ta iti kinaagpaysuanna masarakankayo a mannakilaban iti Dios.”—Aramid 5:38, 39.
idi arinunos ti Gubat Sangalubongan I, minilion itan ti mangikaskasaba iti Pagarian, yantangay inkari ni Jehova: “Aniaman nga igam a mabukelto maibusor kenka saanto nga agballigi.” (10. (a) Ania ti ipasimudaag ti “marka” ti dakkel a bunggoy? (b) Kasano nga impangag dagiti adipen ti Dios ti “timek manipud langit”?
10 Dagiti kameng ti dakkel a bunggoy ket nailadawan kas namarkaan a maisalakan. (Ezequiel 9:4-6) Dayta a “marka” ti pammaneknek a dedikadoda ken ni Jehova, a nabautisaranda kas adalan ni Jesus, ken ikagkagumaanda a patanoren ti Nakristianuan a personalidad. Impangagda ti “timek manipud langit” a nagkuna maipapan iti konkontrolen ni Satanas a sangalubongan nga imperio ti palso a relihion: “Rummuarkayo kenkuana, tattaok, no saanyo a kayat ti makiraman kenkuana kadagiti basolna, ken no saanyo a kayat ti umawat iti paset dagiti saplitna.”—Apocalipsis 18:1-5.
11. Iti ania a napateg a pamay-an nga imparangarang ti dakkel a bunggoy nga adipen ida ni Jehova?
11 Kinuna met ni Jesus kadagiti pasurotna: “Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.” (Juan 13:35) Maisupadi iti dayta, agpipinnatay dagiti agkakarelihion iti daytoy a lubong, a masansan a gapu laeng ta agduma ti pagilianda! Kuna ti Sao ti Dios: “Ti annak ti Dios ken ti annak ti Diablo nabatadda babaen itoy a kinapudno: Tunggal maysa a saan nga agar-aramid iti kinalinteg saan a nagtaud iti Dios, uray met ti saan nga agayat iti kabsatna. . . . Rebbeng a maaddaantayo iti ayat iti maysa ken maysa; saan a kas ken Cain, a nagtaud iti daydiay nadangkes ken nangpapatay iti kabsatna.”—1 Juan 3:10-12.
12. Inton dakkel a rigat, ania ti aramiden ni Jehova kadagiti relihion a mayarig kadagiti “kayo” nga awan serbi ti bungada?
12 Kinuna ni Jesus: “Tunggal naimbag a kayo mangpataud iti nasayaat a bunga, ngem tunggal rinuker a kayo mangpataud iti awan pategna a bunga; ti maysa a naimbag a kayo saan a makapataud iti awan pategna a bunga, ti maysa a rinuker a kayo saan met a makapataud iti nasayaat a bunga. Tunggal kayo a saan a mangpatpataud iti nasayaat a bunga mapukan ken maibelleng iti apuy. Pudno, ngarud, babaen kadagiti bungada mailasinyonto dagidiay a tattao.” (Mateo 7:17-20) Ti bunga a pinataud dagiti relihion daytoy a lubong paneknekanna a rinukerda a ‘kaykayo,’ nga asidegen a dadaelen ni Jehova iti dakkel a rigat.—Apocalipsis 17:16.
13. Kasano nga ipakita ti dakkel a bunggoy a sangsangkamaysada a ‘sitatakder iti sanguanan ti trono’ ni Jehova?
13 Ipakita ti Apocalipsis 7:9-15 dagiti makagapu a naitalimeng ti dakkel a bunggoy. Nadeskribirda kas sangsangkamaysa a ‘sitatakder iti sanguanan ti trono’ ni Jehova, nga itantandudoda ti sapasap a kinasoberanona. “Linabaanda dagiti pagan-anayda ket pinapudawda ida iti dara ti Kordero,” a mangipakita a bigbigenda ti mangabbong-basol a daton ni Jesus. (Juan 1:29) Indedikarda ti bagida iti Dios ket insimboloda dayta babaen ti panagpabautisar iti danum. Isu a nadalusda iti imatang ti Dios, nga iladawan dagiti puraw a pagan-anay, ken ipapaayda kenkuana ti “sagrado a panagserbi iti aldaw ken rabii.” Addada kadi pamay-an nga ad-adda a maitunosyo ti biagyo iti nadakamat ditoy?
