Kapitulo Katorse

Kasano nga Iturturong ni Jehova ti Organisasionna?

1. Ania nga impormasion maipapan iti organisasion ni Jehova ti ipalgak ti Biblia, ket apay a napateg daytoy kadatayo?

ADDA kadi organisasion ti Dios? Adda, sigun iti naipaltiing a Kasuratan. Iti Biblia, pinasaripatpatan kadatayo ti Dios ti nagdayag a nailangitan a paset dayta nga organisasion. (Ezequiel 1:1, 4-14; Daniel 7:9, 10, 13, 14) Nupay ditay makita daytoy a paset, dakkel ti epektona kadagiti pudno nga agdaydayaw ita. (2 Ar-ari 6:15-17) Adda met makita a paset ti organisasion ni Jehova, ditoy daga. Tulongannatayo ti Biblia a mangtarus no ania dayta ken no kasano nga iturturong ni Jehova.

Panangilasin iti Makitkita a Paset

2. Ania a baro a kongregasion ti binangon ti Dios?

² Iti 1,545 a tawen, ti nasion ti Israel ti kongregasion ti Dios. (Aramid 7:38) Ngem di sinalimetmetan ti Israel dagiti linteg ti Dios ken linaksidda ti mismo nga Anakna. Kas resultana, inlaksid ni Jehova dayta a kongregasion ket binaybay-anna. Kinuna ni Jesus kadagiti Judio: “Adtoy! Ti balayyo mabaybay-an kadakayo.” (Mateo 23:38) Nangbangon ngarud ti Dios iti baro a kongregasion, a nangaramidanna iti baro a tulag. Daytoy a kongregasion ket buklen ti 144,000 a tattao a pinili ti Dios a maikaykaysa iti Anakna idiay langit.​—Apocalipsis 14:1-4.

3. Ania ti napasamak idi Pentecostes 33 K.P. a nalawag a mangpaneknek nga us-usaren itan ti Dios ti maysa a baro a kongregasion?

³ Ti immuna a paset dayta baro a kongregasion isu dagidiay  napulotan iti nasantuan nga espiritu ni Jehova idi Pentecostes 33 K.P. Maipapan iti dayta naisangsangayan a pasamak, mabasatayo: “Itan bayat ti panagtultuloy ti aldaw ti piesta ti Pentecostes addada amin idi a sangsangkamaysa iti maymaysa a lugar, ket pagammuan adda dimteng manipud langit nga ungor a kaasping ti ungor ti bumanesbes a napigsa a puyupoy, ket pinunnona ti intero a balay nga ayanda a pagtugtugawan. Ket nagparang kadakuada ti dildila a kasla iti apuy ket naibunongda, ket maysa ti nagdisso iti tunggal maysa kadakuada, ket napnoda amin iti nasantuan nga espiritu.” (Aramid 2:1-4) No kasta, ti espiritu ti Dios ti nangted iti nalawag a pammaneknek a daytoy itan ti grupo dagiti tattao nga usarenna a mangibanag iti panggepna iti sidong ti panangiwanwan ni Jesu-Kristo idiay langit.

4. Siasino ita ti mangbukel iti makitkita nga organisasion ni Jehova?

⁴ Ita, sumagmamano laengen kadagiti 144,000 ti natda ditoy daga. Ngem kas kaitungpalan ti padto ti Biblia, naikaykaysa kadagiti napulotan a natda ti “maysa a dakkel a bunggoy” dagiti “sabsabali a karnero,” ket agdagupda iti minilion. Ni Jesus, ti Nasayaat a Pastor, intiponna dagitoy a sabsabali a karnero kadagiti natda tapno agbalinda a maymaysa nga arban iti sidongna kas ti maymaysa a Pastorda. (Apocalipsis 7:9; Juan 10:11, 16) Buklenda ti nagkaykaysa a kongregasion, ti makitkita nga organisasion ni Jehova.

