Kapitulo Onse

‘Itultuloyyo a Sapulen nga Umuna ti Pagarian’

1. (a) Apay nga indagadag ni Jesus kadagiti agdengdengngeg kenkuana nga iyun-unada ti Pagarian? (b) Ania a saludsod ti rumbeng nga iyimtuodtay iti bagitayo?

NASUROK a 1,900 a tawenen ti napalabas, iti palawagna idiay Galilea, indagadag ni Jesus kadagiti agdengdengngeg kenkuana: “Itultuloyyo, ngarud, a sapulen nga umuna ti pagarian ken ti kinalinteg [ti Dios].” Ngem apay a naganat dayta? Saan aya a sinigsiglo pay idi ti lumabas sakbay nga agturay ni Kristo iti Pagarian? Wen, ngem ti Mesianiko a Pagarian ti pamay-an tapno alangonen ni Jehova ti kinasoberanona ken tapno tungpalenna ti naindaklan a panggepna ditoy daga. Ti Pagarian ti ipangpangruna ti asinoman a pudpudno a mangapresiar iti kinapateg dagita a banag. No pudno dayta idi umuna a siglo, ad-adda pay ita ta naitronon ni Kristo kas Ari! Daytoy ngarud ti saludsod: Ipakita kadi ti panagbiagko a sapsapulek nga umuna ti Pagarian ti Dios?​—Mateo 6:33.

2. Aniada a bambanag ti ikagkagumaan a gun-oden ti kaaduan a tattao?

² Kinapudnona, minilion ita a tattao iti intero a lubong ti mangyun-una iti Pagarian. Ipakpakitada a supsuportaranda ti panagturay ti Pagarian babaen ti panangipamaysada iti biagda iti panagaramid iti pagayatan ni Jehova, ta indedikarda kenkuana ti biagda. Iti sabali a bangir, kaaduan iti sangatauan ti agporporsegi kadagiti awan kaes-eskanna a banag. Kuarta ti sapsapulen dagiti tattao agraman dagiti sanikua ken ragragsak nga itden ti kuarta. Wenno ikabilda ti amin a kabaelanda a mangidur-as kadagiti karerada.  Ipakita ti panagbiagda nga okupadoda iti bagbagida, kadagiti material a banag, ken iti ragragsak. Maikadua laeng ti Dios iti biagda, no mamatida man kenkuana.​—Mateo 6:31, 32.

3. (a) Ania a kita ti gameng ti indagadag ni Jesus a sapulen dagiti adalanna, ken apay? (b) Apay a di rumbeng a maringgoran unay kadagiti material a banag?

³ Ngem kadagiti adalanna, kastoy ti imbalakad ni Jesus: “Isardengyo ti agurnong maipaay iti bagbagiyo kadagiti gameng iti daga,” yantangay awan kadagitoy a sanikua ti agpaut iti agnanayon. “Imbes ketdi,” kinunana, “agurnongkayo maipaay iti bagbagiyo kadagiti gameng idiay langit,” babaen ti panagserbi ken ni Jehova. Indagadag ni Jesus kadagiti pasurotna a pagtalinaedenda a “simple” ti matada babaen ti panangipamaysada iti atension ken pigsada nga agaramid iti pagayatan ti Dios. “Saanyo a mabalin ti agpaadipen iti Dios ken iti Kinabaknang,” kinunana kadakuada. Ngem dagiti ngay material a kasapulan​—kas iti taraon, kawes, ken pagtaengan? “Isardengyo ti maringgoran,” imbalakad ni Jesus. Inturongna ti atensionda kadagiti tumatayab​—taraonan ida ti Dios. Indagadag ni Jesus kadagiti pasurotna nga agsursuroda kadagiti sabong​—kawesan ida ti Dios. Saan aya a napatpateg nga amang dagiti nasaririt a tattao nga agserserbi ken ni Jehova? Kinuna ni Jesus: “Itultuloyyo, ngarud, a sapulen nga umuna ti pagarian ken ti kinalintegna, ket amin dagitoy sabali pay a [kasapulan a] bambanag mainayonto kadakayo.” (Mateo 6:19-34) Ipakita kadi dagiti aramidyo a patienyo dayta?