Dagiti Gunggona Ita
14. Ania ti sumagmamano a naisangsangayan a magunggona dagiti agserserbi ken Jehova uray ita?
14 Nalabit napaliiwyon dagiti naisangsangayan a magunggona dagiti agserserbi ken Jehova uray itan. Kas pagarigan, idi naadalyo dagiti nalinteg a panggep ni Jehova, natarusanyo nga adda ti naraniag a masakbayan. Naaddaan ngarud ita iti pudpudno a panggep ti biagyo—ti panagserbi iti pudno a Dios buyogen ti naragsak a namnama nga agbiag nga agnanayon iti paraiso a daga. Wen, ni Jesu-Kristo nga Ari “idalannanto [ti dakkel a bunggoy] kadagiti ubbog ti dandanum ti biag.”—Apocalipsis 7:17.
15. Kasano a nagunggonaan dagiti Saksi ni Jehova gapu iti panangsalimetmetda kadagiti pagalagadan ti Biblia maipapan iti napolitikaan ken moral a bambanag?
15 Maysa a nagsayaat a gunggona a tagtagiragsaken ti dakkel a bunggoy isu ti ayat, panagkaykaysa, ken panagtutunos dagiti adipen ni Jehova iti intero a lubong. Gapu ta maymaysa a naespirituan a taraon ti kankanentayo amin, sursurotentayo ti maymaysa a linteg ken prinsipio a masarakan iti Sao ti Dios. Dayta ti makagapu nga awan ti politikal ken nasional nga ideolohia a mamagsisina kadatayo. Maysa pay, salsalimetmetantayo ti nangato a moral a pagalagadan a kalikaguman ti Dios iti ilina. (1 Corinto 6:9-11) Imbes ngarud a mapasaran ti ringgor, kinaawan ti panagkaykaysa, ken imoralidad a nasaknap iti lubong, tagtagiragsaken ti ili ni Jehova ti makunkuna a naespirituan a paraiso. Imutektekanyo no kasano a nadeskribir daytoy iti Isaias 65:13, 14.
16. Iti laksid dagiti gagangay a parikut iti biag, ania ti namnamaen ti dakkel a bunggoy?
16 Saan a perpekto dagiti tattao nga adipen ni Jehova. Mapasaranda met dagiti parikut a gagangay iti daytoy a lubong, kas iti kinarigat iti biag wenno panagbalin nga inosente a biktima kadagiti panaggiginnubat dagiti nasion. Agsakit, agsagaba, ken matayda met. Ngem mangnamnamada nga iti baro a lubong, ti Dios “punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot.”—Apocalipsis 21:4.
17. Aniaman ti mapasamak kadatayo ita, ania a nagragsak a masakbayan ti agur-uray kadagidiay agdaydayaw iti pudno a Dios?
Aramid 24:15) Iti kasta, agtultuloy a matagiragsakyo ti naespirituan a piesta bayat ti Sangaribu a Tawen a Panagturay ni Kristo. Ad-adda a dumakkel ti panagayatyo iti Dios bayat a makitayo ti naindaklan a pannakatungpal dagiti panggepna. Ket dagiti pisikal a bendision nga ipaayto ni Jehova ti ad-adda a mangpadakkel iti panagayatyo kenkuana. (Isaias 25:6-9) Anian a nagragsak a masakbayan ti agur-uray iti ili ti Dios!
17 Uray no mapukawyo ti biagyo ita gapu iti kinalakay, sakit, aksidente, wenno pannakaidadanes, pagungarennakayto ni Jehova idiay Paraiso. (Panagrepaso
• Kadagiti ania a naisangsangayan a pasamak ti nanginaigan ti Biblia iti dakkel a bunggoy?
• No kayattayo ti agbalin a paset ti pinaraburan ti Dios a dakkel a bunggoy, ania ti masapul nga aramidentayo ita?
• Kasano kapateg kadakayo dagiti bendision a tagtagiragsaken ita ti dakkel a bunggoy ken ti tagiragsakendanto iti baro a lubong ti Dios?
[Salsaludsod]
[Ladawan iti panid 123]
Minilion a kameng ti dakkel a bunggoy ti sangsangkamaysa nga agdaydayaw iti pudno a Dios