Kapitulo Dise Siete

Ipakitayo ti Nadiosan a Debosion iti Pagtaengan

1. Ania ti epektona kadagiti agassawa no mayaplikar ti panangiwanwan ti Sao ti Dios?

NI Jehova ti Namunganay iti panagasawa, ket ti Saona ti kasayaatan a mangiwanwan kadagiti pamilia. Kas resulta ti panangyaplikar iti dayta a panangiwanwan, adu ti nagballigi a panagasawa. Nagsayaat ta dadduma nga agkabkabbalay ti natignay a mangirehistro iti panagasawada. Insardeng ti dadduma ti pannakikamalalada. Dagiti naranggas a lallaki a mangab-abuso kadagiti assawa ken annakda nasursuroda ti agbalin a naasi ken nadungngo.

2. Ania ti nairaman iti biag ti Nakristianuan a pamilia?

² Adu ti saklawen ti Nakristianuan a pamilia, kas koma iti panangmatmattayo iti kinapermanente ti panagasawa, no kasano a maitungpal dagiti annongentayo iti pamilia, ken no kasano a tratuen dagiti kameng ti pamiliatayo. (Efeso 5:33–6:4) Nupay nalabit ammotayo ti kuna ti Biblia maipapan iti biag ti pamilia, sabali met a banag ti panangyaplikar iti balakad ti Biblia. Awan kadatayo ti kayatna a maibilang kadagidiay kinondenar ni Jesus gapu iti panangyaleng-aleng kadagiti bilin ti Dios. Sibibiddut a patienda nga umdasen ti kinarelihiosoda. (Mateo 15:4-9) Ditay kayat ti agparang nga addaantayo iti nadiosan a debosion ngem ditay met mayugali dayta iti mismo a sangakabbalayantayo. Imbes ketdi, kayattayo  nga iparangarang ti pudno a nadiosan a debosion tapno ‘magun-od ti dakkel a gunggona.’​—1 Timoteo 5:4; 6:6; 2 Timoteo 3:5.

Kasano Kapaut ti Panagasawa?

3. (a) Ania ti mapaspasamak iti adu nga agassawa, ngem ania koma ti determinasiontayo? (b) Usarenyo ti Bibliayo a mangsungbat kadagiti saludsod a nakalista kalpasan daytoy a parapo.

³ Umad-adun ti agsinsina nga agassawa. Agdiborsio ti dadduma a nabayagen nga agdendenna ket makiasawada manen iti sabali. Saan metten a karkarna a madamag ti panagsina dagiti nasapa a nakiasawa idinto ta kakaskasarda pay laeng. Aniaman ti ar-aramiden ti dadduma, kayattayo nga ay-aywen ni Jehova. Usigentay ngarud dagiti sumaganad a saludsod ken teksto tapno makitatayo no ania ti kuna ti Sao ti Dios maipapan iti kinapermanente ti panagasawa.

No agasawa ti lalaki ken babai, kasano koma ti kapaut ti namnamaenda a panagtiponda? (Marcos 10:6-9; Roma 7:2, 3)

Ania ti kakaisuna a pakaigapuan ti diborsio a mangipalubos iti pannakiasawa manen nga anamongan ti Dios? (Mateo 5:31, 32; 19:3-9)

Ania ti panagrikna ni Jehova kadagiti diborsio a di anamongan ti Saona? (Malakias 2:13-16)

Ti panagsina kadi ti isingasing ti Biblia a solusion dagiti parikut ti agassawa? (1 Corinto 7:10-13)

Kadagiti ania a kasasaad a maipalubos ti panagsina? (Salmo 11:5; Lucas 4:8; 1 Timoteo 5:8)

4. Apay a naballigi ti dadduma nga agassawa?

⁴ Naballigi ti dadduma nga agassawa. Apay? Napateg a banag ti panaguray nga agmataenganda nga agkallaysa.  Napateg met ti panangbirok iti asawa a kapadpada ti interes ken nalaka a pakisaritaan. Ngem napatpateg ti panangbirok iti asawa nga agayat ken ni Jehova ken agpannuray iti Sao ti Dios no adda tamingenna a parikut. (Salmo 119:97, 104; 2 Timoteo 3:16, 17) Saan a panagsina wenno diborsio ti panunoten a dagus ti kasta a tao no adda dagiti rumsua a parikut. Saanna nga usaren ti pagkapuyan ti asawana tapno liklikanna dagiti responsabilidadna. Imbes ketdi, tamingenna ti parikut ket birokenna dagiti epektibo a solusion.

5. (a) Kasano a nainaig iti panagasawa ti kinasungdo ken ni Jehova? (b) Uray maipasango iti ibubusor, ania dagiti magunggona no salimetmetan dagiti pagalagadan ni Jehova?