Diyo Palubosan a Malpes ti Kinapudno Maipapan iti Pagarian

4. No nalabes ti pannakaseknan ti tao kadagiti material a bambanag, ania ti mabalin a pagbanaganna?

⁴ Maiparbeng laeng a pakaseknan ti umdas a material a kasapulan para iti bagi ken iti pamilia. Ngem no nalabes ti  pannakaseknan ti maysa a tao kadagiti material a banag, mabalin a napeggad dagiti resultana. Uray kunana a patienna ti Pagarian, no ipangpangruna ti pusona ti sabali a bambanag, malpes ti kinapudno ti Pagarian. (Mateo 13:18-22) Kas pagarigan, iti naminsan maysa a nabaknang nga agkabannuag nga agturay ti nangyimtuod ken Jesus: “Ania ti masapul nga aramidek tapno agtawidak iti agnanayon a biag?” Nagbiag a natakneng ken nasayaat ti panangtratona iti sabsabali, ngem nalabes ti pannakaseknanna kadagiti material a banag. Dina kayat a mapukawna dagitoy tapno agbalin a pasurot ni Kristo. Pinalabasna ngarud ti gundaway a makikadua koma ken Kristo iti nailangitan a Pagarian. Kinuna ni Jesus iti dayta nga okasion: “Anian a nakarigrigatto a banag kadagidiay addaan kuarta ti sumrek iti pagarian ti Dios!”​—Marcos 10:17-23.

5. (a) Pinaregta ni Pablo a makontento koma ni Timoteo kadagiti ania banag, ken apay? (b) Kasano nga usaren ni Satanas ti “ayat iti kuarta” kas makadadael a silo?

⁵ Sumagmamano a tawen kalpasanna, nagsurat ni apostol Pablo ken ni Timoteo, nga adda idi idiay Efeso, maysa a narang-ay a sentro ti komersio. Pinalagipan ni Pablo: “Ta awan ti inyegtayo iti lubong, ket saantay met a mabalin ti mangitugot iti aniaman a banag. Gapuna, no adda pagtaraon ken pagkawestayo, mapnektayon kadagitoy a banag.” Maiparbeng ti agtrabaho tapno adda ‘pagtaraon ken pagkawes’ ti bagi ken ti pamilia. Ngem imballaag ni Pablo: “Dagidiay determinado a bumaknang matnagda iti sulisog ken iti silo ken iti adu a minamaag ken makapasakit a tartarigagay, a mangipalned kadagiti tattao iti pannakadadael ken pannakarba.” Nasikap ni Satanas. No damo, mabalin nga ammuyotenna ti maysa a tao kadagiti babassit a banag. Mabalin a mapasarunuan daytoy kadagiti nakarkaro a sulisog, nalabit iyaasenso iti saad wenno trabaho a dakdakkel ti sueldo ngem alaenna ti tiempo a dati nga agpaay kadagiti naespirituan a banag. No ditay agannad, “ti ayat iti kuarta”  leppesenna ti napatpateg nga interes ti Pagarian. Kastoy ti imbaga ni Pablo: “Babaen ti panangragpat iti daytoy nga ayat nayaw-awan ti sumagmamano manipud iti pammati ket sinalputda ti intero a bagbagida iti adu nga ut-ot.”​—1 Timoteo 6:7-10.

6. (a) Tapno saan a masiluan iti materialismo, ania ti nasken nga aramidentayo? (b) Iti laksid ti agdama a kasasaad ti ekonomia ti lubong, iti ania a makapagtalektayo?

