Kapitulo Dos

Itan-okyo ni Jehova kas ti Maymaysa a Pudno a Dios

1. Asino ti maymaysa a pudno a Dios?

KUNA ti Biblia a nupay adu ti maaw-awagan a dios, “kinaagpaysuanna kadatayo adda maymaysa a Dios nga Ama.” (1 Corinto 8:5, 6) Ti “maymaysa a Dios” isu ni Jehova, ti Namarsua iti amin a banag. (Deuteronomio 6:4; Apocalipsis 4:11) Isu daydiay tinukoy ni Jesus a kas “Diosko ken Diosyo.” (Juan 20:17) Umanamong ni Jesus ken Moises, a nagkuna idi: “Ni Jehova ti pudno a Dios; awanen ti sabali malaksid kenkuana.” (Deuteronomio 4:35) Natantan-ok nga amang ni Jehova ngem iti aniaman a banag a pagdayawan, a kas kadagiti idolo, madidios a tattao, wenno ti kabusorna a ni Satanas a Diablo, “ti dios daytoy a sistema ti bambanag.” (2 Corinto 4:3, 4) Maisupadi kadagitoy, ni Jehova “ti maymaysa a pudno a Dios,” kas panangawag ni Jesus kenkuana.​—Juan 17:3.

2. Bayat a gunggun-odentayo ti pannakaammo maipapan iti Dios, ania koma ti epektona iti biagtayo?

² Dagiti manangapresiar a tattao umadanida iti Dios no maadalda dagiti makaay-ayo a galadna, agraman dagiti naaramidan ken aramidenna agpaay kadatayo. Bayat a dumakdakkel ti panagayatda ken Jehova, matignayda a mangitan-ok kenkuana. Kasano? Ti maysa a pamay-an ket babaen ti panangipakaammo iti sabsabali ti maipapan kenkuana. “Buyogen iti ngiwat mangaramid ti maysa iti publiko a panangideklara maipaay iti pannakaisalakan,” kuna ti Roma 10:10. Ti maysa pay a pamay-an isu ti panangtulad kenkuana iti sao ken aramid. “Agbalinkayo a tumutulad iti Dios,  kas annak a dungdungnguen,” kuna ti Efeso 5:1. Masapul ngarud a maam-ammotayo a naimbag ni Jehova tapno ad-adda a matuladtayo dagiti galadna.

3. Ania dagiti kangrunaan a galad ti Dios?

³ Iti intero a Biblia, namin-adu a nadakamat dagiti naisangsangayan a galad ti Dios. Ti uppat a kangrunaan a galadna isu ti sirib, kinahustisia, pannakabalin, ken ayat. “Kenkuana adda kinasirib.” (Job 12:13) “Amin a daldalanna kinahustisia.” (Deuteronomio 32:4) ‘Nakired iti pannakabalinna.’ (Isaias 40:26) “Ti Dios ket ayat.” (1 Juan 4:8) Ngem ania kadagiti uppat a kangrunaan a galad ti Dios ti naisangsangayan unay, ti mangipamatmat no ania a klase a Dios ni Jehova?

“Ti Dios Ket Ayat”

4. Ania kadagiti galad ti Dios ti nangtignay kenkuana a mangparsua iti uniberso ken iti amin a sibibiag a banag?

⁴ Usigenyo no ania ti nangtignay ken Jehova a mangparsua iti uniberso ken kadagiti nasaririt nga espiritu ken tattao. Ti kadi sirib wenno ti pannakabalinna? Saan. Nupay inusar ti Dios dagita, saan a dagita ti nangtignay kenkuana. Ken saan a kinalikaguman ti kinahustisiana nga iranudna kadagiti sabsabali ti sagut a biag. Imbes ketdi, ti dakkel nga ayatna ti makagapu nga inranud ti Dios kadagiti sabsabali ti rag-o a tagtagiragsaken ti maysa a nasaririt a persona. Ti ayat ti makagapu no apay a pinanggepna nga agbiag koma nga agnanayon ti sangatauan iti Paraiso. (Genesis 1:28; 2:15) Gapu iti ayatna, inyurnosna a maikkat ti lunod iti sangatauan a pinataud ti panagbasol ni Adan.