⁵ Ipetteng ni Satanas a no agsagabatayo, panawantayo dagiti dalan ni Jehova. (Job 2:4, 5; Proverbio 27:11) Ngem kaaduan kadagiti Saksi ni Jehova a nagsagaba gapu iti di manamati nga assawada ti di nanglipat iti sinapataanda idi nagkasarda. Nagtultuloyda a nasungdo ken ni Jehova ken kadagiti bilinna. (Mateo 5:37) Dadduma a nagan-anus ti naragsakan idi nagserbi metten ken Jehova dagiti assawada​—uray kalpasan ti adu a tawen nga ibubusor! (1 Pedro 3:1, 2) No maipapan kadagiti Kristiano nga awan ti panagbalbaliw dagiti assawada wenno pinanawan ida dagiti assawada gapu iti panagserbida ken Jehova, ammoda a mabendisionandanto gapu iti panangipakitada iti nadiosan a debosion iti pagtaenganda.​—Salmo 55:22; 145:16.

Aramiden ti Tunggal Maysa ti Akemna

6. Tapno naballigi ti panagasawa, ania nga urnos ti nasken a maraem?

⁶ Siempre, saan laeng a basta panagtalinaed nga agassawa ti kasapulan tapno makuna a naballigi ti panagasawa. Ti maysa a napateg a makalikaguman iti tunggal maysa  isu ti panangraem iti urnos ni Jehova maipapan iti kinaulo. Mangyeg daytoy iti naurnos ken natalged a pagtaengan. Iti 1 Corinto 11:3, mabasatayo: “Ti ulo ti tunggal lalaki isu ti Kristo; ket ti ulo ti babai isu ti lalaki; ket ti ulo ti Kristo isu ti Dios.”

7. Kasano koma a maipakat ti kinaulo iti pamilia?

⁷ Napaliiwmo kadi no ania ti umuna a dinakamat dayta a bersikulo? Wen, tunggal lalaki adda Ulona, ni Kristo, a nasken a pagpasakupanna. Kaipapanan daytoy a ti asawa a lalaki nasken nga usarenna ti kinaulona iti wagas a mangyanninaw kadagiti galad ni Jesus. Agpasakup ni Kristo ken ni Jehova, ay-ayatenna unay ti kongregasion, ken ay-aywananna dayta. (1 Timoteo 3:15) “Inyawatna [pay] ti bagina a maipaay iti dayta.” Saan a natangsit ni Jesus. Imbes ketdi, nakonsiderar ken ‘naalumamay ti kababalinna ken napakumbaba ti pusona.’ ‘Makagin-awa dagiti kararua’ nga agpasakup iti kinaulona. No kastoy ti panangtrato ti lalaki iti pamiliana, ipakpakitana nga isu ket agpaspasakup ken Kristo. Kas resultana, makagunggona ken makapagin-awa iti Kristiano nga asawa a babai ti makitunos ken agpasakup iti kinaulo ti asawana.​—Efeso 5:25-33; Mateo 11:28, 29; Proverbio 31:10, 28.

8. (a) Apay a kasla awan epektona dagiti Nakristianuan a kababalin iti dadduma a pagtaengan? (b) Ania ti rumbeng nga aramidentayo no maipasango iti kasta a situasion?

⁸ Ngem tumaud dagiti parikut. Mabalin a nairuamen ti pamilia a di agpaidalan iti sabsabali sakbay pay nga adda asinoman kadakuada a mangirugi a mangyaplikar kadagiti prinsipio ti Biblia. Nalabit awan epektona ti nadayaw a pakaasi ken nadungngo a kababalin. Ammotayo a kuna ti Biblia nga iwaksitayo ti “unget ken pungtot ken panagririaw ken nabassawang a panagsasao.” (Efeso 4:31) Ngem ania ti rumbeng nga aramiden no adda dagidiay kasla di  makaaw-awat? Bueno, saan a tinulad ni Jesus dagidiay nalaing a mangpangta ken mangumsi, no di ket nagpannuray iti Amana. (1 Pedro 2:22, 23) Gapuna, no tumaud dagiti narikut a situasion iti pagtaengan, ipakita ti nadiosan a debosion babaen ti panangikararag iti tulong ni Jehova imbes a tuladen ti aramid ti lubong.​—Proverbio 3:5-7.

9. Imbes nga agpipinnabasol, ania ti nasursuro nga aramiden ti adu a Kristiano nga assawa a lallaki?

⁹ Saan a kanayon a nalaka ti agbalbaliw, ngem sigurado nga agkurri ti balakad ti Biblia no an-anusan ken siaanep nga iyaplikar dayta. Adu a lallaki ti nakapaneknek a simmayaat ti panagasawada idi nasursuroda no kasano a trinato ni Kristo ti kongregasion. Saan a perpekto a tattao ti mangbukel iti dayta a kongregasion. Kaskasdi, inayat ni Jesus, impasdekna ti umiso nga ulidan, ken inusarna ti Kasuratan tapno matulonganna a rumang-ay dayta a kongregasion. Intedna ti biagna maigapu iti kongregasion. (1 Pedro 2:21) Ti ulidan ni Jesus pinaregtana ti adu a Kristiano nga assawa a lallaki  nga agbalin a nasayaat nga ulo ti pamilia ken nangipaay iti naayat a tulong tapno mapasayaat ti panagasawa. Mangyeg daytoy iti nasaysayaat a resulta imbes nga agpinnabasol wenno saan nga agtungtungtong.