⁶ Gapu ta napudno ti panagayatna iti Kristiano a kabsatna, indagadag ni Pablo ken ni Timoteo: “Umadayoka kadagitoy a banag” ken, “Makirupakka iti nasayaat a dangadang iti pammati.” (1 Timoteo 6:11, 12) Nasken ti napasnek a panagregget no kayattay ti di mayayus iti materialistiko a panagbiag ti lubong iti aglawlawtayo. Ngem dinatay a pulos baybay-an ni Jehova no agporsegitayo maitunos iti pammatitayo. Iti laksid dagiti nangina a gagatangen ken nasaknap a kinaawan ti panggedan, siguraduenna nga adda kadatayo dagiti pudno a kasapulantayo. Insurat ni Pablo: “Ti wagas ti panagbiagyo siwayawaya koma iti panagayat iti kuarta, bayat a mapnekkayo iti agdama a bambanag. Ta kinuna [ti Dios]: ‘Saankanto a pulos panawan ket saankanto a pulos baybay-an.’ Iti kasta mabalintayo ti agtalged ket sawentayo: ‘Ni Jehova ti katulongak; saanakto nga agbuteng. Ania ti maaramidan kaniak ti tao?’” (Hebreo 13:5, 6) Ken insurat ni Ari David: “Maysaak idi nga agtutubo, kasta met a limmakayakon, ket kaskasdi a saanak a nakakita iti asinoman a nalinteg a naan-anay a nabaybay-an, wenno uray dagiti putotna nga agsapsapul iti tinapay.”​—Salmo 37:25.

Nangisaad iti Pagwadan Dagiti Nagkauna nga Adalan

7. Ania ti imbilin ni Jesus kadagiti adalanna mainaig iti panangasaba, ket apay a maikanatad dagitoy?

⁷ Kalpasan a sinanay a naimbag ni Jesus dagiti apostolna, imbaonna ida idiay Israel a mangikasaba iti naimbag a  damag ket ipakaammoda: “Ti pagarian ti langlangit asidegen.” Anian a makapagagar daydi a mensahe! Adda iti tengngada ni Jesu-Kristo, ti Mesianiko nga Ari. Gapu ta impamaysa dagiti apostol ti biagda iti panagserbi iti Dios, indagadag ni Jesus nga agtalekda nga aywanan ida ti Dios. Isu a kinunana: “Dikay mangitugot iti aniaman a maipaay iti panagdaliasat, uray sarukod wenno supot ti taraon, wenno uray tinapay wenno pirak a kuarta; saankayo met a maaddaan iti dua a makin-uneg a kawes. Ngem sadinoman a serkanyo a pagtaengan, agyankayo sadiay ket sadiay ti pumanawanyo.” (Mateo 10:5-10; Lucas 9:1-6) Sinigurado ni Jehova nga ipaay dagiti padada nga Israelita dagiti kasapulanda, yantangay managpadagus dagitoy kadagiti ganggannaet.

8. (a) Idi umadanin ti ipapatayna, apay a nangted ni Jesus kadagiti baro a bilin mainaig iti panangasaba? (b) Ania ti maipangpangruna latta koma iti biag dagiti pasurot ni Jesus?

⁸ Idi agangay, sakbay unay ti ipapatayna, pinakdaaran ni Jesus dagiti apostolna nga agtrabahodanto iti nagbalbaliw a sirkumstansia. Kas resulta ti opisial a pannakaiparit ti trabahoda, mabalin a saanen a nalaka ti panangpadagus kadakuada idiay Israel. Sa di agbayag, awitenda ti mensahe ti Pagarian kadagiti pagilian a Gentil. Mangitugotdan iti “supot ti kuarta” ken “supot ti taraon.” Kaskasdi, nasken nga itultuloyda a biroken nga umuna ti Pagarian ni Jehova ken ti kinalintegna, nga agtalekda a bendisionan ti Dios ti panagreggetda a gumun-od kadagiti kasapulanda a taraon ken kawes.​—Lucas 22:35-37.

9. Kasano nga impangpangruna ni Pablo ti Pagarian iti biagna bayat a tinaripatona dagiti material a kasapulanna, ket ania ti imbalakadna maipapan iti daytoy a banag?

