Kapitulo Beinte Uno

Nadayag a Panagballigi ti Panggep ni Jehova

1, 2. (a) Ania ti panggep ni Jehova agpaay kadagiti adda panunotna a parsuana? (b) Siasino dagiti kameng ti nagkaykaysa a pamilia nga agdaydayaw iti Dios?

AMIN a parsua nga adda panunotna sangsangkamaysa nga agdayawda iti maymaysa a pudno a Dios, ket tagiragsakenda ti nadayag a wayawaya kas annak ti Dios​—kasta ti naayat a panggep ni Jehova. Dayta met laeng ti il-iliwen ti amin nga agayat iti kinalinteg.

² Rinugian ni Jehova nga imbanag dayta a naindaklan a panggep idi rinugianna ti nagparsua. Ti umuna a pinarsuana isu ti Anak a nagbalin a ‘silnag ti dayag [ti Dios] ken ti apag-isu a ladawan ti mismo a kina-isuna’ nanipud idi napagungar daytoy. (Hebreo 1:1-3) Naisangsangayan daytoy nga Anak ta agbukbukod ti Dios a nangparsua kenkuana. Amin a simmaruno ket naparsua babaen daytoy nga Anak: umuna dagiti anghel idiay langit, sa dagiti tattao ditoy daga. (Job 38:7; Lucas 3:38) Buklenda ti maysa a sapasap a pamilia. Para kadakuada amin, ni Jehova ti Dios, ti Sapasap a Soberano, ken ti naayat nga Amada.

3. (a) Ania ti natawidtayo kadagiti immuna a nagannak kadatayo? (b) Ania a naayat a probision ti impaay ni Jehova kadagiti annak ni Adan?

³ Idi nakedngan a matay dagiti immuna a nagannak kadatayo gapu ta sipapakinakem a nagbasolda, napapanawda idiay Eden ken inlaksid ida ti Dios. Saandan a paset  ti sapasap a pamiliana. (Genesis 3:22-24; Deuteronomio 32:4, 5) Naggaputayo amin kadakuada isu a natawidtayo ti pagannayasan nga agbasol. Ngem ammo ni Jehova nga addanto kaputotan da Adan ken Eva nga agayat iti kinalinteg. Siaayat ngarud a nangipaay iti probision tapno magun-od dagitoy ti “nadayag a wayawaya ti annak ti Dios.”​—Roma 8:20, 21.

Napukaw ti Israel ti Naanamongan a Takderna

4. Ania a pribilehio ti inted ni Jehova iti nagkauna nga Israel?

⁴ Agarup 2,500 a tawen kalpasan ti pannakaparsua ni Adan, inyawis ni Jehova iti dadduma a tattao ti pribilehio a maaddaan iti naisangsangayan a relasion kenkuana. Pinilina ti nagkauna nga Israel nga agbalin nga ilina ket intedna kadakuada ti Lintegna. (Genesis 12:1, 2) Inaramidna ida a maysa a nasion ket inusarna ida a mainaig iti panggepna. (Deuteronomio 14:1, 2; Isaias 43:1) Nupay kasta, adipen pay la ida ti basol ken ipapatay isu a dida tinagiragsak ti nadayag a wayawaya a dati nga adda kada Adan ken Eva.

5. Kasano a napukaw dagiti Israelita ti naisangsangayan a takderda iti Dios?

⁵ Kaskasdi, makaay-ayo iti Dios dagiti Israelita. Responsabilidadda met a raemen ni Jehova kas Amada ken agbiag a maitunos iti panggepna. Impaganetget ni Jesus ti kinapateg ti panangtungpalda iti dayta nga obligasion. (Mateo 5:43-48) Ngem di natungpal dayta ti Israel. Nupay kuna dagiti Judio nga “adda maymaysa nga Amami, ti Dios,” impalgak ni Jesus a kinaulbod dayta gapu iti aramid ken kababalinda. (Juan 8:41, 44, 47) Idi 33 K.P., ti Dios winaswasna ti Linteg, ket nagpatingga ti naisangsangayan a relasion ti Israel kenkuana. Ngem kayat kadi a  sawen daytoy a saanen a pulos a matagiragsak ti tattao ti nasayaat a relasion iti Dios?

Panangurnong Kadagiti “Bambanag iti Langlangit”

6. Ania ti panggep ti “administrasion” a dinakamat ni Pablo iti Efeso 1:9, 10?

⁶ Impamatmat ni apostol Pablo a mabalin a tagiragsaken ti dadduma a tattao ti naisangsangayan a relasion iti Dios. Kas pagarigan, maipapan iti urnos ni Jehova nga agbalin a kameng ti sangakabbalayanna dagidiay mangipakita iti pammati, insurat ni Pablo: ‘[Ti Dios] impakaammona kadatayo ti sagrado a palimed ti pagayatanna. Maitunos dayta iti pakaragsakanna unay a pinanggepna a mismo maipaay iti maysa a panangaywan [wenno, administrasion] agingga iti naan-anay a pagpatinggaan dagiti naituding a tiempo, awan sabali, tapno ummongen a sangsangkamaysa manen ken Kristo ti amin a bambanag, ti bambanag iti langlangit ken ti bambanag iti daga.’ (Efeso 1:9, 10) Naisentro daytoy nga “administrasion” ken Jesu-Kristo. Babaen kenkuana, naaddaan dagiti tattao iti naanamongan a kasasaad iti imatang ti Dios. Adda limitado a bilang ti tattao a mangnamnama a mapan idiay langit. Kaaduan kadakuada ti agbiag nga agnanayon ditoy daga.

