Maysa a Pagarian a “Saanto a Pulos Madadael”
Kapitulo Dies
Maysa a Pagarian a “Saanto a Pulos Madadael”
1. Ania a kinapudno ti pinaneknekan dagiti pasamak iti lubong iti intero a pakasaritaan ti tao?
DAGITI pasamak iti lubong iti kada aldaw paneknekanda ti kinapudno a di nagbalin a naragsak dagiti tattao gapu ta inlaksidda ti kinasoberano ni Jehova ken pinadasda nga inturayan ti bagbagida. Awan ti sistema ti natauan a gobierno a nakaipaay iti padapada a pagimbagan ti sangatauan. Nupay awan kaasping ti irarang-ay iti sientipiko a pannakaammo ti tattao ita, dida pulos napaksiat ti sakit wenno napasardeng ti ipapatay, uray no iti maysa la koma a tao. Ti turay ti tao dina naikkat ti gubat, kinaranggas, krimen, panagkunniber, wenno kinapanglaw. Adu pay la a pagilian ti addaan kadagiti gobierno a mangirurumen kadagiti tattao. (Eclesiastes 8:9) Ti teknolohia, kinaagum, ken kinakuneng ti pakaigapuan ti pannakarugit ti daga, danum, ken angin. Narigat a magun-od dagiti kasapulan iti biag gapu iti di umiso a panangtaming dagiti opisial iti ekonomia. Ti rinibu a tawen a panagturay ti tao pinagminarna daytoy a kinapudno: “Saan a kukua ti naindagaan a tao ti dalanna. Saan a kukua ti tao a magmagna uray ti panangiturong iti addangna.”—Jeremias 10:23.
2. Ania ti kakaisuna a solusion kadagiti parikut ti sangatauan?
2 Ania ti solusion? Ti Pagarian ti Dios nga insuro ni Jesus nga ikararag dagiti pasurotna: “Umay koma ti pagariam. Maaramid koma ti pagayatam, kas sadi langit, kasta met iti daga.” (Mateo 6:9, 10) Iti 2 Pedro 3:13, nailadawan ti nailangitan a Pagarian ti Dios kas ti “baro a langlangit,” a mangituray iti “baro a daga,” ti nalinteg a kagimongan ti tattao. Nakapatpateg ti nailangitan a Pagarian ti Dios ta uray la dayta ti nakaisentruan ti inkasaba ni Jesus. (Mateo 4:17) Insurona no ania ti rumbeng a lugar dayta iti biagtayo idi indagadagna: “Itultuloyyo, ngarud, a sapulen nga umuna ti pagarian ken ti kinalintegna.”—Mateo 6:33.
3. Apay a ti panagadal maipapan iti Pagarian ti Dios ti kaganatan ita?
3 Ti panagadal maipapan iti Pagarian ti Dios ti kaganatan ita, yantangay iti din agbayag, agtignay ti Pagarian a mangbalbaliw nga agnanayon iti turay ditoy daga. Impakpakauna ti Daniel 2:44: “Iti kaaldawan dagidiay nga ar-ari [dagiti agdama nga agtuturay] mangipasdekto ti Dios ti langit iti maysa a pagarian [idiay langit] a saanto a pulos madadael. Ket ti met laeng pagarian saanto a mayawat iti aniaman a sabali nga ili [saanton a pulos nga iturayan ti tao ti daga]. Rumekennanto ken pagpatinggaenna amin dagitoy [agdama] a pagarian, ket dayta agtalinaedto agingga kadagiti tiempo a di nakedngan.” Iti kasta, ti Pagarian pagpatinggaenna daytoy maudi nga al-aldaw babaen ti panangdadaelna iti intero a dakes a sistema ti bambanag. Saanton a mapagduaduaan a ti nailangitan a Pagarian ti maikari a mangituray iti daga. Anian a yamantayo ta nakaas-asidegen ti iyegna a pannakabang-ar!