5. Sigun iti Biblia, ania a galad ti personipikasion ni Jehova, ken apay?

⁵ No kasta, ti ayat ti naisangsangayan unay kadagiti amin a galad ti Dios. Dayta ti pakabuklan ti kinasiasinona. Nupay napateg ti sirib, kinahustisia, ken pannakabalinna, nikaanoman a kinuna ti Biblia a ni Jehova ket aniaman kadagitoy, idinto ta kunaenna a ti Dios ket ayat. Wen, ni Jehova ti personipikasion  ti ayat. Daytoy ti ayat nga iturturong ti prinsipio, saan a ti emosion. Ti ayat ti Dios ket iwanwanwan dagiti pagalagadan ti kinapudno ken kinalinteg. Dayta ti katan-okan a kita ti ayat, kas iparparangarang a mismo ni Jehova a Dios. Ti kasta nga ayat ket ebkas ti naan-anay a kinaparabur ken kanayon nga adda kakuyogna a makita a tignay.

6. Kasano a posible a matuladtay ti Dios, nupay isu ket natantan-ok ngem datayo?

⁶ Daytoy nagsayaat a galad nga ayat ti tumulong kadatayo a mangtulad iti kasta a Dios. Gapu ta nanumo, imperpekto, ken kanayon nga agkamalitayo, nalabit ipagaruptay a ditay pulos maaramidan dayta. Ngem adtoy ti maysa pay a pagarigan ti naindaklan nga ayat ni Jehova: Ammona dagiti limitasiontayo ket dina kalikaguman ti kinaperpekto kadatayo. Ammona nga adu ti pagkurangantayo ita. (Salmo 51:5) Dayta ti makagapu no apay a kinuna ti Salmo 130:3, 4: “No dagiti biddut koma ti siputam, O Jah, O Jehova, siasino ti makapagtakder? Ta adda kenka ti pudno a panangpakawan.” Wen, ni Jehova ket “maysa a Dios a naasi ken managparabur, nabannayat nga agunget ken naruay iti naayat a kinamanangngaasi.” (Exodo 34:6) “Sika, O Jehova, naimbagka ken sisasagana a mamakawan.” (Salmo 86:5) Anian a makaliwliwa! Anian a makapabang-ar ti agserbi iti daytoy nakaskasdaaw a Dios ken riknaen ti naayat, naasi a panangaywanna!

7. Kasano a ti ayat ni Jehova naiparangarang kadagiti parsuana?

⁷ Iparangarang met dagiti pinarsua ni Jehova ti ayatna. Panunotenyo ti nakaad-adu nga agkakaimbag a banag nga impaay ni Jehova a pagragsakantayo, kas kadagiti nangayed a bantay, kabakiran, dan-aw, ken taaw. Intedna ti nadumaduma a kita ti taraon a makaay-ayo iti panagramantayo ken mangtaginayon iti biagtayo. Nagadu ti impaayna nga agkakapintas ken agkakabanglo a sabong agraman dagiti nakaskasdaaw nga animal. Nupay saanna koma a masapul nga aramiden, pinarsuana dagiti bambanag a mangted ragsak  kadagiti tattao. Pudno, ditay naan-anay a matagiragsak dagiti parsuana gapu ta agbibiagtayo kas imperpekto a tattao iti daytoy dakes a lubong. (Roma 8:22) Ngem panunotenyo laengen ti aramidento ni Jehova para kadatayo iti Paraiso! Impanamnama ti salmista: “Uk-ukradem ta imam ken pempennekem ti [umiso] tarigagay ti tunggal sibibiag a banag.”​—Salmo 145:16.