Teokratiko ti Pakabuklanna

5. Asino ti mangiturturong iti organisasion ti Dios, ken kasano?

⁵ Ti Nainkasuratan nga ebkas a “ti kongregasion ti sibibiag a Dios” pagminarenna no asino ti mangiturturong iti dayta. Ti organisasion ket teokratiko, wenno iturturayan ti Dios. Iturturong ni Jehova ti ilina babaen ken Jesus,  ti dinutokanna a di makita nga Ulo ti kongregasion, ken babaen ti impaltiingna a Saona, ti Biblia.​—1 Timoteo 3:14, 15; Efeso 1:22, 23; 2 Timoteo 3:16, 17.

6. (a) Kasano a naiparangarang idi umuna a siglo ti nailangitan a pannakaiwanwan ti kongregasion? (b) Ania ti mangipakita a ni Jesus latta ti Ulo ti kongregasion?

⁶ Nagminar dayta a panangiwanwan idi Pentecostes. (Aramid 2:14-18, 32, 33) Naiparangarang dayta idi inturong ti anghel ni Jehova ti pannakaisaknap ti naimbag a damag idiay Africa, idi inturong ti timek ni Jesus ti pannakakomberte ni Saul iti Tarso, ken idi rinugian a kinasabaan ni Pedro dagiti Gentil. (Aramid 8:26, 27; 9:3-7; 10:9-16, 19-22) Ngem idi agangay, awanen ti timek a mangngegan manipud langit, awanen dagiti agparang nga anghel, awanen dagiti maiparukpok a namilagruan a sagut ti espiritu. Kaskasdi, inkari ni Jesus: “Adtoy! Addaak kadakayo iti amin nga al-aldaw agingga iti panungpalan ti sistema ti bambanag.” (Mateo 28:20; 1 Corinto 13:8) Ita, agpapaiwanwan ken Jesus dagiti Saksi ni Jehova. No saan a gapu iti dayta, imposible a naipakaammo ti mensahe ti Pagarian iti baet ti nakaro nga ibubusor.

7. (a) Siasino ti mangbukel iti “matalek ken masirib nga adipen,” ken apay? (b) Ania ti naipaannong iti “adipen”?

⁷ Sakbay unay ti ipapatayna, dinakamat ni Jesus kadagiti adalanna ti maipapan iti “matalek ken masirib nga adipen” a pangitalkanna iti naisangsangayan nga annongen kas ti Apoda. Addan dayta nga “adipen” idi napan ti Apo idiay langit, ket napinget latta nga agtartrabaho bayat ti di makita a panagsubli ni Kristo kas agturay iti Pagarian. Iti kasta a panangiladawan, imposible a maysa la a tao ti tuktukoyenna, ngem maitutop dayta iti napulotan a kongregasion ni Kristo. Gapu ta ginatangna dayta iti darana, tinukoy dayta ni Jesus kas ti “adipen[na].” Dinutokanna  dagiti kameng dayta nga adipen a mangaramid kadagiti adalan ken mangitultuloy a mangtaraon kadakuada, nga ipaayna “ti [naespirituan a] taraonda iti umiso a tiempo.”​—Mateo 24:45-47; 28:19; Isaias 43:10; Lucas 12:42; 1 Pedro 4:10.

8. (a) Ania dagiti annongen ti klase adipen ita? (b) Apay a napateg ti agpaiwanwan iti kalasugan ti Dios?

⁸ Yantangay sisusungdo nga ar-aramiden ti klase adipen ti trabaho ti Apona bayat ti di makita a panagsublina idi 1914, adda pammaneknek a naitalek kenkuana ti dakdakkel nga annongen idi 1919. Sipud idin, dagiti tawen a simmaganad ket tiempo ti sangalubongan a panangikasaba iti Pagarian, ket maur-urnong ti dakkel a bunggoy dagiti agdaydayaw ken Jehova a mangnamnama a maitalimeng bayat ti dakkel a rigat. (Mateo 24:14, 21, 22; Apocalipsis 7:9, 10) Agkasapulan met dagitoy iti naespirituan a taraon, ket tartaraonan ida ti klase adipen. Tapno maay-ayo ni Jehova, masapul ngarud nga agpaiwanwantayo kenkuana babaen daytoy a kalasugan ken agtignaytayo a maitunos iti dayta.