4. Mainaig iti Pagarian, ania ti napasamak idiay langit idi 1914, ket apay a napateg dayta kadatayo?
4 Idi 1914, naisaad ni Kristo Jesus kas Ari ket naikkan iti autoridad a “mangparukma iti tengnga dagiti kabusor[na].” (Salmo 110:1, 2) Iti dayta met la a tawen, nangrugi dagiti “maudi nga aldaw” daytoy agdama a dakes a sistema ti bambanag. (2 Timoteo 3:1-5, 13) Maigiddato iti dayta, napasamak idiay langit dagiti nasirmata ni Daniel. ‘Ti Kadaanan iti Al-aldaw,’ ni Jehova a Dios, intedna iti Anak ti tao, ni Jesu-Kristo, ti “panagturay ken dayaw ken pagarian, tapno dagiti ili, nasional a bungbunggoy ken pagsasao agserbida koma amin kenkuana a mismo.” Maipapan iti dayta a sirmata, insurat ni Daniel: “Ti panagturayna ket di nakedngan ti kapautna a panagturay a saanto nga aglabas, ket ti pagarianna maysa a saanto a madadael.” (Daniel 7:13, 14) Babaen daytoy nailangitan a Pagarian iti sidong ni Kristo Jesus, ipaay ti Dios kadagiti mangay-ayat iti kinalinteg dagiti aglaplapusanan a naimbag a banag a pinanggepna idi inkabilna idiay Paraiso ti umuna a natauan a nagannak kadatayo.
5. Aniada a bambanag maipapan iti Pagarian ti ad-adda a paginteresantayo, ken apay?
5 Kayatyo kadi ti agpasakup a sisusungdo iti Pagarian? No wen, ad-adda a paginteresanyo ti urnos ken panagandar daytoy nailangitan a gobierno. Kayatyo nga ammuen no ania ti ar-aramidenna ita, no ania ti ibanagna iti masanguanan, ken no ania ti kalikagumanna kadakayo. Bayat a sukimatenyo a naimbag ti Pagarian, nasken a rumayray ti apresasionyo iti dayta. No agpasakupkayo iti panangiturayna, ad-adda a makabalankayo a mangisarita iti sabsabali kadagiti nakaskasdaaw a banag nga aramidento ti Pagarian ti Dios agpaay iti natulnog a sangatauan.—Salmo 48:12, 13.
Dagiti Agturay iti Pagarian ti Dios
6. (a) Sigun iti Kasuratan, makin-soberania ti nayebkas babaen ti Mesianiko a Pagarian? (b) Ania koma ti epekto ti naadaltayo maipapan iti Pagarian?
6 Maysa kadagiti damo nga ipalgak ti kasta a panagsukimat isu daytoy: Ti Mesianiko a Pagarian ket ebkas ti kinasoberano a mismo ni Jehova. Inted ni Jehova ti “panagturay ken dayaw ken pagarian” iti Anakna. Kalpasan a naited iti Anak ti Dios ti pannakabalin nga agturay kas Ari, maikanatad a kinuna dagiti timek manipud langit: “Ti pagarian ti lubong nagbalinen a pagarian ni Apotayo [ni Jehova a Dios] ken ni Kristona, ket [ni Jehova] agturayto kas ari iti agnanayon ken awan inggana.” (Apocalipsis 11:15) Isu nga ad-adda nga iyadaninatayo ken ni Jehova ti aniaman a mapaliiwtayo maipapan iti daytoy a Pagarian ken no ania dagiti ibanagna. Dagiti maad-adaltayo ti mangtignay koma kadatayo nga agtarigagay nga agpasakup iti kinasoberanona iti agnanayon.
7. Apay a paginteresantayo unay a ni Jesu-Kristo ti dinutokan ni Jehova nga agturay?
7 Usigenyo ti kinapudno a ni Jehova intronona ni Jesu-Kristo kas ti Dinutokanna nga Agturay. Kas ti Nasigo a Managobra nga inusar ti Dios a mangaramid iti daga ken iti tattao, ad-adda nga ammo ni Jesus dagiti kasapulantayo ngem iti asinoman. Maysa pay, sipud nangrugi ti natauan a historia, impakitana ti ‘panagayatna iti annak ti tattao.’ (Proverbio 8:30, 31; Colosas 1:15-17) Kasta unay ti panagayatna iti sangatauan nga uray la personal nga immay ditoy daga ket intedna ti biagna a pangsubbot kadatayo. (Juan 3:16) Impaayna ngarud ti pamay-an tapno mawayawayaantayo iti basol ken ipapatay ken magundawayantayo ti biag nga agnanayon.—Mateo 20:28.
8. (a) Maisupadi kadagiti natauan a turay, apay nga agnanayon ti gobierno ti Dios? (b) Ania ti pakainaigan ti “matalek ken masirib nga adipen” iti nailangitan a gobierno?