8. Ania ti kasayaatan nga ebkas ti ayat ni Jehova kadatayo?

⁸ Ania ti kasayaatan nga ebkas ti ayat ni Jehova iti sangatauan? Kuna ti Biblia: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.” (Juan 3:16) Inaramid ngata ni Jehova daytoy gapu iti kinaimbag ti tao? Sumungbat ti Roma 5:8: “Ti Dios irekomendana ti bukodna nga ayat kadatayo ta, bayat a managbasoltayo pay laeng idi, ni Kristo natay a maipaay kadatayo.” Wen, imbaon ti Dios ditoy daga ti perpekto nga Anakna tapno itedna ti biagna kas pangsubbot a daton tapno mawayawayaantayo iti pannakailunod iti basol ken ipapatay. (Mateo 20:28) Daytoy ti nangted iti gundaway a makagun-od iti biag nga agnanayon dagiti tattao nga agayat iti Dios. Agyamantayo ta ay-ayaten ti Dios ti amin a sidadaan nga agtulnog iti pagayatanna, ta kuna ti Biblia: “Ti Dios saan a mangidumduma, no di ket iti tunggal nasion anamonganna ti tao nga agbuteng kenkuana ken agaramid iti kinalinteg.”​—Aramid 10:34, 35.

9. Ania koma ti epektona kadatayo ti panangited ni Jehova iti Anakna a pangsubbot kadatayo?

⁹ Gapu ta impaay ni Jehova ti Anakna a pangsubbot kadatayo, a nangilukat iti dalan nga agturong iti biag nga agnanayon, ania koma ti epekto dayta iti panangusartayo iti biagtayo ita? Daytoy koma ti mangpauneg iti panagayattayo iti pudno a Dios, ni Jehova. Matignaytayo met koma nga  umimdeng ken Jesus, a mangibagi iti Dios. “[Ni Jesus] natay maipaay iti isuamin tapno dagidiay nga agbiag saanda koman nga agbiag nga agpaay iti bagbagida, no di ket agpaay kenkuana a natay maipaay kadakuada.” (2 Corinto 5:15) Anian a pribilehio ti sumurot iti addang ni Jesus, ta tinuladna a naimbag ti ayat ken kinamanangngaasi ni Jehova! Naipamatmat daytoy iti kinuna ni Jesus kadagiti naemma: “Umaykayo kaniak, dakayo amin a mabambannogan ken madagdagsenan, ket pagin-awaenkayto. Ibaklayyo ti sangolko ket agsursurokayo kaniak, ta naalumamay ti kababalinko ken napakumbaba ti pusok, ket makasarakkayto ti gin-awa a maipaay kadagiti kararuayo. Ta ti sangolko nalanay ken ti awitko nalag-an.”​—Mateo 11:28-30.

Panangipakita iti Ayat Kadagiti Sabsabali

10. Ania dagiti wagas a maipakitatayo ti panagayat kadagiti pada a Kristiano?

¹⁰ Kasanotay a maipakita kadagiti pada a Kristiano ti klase ti panagayat kadatayo ni Jehova ken ni Jesus? Imutektekanyo ti adu a wagas a maipakitatayo daytoy: “Ti ayat mabayag-panagituredna ken manangngaasi. Ti ayat saan a managimon, saan nga agpangas, saan nga agtangsit, saan a naalas ti panagtigtignayna, saanna a sapulen dagiti bukodna a pagimbagan, saan a magargari nga agpungtot. Saanna nga ing-ingpen ti pannakadangran. Saanna a pagrag-oan ti kinakillo, no di ket makipagrag-o iti kinapudno. Anusanna ti amin a bambanag, patienna ti amin a bambanag, inanamaenna ti amin a bambanag, ibturanna ti amin a bambanag. Ti ayat saan a pulos aggibus.”​—1 Corinto 13:4-8; 1 Juan 3:14-18; 4:7-12.