⁹ Ni apostol Pablo ti maysa a nagsayaat nga ulidan a nangyaplikar iti balakad ni Jesus. Insentro ni Pablo ti biagna iti panagministerio. (Aramid 20:24, 25) No mapan idi mangasaba  iti maysa a lugar, isu ti makakaammo kadagiti material a kasapulanna, nga uray la nagar-aramid kadagiti tolda. Saan a nagpannuray kadagiti sabsabali agpaay kadagiti kasapulanna. (Aramid 18:1-4; 1 Tesalonica 2:9) Kaskasdi, siyayaman nga inakseptarna ti kinamanagpadagus ken sagsagut no dayta ti wagas ti panangyebkas ti dadduma iti ayatda. (Aramid 16:15, 34; Filipos 4:15-17) Pinaregta ni Pablo dagiti Kristiano nga agbalinda a balanse kadagiti nadumaduma a responsabilidadda, a dida liwayan ti obligasionda iti pamilia gapu iti panangasaba. Binalakadanna ida nga agtrabaho, ayatenda ti pamiliada, ken tumulong iti sabsabali. (Efeso 4:28; 2 Tesalonica 3:7-12) Indagadagna kadakuada nga agtalekda iti Dios, saan a kadagiti material a sanikua, ket usarenda ti biagda iti pamay-an a mangyanninaw a talaga a naawatanda no ania dagiti napatpateg a banag. Maitunos kadagiti sursuro ni Jesus, kaipapanan dayta ti panagbirok nga umuna iti Pagarian ti Dios ken iti kinalintegna.​—Filipos 1:9-11.

Ipangpangrunayo ti Pagarian iti Biagyo

10. Ania ti kaipapanan ti panangsapul nga umuna iti Pagarian?

¹⁰ Kasano kaadu ti tiempo a busbusbosentayo a mangipakaammo iti naimbag a damag ti Pagarian kadagiti sabsabali? No maminsan, agpannuray dayta iti kasasaadtayo ken iti kauneg ti panangapresiartayo. Laglagipenyo a di kinuna ni Jesus, ‘Sapulenyo ti Pagarian no awanen ti sabali nga aramidenyo.’ Gapu ta ammona ti kinapateg ti Pagarian, inyebkasna ti pagayatan ni Amana, a kunkunana: “Agtultuloy a sapulenyo ti pagarianna.” (Lucas 12:31) Kaaduan kadatayo ti masapul a mangged tapno maipaay dagiti kasapulantayo ken ti pamiliatayo. Ngem no adda pammatitayo, nakasentro ti biagtayo iti trabaho nga inted ti Dios mainaig iti Pagarian. Maigiddato iti dayta, itungpaltay dagiti responsabilidadtayo iti pamilia.​—1 Timoteo 5:8.

11. (a) Kasano nga inyilustrar ni Jesus a saan nga agpapada ti maaramidan ti tunggal maysa no maipapan iti panangipakaammo iti mensahe ti Pagarian? (b) Ania dagiti mangapektar iti maaramidan ti maysa?

 ¹¹ Dadduma kadatayo ti ad-adu ti tiempoda a mangikasaba iti naimbag a damag ti Pagarian. Ngem iti pangngarigna maipapan iti nadumaduma a kita ti daga, impakita ni Jesus a mangpataud iti bunga ti amin nga addaan iti puso a mayarig iti nadam-eg a daga. Kasano kaadu ti bungada? Nadumaduma ti kasasaad ti tunggal indibidual. Makaapektar ti edad, salun-at, ken responsabilidad iti pamilia. Ngem no adda pudpudno a panangipateg iti naimbag a damag, adu ti magapuanan.​—Mateo 13:23.

12. Ania a nasayaat a naespirituan a kalat ti nangnangruna nga utoben koma dagiti agtutubo?

¹² Nasayaat ti mangipasdek kadagiti kalat a tumulong kadatayo a maaddaan iti dakdakkel a pannakiraman iti ministerio ti Pagarian. Utoben koma a naimbag dagiti agtutubo ti nagsayaat nga ulidan ti naregta nga agtutubo a Kristiano a ni Timoteo. (Filipos 2:19-22) Adda pay kadi nasaysayaat ngem iti iseserrekda iti amin-tiempo a ministerio kalpasan a maturposda ti panageskuelada? Magunggonaan  met dagiti nataengan no mangipasdekda kadagiti nasayaat a naespirituan a kalat.

13. (a) Siasino ti mangikeddeng iti personal a maaramidantayo a panagserbi iti Pagarian? (b) No pudno a sapsapulentay nga umuna ti Pagarian, ania ti pampaneknekantayo?