8 Natalged ken agnanayon a gobierno ti Pagarian ti Dios. Ti kinaagnanayon ti Pagarian ket patalgedan ti kinapudno a saan a matay ni Jehova. (Habakuk 1:12) Maisupadi iti natauan nga ar-ari, imortal ni Jesu-Kristo, ti nangitalkan ti Dios iti kinaari. (Roma 6:9; 1 Timoteo 6:15, 16) Kaduanto ni Kristo iti nailangitan a trono ti 144,000, dagiti matalek nga adipen ti Dios a naggapu iti “tunggal tribu ken pagsasao ken ili ken nasion.” Maikkanda met dagitoy iti imortal a biag. (Apocalipsis 5:9, 10; 14:1-4; 1 Corinto 15:42-44, 53) Kaaduan kadakuada ti addan idiay langit, ket ti natda kadakuada ti mangbukel iti moderno-aldaw a “matalek ken masirib nga adipen,” a sisusungdo a mangisaysayangkat kadagiti interes ti Pagarian ditoy daga.—Mateo 24:45-47.
9, 10. (a) Aniada a mamagsisina ken mangdadael nga impluensia ti ikkatento ti Pagarian? (b) No ditay kayat ti agbalin a kabusor ti Pagarian ti Dios, aniada a pakaisagmakan ti liklikantayo?
9 Iti din agbayag, iti tiempo nga inkeddengna, pagtignayen ni Jehova dagiti puersa nga usarenna a mangdadael tapno dalusanda ti daga. Iyegda ti agnanayon a pannakadadael dagiti tattao a sipapakinakem a di agpasakup iti kinasoberanona ken mangumsi iti naayat a probision nga impaayna babaen ken Jesu-Kristo. (2 Tesalonica 1:6-9) Isu dayta ti aldaw ni Jehova, ti nabayagen a maur-uray a tiempo a pannakaalangonna kas Sapasap a Soberano. “Adtoy! Ti met laeng aldaw ni Jehova um-umay, naulpit agpadpada a buyogen ti rungsot ken buyogen ti sumsumged nga unget, . . . tapno matalipuposna dagiti managbasol iti daga manipud iti dayta.” (Isaias 13:9) “Dayta nga aldaw ket aldaw ti rungsot, aldaw ti rigat ken riribuk, aldaw ti bagyo ken panaglangalang, aldaw ti kinasipnget ken kinadaguyemyem, aldaw dagiti ulep ken napuskol a daguyemyem.”—Sofonias 1:15.
10 Agnanayon a mapukawto ti amin a palso a relihion ken amin a natauan a gobierno ken dagiti buyotda, a konkontrolen ti di makita a dakes nga agturay iti daytoy a lubong. Mapapatay ti amin a tumulad iti managimbubukodan, di napudno, ken imoral a panagbiag daytoy a lubong. Saanto a maimpluensiaan ni Satanas ken dagiti demoniona dagiti agnanaed ditoy daga agsipud ta maipupokda iti sangaribu a tawen. Ti Pagarian ti Dios ti naan-anay a mangiturong iti amin nga aktibidad ditoy daga. Anian a pannakabang-arto ti amin a mangay-ayat iti kinalinteg!—Apocalipsis 18:21, 24; 19:11-16, 19-21; 20:1, 2.
Ti Panggep ti Pagarian—Kasano a Matungpal
11. (a) Kasano nga ibanag ti Mesianiko a Pagarian ti panggep ni Jehova ditoy daga? (b) Inton agturay ti Pagarian, anianto ti sagrapen dagiti tattao nga iturayanna?
11 Naan-anay nga ibanagto ti Mesianiko a Pagarian ti orihinal a panggep ti Dios iti daga. (Genesis 1:28; 2:8, 9, 15) Agingga ita, napaay ti sangatauan a mangsuporta iti dayta a panggep. Nupay kasta, “ti mapagnaedan a daga nga umay” ket maipasidong iti Anak ti tao, ni Jesu-Kristo. Babaen ti turay ni Kristo kas Ari, sangsangkamaysa nga agtrabaho ti amin a makalasat iti panangukom ni Jehova iti daytoy daan a sistema, a siraragsak nga aramidenda ti aniaman nga ibilinna, tapno agbalin ti daga a sangalubongan a paraiso. (Hebreo 2:5-9) Tagiragsakento ti intero a sangatauan ti aramid dagiti imada ken naan-anay a masagrapda dagiti aglaplapusanan a bunga ti daga.—Salmo 72:1, 7, 8, 16-19; Isaias 65:21, 22.