11. Siasino pay dagiti rumbeng nga ayatentayo, ken kasano?

¹¹ Siasinoda pay ti rumbeng nga ayatentayo, ken kasano? Kinuna ni Jesus: “Inkayo ngarud ket mangaramidkayo iti ad-adalan kadagiti tattao iti amin a nasion, a bautisaranyo ida iti nagan ti Ama ken ti Anak ken ti nasantuan nga espiritu,  nga isuroyo kadakuada a tungpalenda ti amin a bambanag nga imbilinko kadakayo.” (Mateo 28:19, 20) Ramanen daytoy ti panangiranud kadagidiay saantayo pay a pada a Kristiano ti maipapan iti naimbag a damag ti um-umayen a paraiso iti baro a lubong ti Dios. Nalawag nga impakita ni Jesus a saantay koma nga ayaten dagidiay kapammatiantayo laeng, ta kinunana: “No ayatenyo [laeng] dagidiay mangay-ayat kadakayo, ania a gunggona ti adda kadakayo? Saan aya nga ar-aramiden met dagiti agsingsingir iti buis ti isu met laeng a banag? Ket no ti kakabsatyo laeng ti kablaawanyo, ania a naisangsangayan a banag ti ar-aramidenyo? Saan aya nga ar-aramiden met dagiti tattao iti nasnasion ti isu met laeng a banag?”​—Mateo 5:46, 47; 24:14; Galacia 6:10.

‘Magna iti Nagan ni Jehova’

12. Apay nga iti Dios laeng a maikanatad ti nagan a Jehova?

¹² Ti maysa pay a napateg nga aspeto ti panangitan-ok iti pudno a Dios isu ti panangammo, panangusar, ken panangisuro kadagiti sabsabali ti naisangsangayan a naganna a Jehova. Kastoy ti naimpusuan a tarigagay nga inyebkas ti salmista: “Tapno maammuan koma dagiti tattao a sika, nga agnagan Jehova, sika laeng ti Kangatuan iti intero a daga.” (Salmo 83:18) “Pagbalinenna” ti kaipapanan ti nagan a Jehova. Isu ti Naindaklan a Managpanggep, a kanayon a mangtungpal kadagiti panggepna. Ket ti laeng maymaysa a pudno a Dios ti addaan iti kalintegan a mangaramat iti dayta a nagan, agsipud ta pulos a di masierto ti tattao no agballigi dagiti panagreggetda. (Santiago 4:13, 14) Ni Jehova laeng ti makaibaga a “sigurado nga agballiginto” ti saona iti nangibaonanna iti dayta. (Isaias 55:11) Adu ti naragsakan idi damo a makitada ti nagan ti Dios iti Bibliada ken maammuanda ti kaipapananna. (Exodo 6:3) Ngem sada la magunggonaan iti daytoy a pannakaammo no ‘magnada iti nagan ni Jehova . . . iti agnanayon.’​—Mikias 4:5.

13. Ania ti ramanen ti panangammo iti nagan ni Jehova ken ti pannagna iti naganna?

 ¹³ No maipapan iti nagan ti Dios, kuna ti Salmo 9:10: “Agtalekto kenka dagidiay makaam-ammo iti naganmo.” Saan a basta panangammo daytoy iti nagan a Jehova, ket automatiko nga agtalektayo kenkuana. Ti panangammo iti nagan ti Dios kaipapananna ti panangtarus ken panangapresiar iti kinadios ni Jehova, panangraem iti autoridadna, panagtulnog kadagiti bilinna, panagtalek kenkuana iti amin a banag. (Proverbio 3:5, 6) Maitunos iti dayta, ti pannagna iti nagan ni Jehova ipasimudaagna ti panagbalin a dedikado ken panangibagi kenkuana kas maysa kadagiti agdaydayaw kenkuana, nga usarentayo ti biagtayo maitunos iti pagayatan ti Dios. (Lucas 10:27) Ar-aramidenyo kadi dayta?