10. (a) Iti ania a wagas a ti asawa a lalaki wenno babai​—uray ti agkunkuna a Kristiano​—aramidenna a narigrigat ti kasasaad ti pamilia? (b) Ania ti mabalin nga aramiden tapno mapasayaat ti kasasaad?

¹⁰ Kasano no saan nga ikankano ti lalaki ti emosional a kasapulan ti pamiliana wenno saan a mangyurnos iti panagadal ti pamilia iti Biblia ken dadduma nga aktibidad? Wenno kasano no di makitunos ti babai ken di mangipakita iti nadiosan a panagpasakup? Dadduma ti makagun-od iti nasayaat a resulta no nadayaw a pagsasaritaan ti pamilia dagiti parikut. (Genesis 21:10-12; Proverbio 15:22) Ngem uray no saan nga agresulta dayta iti namnamaentayo, makatulong ti tunggal maysa kadatayo a mangpasayaat iti kasasaad ti pamilia no patanorentayo ti bunga ti espiritu ti Dios iti biagtayo, nga ipakitatayo ti naayat a konsiderasion iti dadduma a kameng ti pamilia. (Galacia 5:22, 23) Adda panagrang-ay no aramidentayo ti pasettayo, imbes nga ur-urayentayo nga aggaraw nga umuna ti dadduma. Iti kasta, ipakpakitatay nga iyap-aplikartayo ti nadiosan a debosion.​—Colosas 3:18-21.

Ti Paggubuayan Dagiti Sungbat

11, 12. Ania ti impaay ni Jehova a tumulong a mamagballigi iti biag ti pamilia?

¹¹ Adu ti pagpabalakadan ti tattao mainaig iti biag ti pamiliada. Ngem ammotayo a naglaon ti Sao ti Dios iti kasayaatan a pammagbaga, ket agyamantayo ta babaen ti makitkita nga organisasionna, tultulongannatayo ti Dios a mangyaplikar iti dayta. Ap-aprobetsarenyo met laeng  kadi a naan-anay dayta a tulong?​—Salmo 119:129, 130; Mikias 4:2.

¹² Malaksid iti itatabuno kadagiti gimong ti kongregasion, adda kadi regular a panagadal ti pamiliayo iti Biblia? Dagiti pamilia a mangar-aramid iti kasta ti makapagtitinnulong tapno makapagkaykaysada iti panagdayaw. Sumayaat ti biag ti pamiliada bayat nga iyap-aplikarda ti Sao ti Dios iti kasasaadda.​—Deuteronomio 11:18-21.

13. (a) No adda saludsodtayo mainaig iti biag ti pamilia, sadino ti masansan a pakasarakantayo iti kasapulan a tulong? (b) Ania koma ti mayanninaw iti amin a desisiontayo?

 ¹³ Nalabit adda saludsodyo mainaig iti pamilia. Kas pagarigan, komusta ti pananglapped iti panagsikog? Adda kadi maipalubos nga aborsion? No bassit laeng ti interes ti ubing kadagiti naespirituan a bambanag, kasano koma kadakkel ti makalikaguman kenkuana a pannakiraman iti panagdayaw ti pamilia? Adu ti kasta a saludsod a nailawlawag kadagiti literatura nga impablaak dagiti Saksi ni Jehova. Sursuruenyo nga usaren dagiti katulongan iti panagadal iti Biblia, agraman dagiti indese, tapno masarakan dagiti sungbat. No awan kadakayo ti publikasion a nadakamat iti indese, kitaenyo ti libraria ti Kingdom Hall. Wenno nalabit adda dagitoy a publikasion iti kompiuteryo. Mabalinyo met a pakisaritaan dagiti saludsodyo kadagiti nataengan a Kristiano a lallaki ken babbai. Ngem diyo koma kanayon a namnamaen a masungbatan iti wen wenno saan dagiti saludsodyo. Masansan a dakayo ti masapul nga agdesision, kas indibidual wenno kas agassawa. Kalpasanna, mangaramidkayo iti desision a mangyanninaw nga iyap-aplikaryo ti nadiosan a debosion saan laeng nga iti publiko no di pay ket iti pagtaengan.​—Roma 14:19; Efeso 5:10.

Panagrepaso

• Ania ti pakainaigan ti kinasungdo ken ni Jehova iti kinamatalek iti asawa?

• No marigatantayo gapu kadagiti parikut iti pamilia, ania ti tumulong kadatayo a mangaramid iti makaay-ayo iti Dios?

• Uray pay no adda pagkurangan ti dadduma a kapamilia, ania ti maaramidtayo a mangpasayaat iti kasasaad?

[Salsaludsod]

[Ladawan iti panid 155]

Nasken nga iyanninaw ti kinaulo ti lalaki dagiti galad ni Jesus

[Ladawan iti panid 157]

Makapagkaykaysa ti pamilia no adda regular a panagadalda iti Biblia