9, 10. (a) Idi umuna a siglo, ania ti urnos no maipapan iti panangrisut kadagiti saludsod mainaig iti doktrina ken panangted iti instruksion iti panangikasaba iti naimbag a damag? (b) Kasano a maiturturong ita ti trabaho a panangasaba ti ili ni Jehova?

⁹ No dadduma, tumaud dagiti saludsod maipapan iti doktrina ken urnos. Ania ngaruden? Iti Aramid kapitulo 15, dakamatenna kadatayo no kasano a narisut ti isyu maipapan kadagiti nakomberte a Gentil. Nayuman dayta a banag kadagiti apostol ken lallakay idiay Jerusalem, a nagserbi idi kas bagi a manarawidwid. Saan a perpekto dagidi a lallaki, ngem inaramat ida ti Dios. Sinukimatda dagiti kasuratan mainaig iti dayta a banag agraman dagiti pammaneknek a nagtignay ti espiritu ti Dios tapno  makasabaan dagiti Gentil, sada nagdesision. Binendisionan ti Dios dayta nga urnos. (Aramid 15:1-29; 16:4, 5) Nangdutok ti bagi a manarawidwid kadagiti tattao a mangisaknap iti pannakaikasaba ti Pagarian.

¹⁰ Iti kaaldawantayo, ti Bagi a Manarawidwid iti makitkita nga organisasion ni Jehova ket buklen dagiti napulotan iti espiritu a kakabsat a naggapu iti nadumaduma a nasion ken masarakan iti sangalubongan a hedkuarter dagiti Saksi ni Jehova. Iti sidong ti kinaulo ni Jesu-Kristo, itantandudoda ti nasin-aw a panagdayaw iti amin a pagilian, nga iturturongda ti panangasaba a trabaho dagiti Saksi ni Jehova nga adda iti pinullo ribu a kongregasion. Dagiti kameng ti Bagi a Manarawidwid umanamongda iti panangmatmat ni apostol Pablo, a nagsurat kadagiti padana a Kristiano: “Saan a gapu ta dakami dagiti appo iti pammatiyo, no di ket katrabahuandakami a maipaay iti rag-oyo, ta babaen ti pammatiyo sitatakderkayo.”​—2 Corinto 1:24.

11. (a) Kasano ti pannakadutok dagiti panglakayen ken ministerial nga adipen? (b) Apay a makipagtrabahotayo a sisisinged kadagidiay nadutokan?

¹¹ Iti intero a lubong, agpannuray dagiti Saksi ni Jehova iti Bagi a Manarawidwid iti panangpili kadagiti kualipikado a kakabsat a maautorisaran a mangdutok kadagiti panglakayen ken ministerial nga adipen a mangaywan kadagiti kongregasion. Nailanad iti Biblia dagiti kualipikasion dagidiay madutokan ket maikonsiderar ti kinaimperpekto ken pagkuranganda. Dagiti panglakayen nga agirekomenda ken dagidiay mangdutok nadagsen ti sungsungbatanda iti Dios. (1 Timoteo 3:1-10, 12, 13; Tito 1:5-9) Iti kasta, ikararagda ti tulong ti espiritu ti Dios ken agpaiwanwanda iti naipaltiing a Saona. (Aramid 6:2-4, 6; 14:23) Ipakitatay koma ti apresasiontayo kadagitoy a “sagut  a tattao,” a tumultulong kadatayo amin a makagteng iti ‘panagkaykaysa iti pammati.’​—Efeso 4:8, 11-16.

12. Kasano nga us-usaren ni Jehova dagiti babbai iti teokratiko nga urnos?

¹² Imbilin ti Kasuratan a lallaki ti mangaywan iti kongregasion. Saan a mangipababa daytoy kadagiti babbai, ta dadduma kadakuada ti makipagturay iti nailangitan a Pagarian, ken adu ti maar-aramidanda iti trabaho a panangasaba. (Salmo 68:11) Ken babaen ti matalek a panangitungpalda kadagiti annongenda iti pamilia, mapasayaat  dagiti babbai ti reputasion ti kongregasion. (Tito 2:3-5) Ngem dagiti nadutokan a lallaki ti agisuro iti uneg ti kongregasion.​—1 Timoteo 2:12, 13.