14. No kayattay ti agserbi nga agnanayon ken Jehova, ania pay ti nasken malaksid iti pannakarikna iti obligasion?

¹⁴ No kayattayo ti agserbi nga agnanayon ken Jehova, saan ngarud koma a maigapu laeng iti obligasion nga agserbitay kenkuana. Indagadag ni apostol Pablo ken Timoteo, a nagserbi ken Jehova iti adu a tawen: “Sanayem ta bagim buyogen ti nadiosan a debosion kas kalatmo.” (1 Timoteo 4:7) Ti debosion ket aggubuay iti puso a napnuan iti apresasion iti persona a nakaiturongan ti debosion. Ti “nadiosan a debosion” ket ipasimudaagna ti personal ken napalaus a panagraem ken ni Jehova. Iparangarangna ti naayat a kinasinged kenkuana gapu iti nangato a respeto kenkuana ken kadagiti dalanna. Daytoy ti mangtignay kadatayo tapno tarigagayantayo ti panangitandudo ti amin a tattao iti naganna. Masapul a patanorentayo ti nadiosan a debosion iti biagtayo no kayattay ti magna iti nagan ni Jehova, ti maymaysa a pudno a Dios, iti agnanayon.​—Salmo 37:4; 2 Pedro 3:11.

15. Kasanotay a maipamaysa ti debosiontayo iti Dios?

¹⁵ Tapno makaay-ayo ti panagserbitayo iti Dios, masapul a di mabingay ti panagdayawtayo kenkuana, agsipud ta isu  ket “Dios a mangkalikagum iti naipamaysa a debosion.” (Exodo 20:5) Ditay mabalin nga ayaten nga agpadpada ti Dios ken ti dakes a lubong a ni Satanas ti diosna. (Santiago 4:4; 1 Juan 2:15-17) Ammo ni Jehova no ania a klase a tao ti pagbalbalinantayo. (Jeremias 17:10) No pudno nga ay-ayatentayo ti kinalinteg, makitana dayta ket tulongannatayo a mangandur kadagiti inaldaw a pakasuotantayo. Babaen ti nabileg a nasantuan nga espirituna, tulongannatayo a mangdaer kadagiti kinadakes nga agraraira iti daytoy a lubong. (2 Corinto 4:7) Tulongannatay met a mangsalimetmet iti natalged a namnamatayo a biag nga agnanayon iti paraiso a daga. Anian a nakaskasdaaw a namnama dayta! Masapul a tagipatgentay unay dayta ken sidadaan nga agserbi iti pudno a Dios, ni Jehova, ti mamagbalin a posible dayta a namnama.

16. Ania ti kayatyo nga aramiden a kadua ti minilion a tattao?

¹⁶ Minilionen a tattao ditoy daga ti siraragsak a nangakseptar iti awis ti salmista a nagsurat: “O itan-okyo ni Jehova a maibuyog kaniak, ket itandudotayo a sangsangkamaysa ti naganna.” (Salmo 34:3) Aw-awisennakayo ni Jehova a makiraman iti umad-adu nga umariwekwek iti amin a nasion a mangar-aramid iti daytoy.

Panagrepaso

• Ania a klase a persona ni Jehova? Ania ti pagsayaatanna kadatayo no matarusantayo a naimbag dagiti galadna?

• Kasanotay a matulongan ti dadduma a tattao tapno maammuanda ti kinapudno maipapan iti Dios?

• Ania ti ramanen ti panangammo iti nagan ni Jehova ken ti pannagna iti naganna?

[Salsaludsod]

 [Ladawan iti panid 14]

Gapu iti dakkel nga ayatna, ‘ukraden [ni Jehova] ti imana ken pennekenna ti tarigagay ti tunggal sibibiag a banag’