12. Kasano nga agbalin a perpekto ti isip ken bagi dagiti iturayan ti Pagarian?
12 Perpekto da Adan ken Eva idi naparsuada, ket panggep ti Dios a mapno ti daga kadagiti annakda, a tagiragsaken ti amin ti perpekto nga isip ken bagi. Nakaskasdaawto ti pannakatungpal dayta a panggep iti sidong ti turay ti Pagarian. Kalikaguman daytoy ti pannakaikkat ti amin nga epekto ti basol. Tapno maibanag dayta, agserbi ni Kristo saan laeng a kas Ari no di pay ket kas Nangato a Padi. Siaanus a tulonganna dagiti natulnog nga iturayanna tapno magunggonaanda iti mangabbong-basol a pateg ti daton ti natauan a biagna.
13. Aniada a pisikal a gunggona ti itdento ti turay ti Pagarian?
13 Iti sidong ti turay ti Pagarian, masagrap dagiti agnanaed ditoy daga dagiti agkakaimbag a pisikal a gunggona. “Iti dayta a tiempo maluktanto ti matmata dagidiay bulsek, ket maluktanto ti mismo a laplapayag dagidiay tuleng. Iti dayta a tiempo kumalay-atto daydiay pilay a kas iti panagkalay-at ti kalakian nga ugsa, ket ti dila daydiay umel umkisto gapu iti ragsak.” (Isaias 35:5, 6) Ti lasag a pinakapuy ti edad wenno sakit nasalsalibukagto ngem iti lasag ti ubing, ket dagiti nakaro nga an-annayen masuktanto iti nasaranta a salun-at. “Ti lasagna agbalin a nasalsalibukag ngem iti kinaagtutubo; isu agsubli kadagiti aldaw ti kired ti kinaagtutubona.” (Job 33:25) Dumtengto ti aldaw inton awan ti agkuna, “Masakitak.” Apay? Agsipud ta dagiti managbuteng iti Dios a tattao mawayawayaandanto iti pammarigat ti basol ken dagiti nakas-ang nga epektona. (Isaias 33:24; Lucas 13:11-13) Wen, ti Dios “punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.”—Apocalipsis 21:4.
14. Ania ti iraman ti panangsagrap iti natauan a kinaperpekto?
14 Nupay kasta, ti kinaperpekto ket saan la a basta pannakaadda iti nasalun-at a bagi ken panunot. Iramanna ti umiso a panangutob kadagiti galad ni Jehova, yantangay naaramidtayo ‘iti ladawan ti Dios, sigun iti langana.’ (Genesis 1:26) Tapno maibanag dayta, kasapulan ti adu a pannakaisuro. Iti baro a lubong, “agtaeng ti kinalinteg.” Isu a kas iti impadto ni Isaias, “ti kinalinteg isu ti sigurado a masursuronto dagiti agnanaed iti nabunga a daga.” (2 Pedro 3:13; Isaias 26:9) Daytoy a galad ti mangyegto iti talna—iti baet dagiti tattao manipud iti amin a puli, kadagiti nasinged nga aggagayyem, iti uneg ti pamilia, ken kangrunaan ti amin, iti Dios. (Salmo 85:10-13; Isaias 32:17) Dagidiay makasursuro iti kinalinteg agtultuloyto a masursuruan maipapan iti pagayatan ti Dios kadakuada. Bayat a mayukuok iti pusoda ti panagayat ken ni Jehova, iyaplikarda ti daldalanna iti tunggal benneg ti biagda. Maibagada ti kinuna ni Jesus, ‘kankanayon nga aramidek ti bambanag a makaay-ayo iti Amak.’ (Juan 8:29) Anian a makaay-ayo ti biag inton mapasamak dayta iti intero a sangatauan!
Nabataden Dagiti Gapuanan
15. Babaen ti panagusar kadagiti saludsod iti daytoy a parapo, itampokyo dagiti gapuanan ti Pagarian ken no ania ti rumbeng nga ar-aramidentayo itan.
15 Nabatad dagiti nakaskasdaaw a gapuanan ti Pagarian ti Dios ken dagiti iturayanna. Ipalagip kadakayo dagiti sumaganad a saludsod ken kasuratan ti maipapan kadagita a gapuanan, agraman ti bambanag a kabaelan ken rumbeng nga ar-aramiden itan ti amin nga iturayan ti Pagarian.
Maibusor iti siasino a nagtignay nga umuna ti Pagarian, ket ania ti resultana? (Apocalipsis 12:7-10, 12)
Nangrugi idi naitrono ni Kristo, naikkan ti atension ti pannakaurnong dagiti natda a kameng ti ania a grupo? (Apocalipsis 14:1-3)
Ania ti impakpakauna ni Jesus nga aramidenna kalpasan ti ibebettak ti dakkel a rigat, kas nairekord iti Mateo 25:31-33?