13. (a) Sigun iti Biblia, ania koma ti panangmatmat dagiti panglakayen iti annongenda? (b) Ania a pribilehio ti mabalintay amin a pakipasetan?

¹³ Iti lubong, maibilang a napateg ti tao nga addaan iti prominente a saad. Ngem iti organisasion ti Dios, kastoy ti pagalagadan: “Ti agtigtignay a kas maysa a nanumnumo kadakayo amin isu dayta ti naindaklan.” (Lucas 9:46-48; 22:24-26) Iti Kasuratan, mabalakadan dagiti panglakayen a dida koma iturayan ti “tawid” ti Dios no di ket agbalinda a pagulidanan ti arban. (1 Pedro 5:2, 3) Saan laeng a sumagmamano no di ket amin a Saksi ni Jehova, lalaki ken babai, ti addaan iti pribilehio a mangibagi iti Soberano iti uniberso, a sipapakumbaba nga agsaoda iti naganna ken ipakaammoda ti Pagarianna kadagiti tattao iti amin a lugar.

14. Babaen ti panangusar kadagiti naisitar a teksto, pagsasaritaan dagiti saludsod a nailista iti ngudo ti parapo.

¹⁴ Nasayaat nga imtuodentay iti bagitayo: ‘Pudno met laeng kadi nga apresiarek no kasano nga iturturong ni Jehova ti makitkita nga organisasionna? Iyanninaw kadi dayta ti panangmatmat, panagsasao, ken tigtignayko?’ Ti panangutob kadagiti sumaganad a punto ti tumulong iti tunggal maysa kadatayo a mangamiris iti bagina.

No pudno met laeng nga agpasakupak ken ni Kristo kas Ulo ti kongregasion, ania koma ngarud ti ar-aramidek kas ipamatmat dagiti sumaganad a teksto? (Mateo 24:14; 28:19, 20; Juan 13:34, 35)

Asino ti raraemek no siyayaman nga awatek dagiti naespirituan a probision a maipapaay babaen ti klase adipen ken ti Bagi a Manarawidwidna? (Lucas 10:16)

 Kasano koma ti panagtitrinnato ti tunggal maysa iti kongregasion, nangnangruna dagiti panglakayen? (Roma 12:10)

15. (a) Ania ti paneknekan ti panangmatmattayo iti makitkita nga organisasion ni Jehova? (b) Ania dagiti gundaway a mapaneknekantayo nga ulbod ti Diablo ken maparagsaktayo ti puso ni Jehova?

¹⁵ Iturturongnatayo ita ni Jehova babaen ti makitkita nga organisasionna iti sidong ni Kristo. Ti panangmatmattayo iti daytoy nga urnos ti mangpaneknek no kasano ti panagriknatayo maipapan iti isyu ti kinasoberano. (Hebreo 13:17) Kuna ni Satanas a ti bagitayo laeng ti pampanunotentayo. Ngem mapaneknekantayo nga ulbod ti Diablo no agserbitayo iti aniaman a kasasaad ken liklikantayo ti bambanag a mangiturong iti di maiparbeng nga atension iti bagitayo. No ayaten ken raementayo dagidiay mangidadaulo kadatayo ken pagkedkedantay ‘a pagrukbaban dagiti personalidad maigapu iti bukodtayo a pagimbagan,’ maparagsaktay ni Jehova. (Judas 16; Hebreo 13:7) No nasungdotayo iti organisasion ni Jehova, ipakpakitatay a ni Jehova ti Diostayo ken naikaykaysatay iti panagdayaw kenkuana.​—1 Corinto 15:58.

Panagrepaso

• Ania ti makitkita nga organisasion ni Jehova ita? Ania ti panggepna?

• Asino ti nadutokan nga Ulo ti kongregasion, ken babaen ti ania a makitkita nga urnos nga ipapaayna ti naayat a panangiwanwanna kadatayo?

• Ania nga umiso a kababalin ti patanorentayo agpaay kadagidiay adda iti organisasion ni Jehova?

[Salsaludsod]

[Dagiti Ladawan iti panid 133]

Iturturongnatayo ni Jehova babaen ti makitkita nga organisasionna iti sidong ni Kristo