¹³ Imbes a babalawentayo dagidiay ipagaruptay nga ad-adu koma ti maaramidanda, tignayennatay koma ti pammati a mangasikaso iti personal a panagrang-aytayo tapno ad-adda a makapagserbitayo iti Dios sigun iti ipalubos ti kasasaadtayo. (Roma 14:10-12; Galacia 6:4, 5) Kas ipakita ti napasamak ken ni Job, ipapati ni Satanas a ti kangrunaan a pakaseknantayo isu dagiti material a sanikua, kinasaliwanwan, ken personal a pagimbagantayo ket managimbubukodan ti motibotayo nga agserserbi iti Dios. Ngem no pudno a sapsapulentay nga umuna ti Pagarian, adda pasettayo a mangpaneknek a naminpinsan nga ulbod ti Diablo. Ipakpakitatayo nga ipangpangrunatayo ti panagserbi iti Dios iti biagtayo. Iti sao ken aramid, mapaneknekantayo ngarud ti dakkel a panagayattayo ken ni Jehova, ti kinasungdotayo iti kinasoberanona, ken ti panagayattayo kadagiti padatay a tao.​—Job 1:9-11; 2:4, 5; Proverbio 27:11.

14. (a) Apay a makagunggona no adda eskediul a mangasaba? (b) Kasano kadakkel ti pannakiraman ti adu a Saksi iti trabaho a panangasaba?

¹⁴ Makatulong ti maysa nga eskediul tapno ad-adu ti magapuanan. Ni Jehova a mismo ket addaan iti “naituding a tiempo” a mangibanag iti panggepna. (Exodo 9:5; Marcos 1:15) No posible, nasayaat no adda maysa wenno ad-adu pay a nakaeskediul a pannakiraman iti panangasaba iti kada lawas. Ginasut a ribu a Saksi ni Jehova iti intero a lubong ti nagpasalista kas auxiliary pioneer, a busbosenda ti agarup dua nga oras kada aldaw a mangikasaba iti naimbag a damag. Ginasut a ribu met ti agserserbi kas regular pioneer, a mangbusbusbos iti agarup dua ket kagudua nga  oras iti kada aldaw a mangipakaammo iti mensahe ti Pagarian. Ad-adu pay nga oras ti busbusbosen dagiti special pioneer ken misionero nga agserserbi iti Pagarian. Mabalintayo met ti mangsapul kadagiti gundaway nga iranud nga impormal ti namnama iti Pagarian iti asinoman a mayat a dumngeg. (Juan 4:7-15) Tarigagayantayo koma ti maaddaan iti naan-anay a pannakiraman iti dayta a trabaho sigun iti ipalubos ti kasasaadtayo, ta impakpakauna ni Jesus: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.”​—Mateo 24:14; Efeso 5:15-17.

15. Mainaig iti ministeriotayo, apay a maikunayo a naintiempuan ti balakad iti 1 Corinto 15:58?

¹⁵ Iti intero a lubong, sangsangkamaysa a makiramraman dagiti Saksi ni Jehova iti daytoy a pribilehio ti panagserbi, aniaman a nasion ti pagnanaedanda. Iyaplikarda a mismo ti naipaltiing a balakad iti Biblia: “Agbalinkayo a natibker, di magaraw, a kankanayon nga aduankayo ti aramiden iti trabaho ti Apo, nga ammoyo a ti panagbannogyo saan nga ubbaw mainaig iti Apo.”​—1 Corinto 15:58.

Panagrepaso

• Idi kinuna ni Jesus nga ‘itultuloyyo a sapulen nga umuna ti Pagarian,’ ania ti ipampamatmatna nga ikabil a segundario koma?

• Ania koma ti panangmatmattayo iti panangtaripato iti pisikal a kasapulantayo ken iti pamiliatayo? Ania a tulong ti itden ti Dios kadatayo?

• Kadagiti ania a benneg ti panagserbi iti Pagarian ti mabalintayo a pakiramanan?

[Salsaludsod]

[Ladawan iti panid 107]

Iti amin a pagilian, ikaskasaba ita dagiti Saksi ni Jehova ti naimbag a damag sakbay a dumteng ti panungpalan