Ania a panagsagana a trabaho ti maibambanag ita? Siasino dagiti makiramraman iti dayta? (Salmo 110:3; Mateo 24:14; Apocalipsis 14:6, 7)
Apay a dagiti politiko ken relihioso a bumusbusor dida mapasardeng ti trabaho a panangasaba? (Zacarias 4:6; Aramid 5:38, 39)
Ania dagiti panagbalbaliw iti biag dagidiay agpaspasakup iti turay ti Pagarian? (Isaias 2:4; 1 Corinto 6:9-11)
Pagarian iti Sangaribu a Tawen
16. (a) Kasano kapaut ti panagturay ni Kristo? (b) Aniada a nakaskasdaaw a banag ti mapasamak kabayatan ken kalpasan dayta a tiempo?
16 Kalpasan a maigarangugong ni Satanas ken dagiti demoniona, ni Jesu-Kristo ken ti makipagtawid kenkuana a 144,000 agturaydanto kas ar-ari ken papadi iti sangaribu a tawen. (Apocalipsis 20:6) Iti las-ud dayta a panawen, maisublinto ti sangatauan iti kinaperpekto, ket agnanayon nga awanton ti basol ken ti ipapatay gapu ken Adan. Iti ngudo ti Sangaribu a Tawen a Panagturay, kalpasan a maitungpalna a sibaballigi ti akemna kas Mesianiko nga Ari ken Padi, ni Jesus “iyawatna ti pagarian” iti Amana, “tapno ti Dios agbalinto nga amin a bambanag iti tunggal maysa.” (1 Corinto 15:24-28) Iti dayta a tiempo, apagbiit a maluk-atan ni Satanas tapno masubok ti panangsuporta ti nasubbot a sangatauan iti sapasap a kinasoberano ni Jehova. Kalpasan a maibanag ti maudi a pannubok, dadaelen ni Jehova ni Satanas ken dagiti rebelde a dimmasig kenkuana. (Apocalipsis 20:7-10) Dagidiay mangitandudo iti kinasoberano ni Jehova—ti kalinteganna nga agturay—naan-anayto a naipakitada ti di magaraw a kinasungdoda. Maisublinto ti umiso a relasionda ken ni Jehova, ket agbalindanto nga annakna a lallaki ken babbai, a maikari iti anamongna nga agbiag nga agnanayon.—Roma 8:21.
17. (a) Anianto ti mapasamak iti Pagarian iti ngudo ti sangaribu a tawen? (b) Iti ania nga anag a ti Pagarian “saanto a pulos madadael”?
17 No kasta, agbalbaliwto ti akem ni Jesus ken dagiti 144,000 mainaig iti daga. Anianto ti aramidenda iti masanguanan? Awan ti ibaga ti Biblia. Ngem no simamatalek nga itandudotayo ti kinasoberano ni Jehova, makitatayto iti ngudo ti Sangaribu a Tawen a Panagturay no ania ti panggep ni Jehova para kadakuada ken iti nakakaskasdaaw nga unibersona. Kaskasdi, ti sangaribu a tawen a panagturay ni Kristo ket “di nakedngan ti kapautna” ken “saanto a madadael” ti Pagarianna. (Daniel 7:14) Iti ania nga anag? Umuna, saanto a maited ti panagturay iti asinoman nga addaan iti sabali a panggep, yantangay ni Jehova ti Agturay. Maysa pay, ti Pagarian ket “saanto a pulos madadael” gapu ta manayon dagiti gapuananna. (Daniel 2:44) Ket ti Mesianiko nga Ari ken Padi ken ti kakaduana nga ar-ari ken papadi agnanayon a mapadayawanda gapu iti matalek a panagserbida ken ni Jehova.
Panagrepaso
• Apay a ti Pagarian ti Dios ti kakaisuna a solusion kadagiti parikut ti sangatauan? Kaano a nangrugi nga agturay ti Ari ti Pagarian ti Dios?
• Ania ti partikular a makaay-ayo kenka maipapan iti Pagarian ti Dios ken ania ti ibanagna?
• Ania a gapuanan ti Pagarian ti maim-imatangantayon, ket ania ti pasettayo iti dayta?
[Salsaludsod]
[Ladawan iti panid 92, 93]
Iti sidong ti Pagarian ti Dios, masursuro ti amin a tattao ti kinalinteg