7. Siasino dagiti “bambanag iti langlangit”?

⁷ Umuna, nangrugi idi Pentecostes 33 K.P., naikkan iti atension “ti bambanag iti langlangit,” dagidiay makipagtawid ken Kristo iti nailangitan a Pagarian. Maibatay iti pammatida iti pateg ti daton ni Jesus, indeklara ti Dios a nalintegda. (Roma 5:1, 2) Idi agangay, agpada a nairaman dagiti Judio ken Gentil, ket “ti bambanag iti langlangit” agdagup iti 144,000. (Galacia 3:26-29; Apocalipsis 14:1) Ti laengen natda kadakuada ti adda ditoy daga.

 Panangurnong iti “Bambanag iti Daga”

8. Siasino dagiti “bambanag iti daga,” ket ania ti relasionda ken Jehova?

⁸ Ur-urnongen met dayta nga administrasion ti “bambanag iti daga.” Maur-urnong ita ti minilion a tattao a mangnamnama nga agbiag nga agnanayon ditoy daga. Kas pannakidanggay kadagiti natda dagiti makipagtawid iti Pagarian, itan-okda ti nagan ni Jehova ken itandudoda ti panagdayaw kenkuana. (Isaias 2:2, 3; Sofonias 3:9) Awaganda met nga “Ama” ni Jehova gapu ta bigbigenda nga isu ti gubuayan ti biag. Tagtagiragsakenda ti naanamongan a takder iti imatangna maibatay iti pammatida iti naiparukpok a dara ni Jesus. (Apocalipsis 7:9, 14) Ngem gapu ta imperpektoda pay latta, iti masanguanan pay laeng nga agbalinda a naan-anay nga annak ti Dios.

9. Ania ti kari ti Roma 8:21 iti sangatauan?

⁹ Dagitoy nga addaan iti naindagaan a namnama segseggaanda ti tiempo inton ti tattao ket “mawayawayaanto iti pannakaadipen iti panagrupsa.” (Roma 8:21) Dayta a pannakawayawaya ket mangrugi kalpasan a pagpatinggaen ni Kristo ken dagiti nailangitan a buyotna ti dakkel a rigat babaen ti Armagedon. Kaipapanan daytoy a madadaelto ti intero a dakes a sistema ti bambanag ni Satanas, a sarunuen dagiti bendision nga iyeg ti Sangaribu a Tawen a Panagturay ni Kristo iti Pagarian.​—Apocalipsis 19:17-21; 20:6.

10. Ania a kanta a pammadayaw ti kantaento dagiti adipen ni Jehova?

¹⁰ Anian a nagragsakto inton dagiti adipen ni Jehova ditoy daga sangsangkamaysa nga iyebkasda ti rikrikna dagiti adipenna idiay langit, a sirarag-o a mangiwarwaragawag: “Naindaklan ken nakaskasdaaw dagiti aramidmo,  Jehova a Dios, ti Mannakabalin-amin. Nalinteg ken napudno dagiti dalanmo, Ari ti kinaagnanayon. Siasinonto a pudno ti saan nga agbuteng kenka, Jehova, ken mangpadayag iti naganmo, agsipud ta siksika ti nasungdo? Ta amin dagiti nasion umaydanto ket agdaydayawda iti sanguanam, agsipud ta naiparangarang dagiti nalinteg a bilinmo.” (Apocalipsis 15:3, 4) Wen, amin nga adipen ni Jehova sangsangkamaysadanto nga agdayaw iti maymaysa a pudno a Dios. Mapagungarto pay dagiti natay ket maikkanda iti gundaway a makiraman a mangidayaw ken Jehova.​—Aramid 24:15.

Nagsayaat a Wayawaya iti Masanguanan

11. Ania a nagsayaat a wayawaya ti tagiragsakento dagiti makalasat iti dakkel a rigat?

¹¹ Kalpasan a madalusan ti daga iti kinadakes babaen ti dakkel a rigat, nga agngudo iti Armagedon, saanton a ni Satanas a Diablo “ti dios daytoy sistema ti bambanag.” Saanen a masapul a makidangadang dagiti agdaydayaw ken Jehova kadagiti dakes nga impluensia ni Satanas. (2 Corinto 4:4; Apocalipsis 20:1, 2) Awanton ti palso a relihion a mangibabain ken ni Jehova ken mamagsisina iti natauan a kagimongan. Dagiti adipen ti pudno a Dios didanton mapasaran ti kinaawan hustisia ken pannakagundaway iti ima dagiti natauan nga autoridad. Anian a nagsayaat a wayawaya ti tagiragsakendanto!

12. Kasano a mawayawayaan ti amin a tattao iti basol ken kadagiti epektona?

¹² Kas “ti Kordero ti Dios a mangikkat iti basol ti lubong,” usarento ni Jesus ti pateg ti datonna tapno ikkatenna dagiti basol ti sangatauan. (Juan 1:29) Idi adda ni Jesus ditoy daga, inagasanna ti maysa a nakabasol kas pammaneknek a pinakawanna. (Mateo 9:1-7; 15:30, 31) Umasping iti dayta, kas nailangitan nga Ari iti Pagarian  ti Dios, simimilagro a paimbagen ni Kristo Jesus dagiti bulsek, umel, tuleng, pukol, adda diperensia ti panunotda, ken dagidiay addaan iti dadduma pay nga an-annayen. (Apocalipsis 21:3, 4) Maawanton ti “linteg ti basol” kadagiti amin a natulnog a tattao tapno makaay-ayonto kadakuada ken iti Dios ti panunot ken tigtignayda. (Roma 7:21-23) Iti ngudo ti Milenio, agbalindanto a perpekto a tattao, a ‘kaladladawan ken kalanglanga’ ti maymaysa a pudno a Dios.​—Genesis 1:26.

13. Iti ngudo ti Milenio a Turay, anianto ti aramiden ni Kristo, ket anianto ti resultana?

¹³ Inton napagbalin ni Kristo a perpekto ti sangatauan, isublinanto iti Ama ti autoridad a naited kenkuana gapu iti daytoy a panggep: “Iyawatna ti pagarian iti Dios ken Amana, inton ti isuamin a gobierno ken isuamin nga autoridad ken pannakabalin maiyegnan iti pannakapukaw. Ta isu masapul nga agturay kas ari agingga a ti Dios naikabilnan amin dagiti kabusorna iti babaen dagiti sakana.” (1 Corinto 15:24, 25) Naan-anayton a natungpal ti panggep ti Milenio a Panagturay ti Pagarian; saanton ngarud a kasapulan ti panagtalinaed daytoy a segundario a gobierno iti baet ni Jehova ken ti sangatauan. Ket yantangay naan-anayton a maikkat ti basol ken ipapatay ken nasubboten ti sangatauan, agpatinggan ti panagserbi ni Jesus kas Mannubbot. Kuna ti Biblia: “Iti kasta ti Anak a mismo ipasakupnanto met ti bagina iti Daydiay a nangipasakup iti amin a bambanag kenkuana, tapno ti Dios agbalinto nga amin a bambanag iti tunggal maysa.”​—1 Corinto 15:28.

14. Iti ania a maipasidong ti amin a perpekto a tattao, ken apay?

¹⁴ Kalpasanna, maikkan ti perpekto a sangatauan iti gundaway a mangipakita a kayatda ti agserbi nga agnanayon iti maymaysa a pudno a Dios. Gapuna, sakbay a  naan-anay nga agbalinda nga annak ti Dios, ipasidong ni Jehova ti amin a perpekto a tattao iti maudi a pannubok. Maluk-atan da Satanas ken dagiti demoniona manipud iti mangliwengliweng nga abut. Saan a manayon a pakadangranan daytoy dagidiay pudno nga agayat ken Jehova. Ngem asinoman a maituggod nga agsukir ken ni Jehova madadaeldanto iti agnanayon a kadua ti kaunaan a rebelde ken dagiti demoniona.​—Apocalipsis 20:7-10.

15. Ania a kasasaad ti tagiragsakento manen ti amin nga adda panunotna a parsua ni Jehova?

¹⁵ Agbalinto nga annak ni Jehova ti amin a perpekto a tattao a mangitandudo iti kinasoberanona bayat dayta maudi a pannubok. Kalpasan dayta, naan-anayton a tagiragsakenda ti nadayag a wayawaya ti annak ti Dios kas kameng ti sapasap a pamilia ti Dios. Amin nga adda panunotna a parsua idiay langit ken ditoy daga agkaykaysadanto manen nga agdayaw kenkuana kas ti maymaysa a pudno a Dios. Sidadayag nga agballiginto ti panggep ni Jehova! Kayatyo kadi ti agbalin a paset dayta a naragsak, agnanayon, sapasap a pamilia? No wen, paregtaendakayo a mangipangag iti kuna ti Biblia iti 1 Juan 2:17: “Ti lubong aglabas ken kasta met ti tarigagayna, ngem ti agaramid iti pagayatan ti Dios agtalinaed iti agnanayon.”

Panagrepaso

• Sakbay ti iyaalsa idiay Eden, ania ti relasionda ken Jehova dagiti amin nga agdaydayaw kenkuana?

• Ania ti responsabilidad ti amin nga adipen ti Dios?

• Siasinonto pay ti agbalin nga annak ti Dios, ket kasano a mainaig daytoy iti panggep ni Jehova maipapan iti nagkaykaysa a panagdayaw?

[Salsaludsod]

 [Ladawan iti panid 190]

Tagiragsakento dagiti natulnog a tattao ti sangalubongan a paraiso