Nagkaykaysa a Panagdayaw iti Kaaldawantayo—Ania ti Ipamatmatna?
Kapitulo Uno
Nagkaykaysa a Panagdayaw iti Kaaldawantayo—Ania ti Ipamatmatna?
1, 2. (a) Ania a makapagagar nga iyaabante ti mapaspasamak iti kaaldawantayo? (b) Ania ti nakaskasdaaw a namnama dagiti nasingpet ti panagpuspusoda a tattao?
ITI intero a lubong, adda makapagagar nga iyaabante nga agturong iti nagkaykaysa a panagdayaw. Pagkaykaysaenna ti minilion a tattao manipud iti amin a pagilian, tribu, ken pagsasao. Adu pay ti mainaynayon iti dayta kada tawen. Natukoy dagitoy iti Biblia kas ‘dagiti saksi’ ni Jehova ken naawaganda a “dakkel a bunggoy.” Ipapaayda iti Dios ti “sagrado a panagserbi iti aldaw ken rabii.” (Isaias 43:10-12; Apocalipsis 7:9-15) Apay nga ar-aramidenda dayta? Agsipud ta naammuanda a ni Jehova ti maymaysa a pudno a Dios. Daytoy ti nangtignay kadakuada a mangitunos iti biagda kadagiti nalinteg a pagalagadanna. Naammuanda met nga agbibiagtayon “kadagiti maudi nga aldaw” daytoy agdama a dakes a lubong, nga asidegen a dadaelen ti Dios, ken sukatanna iti maysa a paraiso a baro a lubong.—2 Timoteo 3:1-5, 13; 2 Pedro 3:10-13.
2 Inkari ti Sao ti Dios: “Iti apagbiit laengen a kanito, ket daydiay nadangkes awanton . . . Ngem dagidiay naemma tagikuaendanto ti daga, ket pudno a maragsakandanto iti napalalo iti kinaruay ti talna.” (Salmo 37:10, 11) “Dagiti nalinteg tagikuaendanto ti daga, ket agtaengdanto nga agnanayon iti dayta.” (Salmo 37:29) “[Ti Dios] punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.”—Apocalipsis 21:4.
3. Kasano a maragpat ti pudno a panagkaykaysa iti panagdayaw?
3 Dagidiay maum-ummong ita iti pudno a panagdayaw isudanto ti umuna nga agnaed iti baro a lubong. Naammuanda ti pagayatan ti Dios ket tungtungpalenda dayta agingga iti kabaelanda. Napateg dayta kas ipasimudaag ti kinuna ni Jesus: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.” (Juan 17:3) Insurat ni apostol Juan: “Ti lubong aglabas ken kasta met ti tarigagayna, ngem ti agaramid iti pagayatan ti Dios agtalinaed iti agnanayon.”—1 Juan 2:17.
No Ania a Talaga ti Ipamatmatna
4. (a) Ania a talaga ti ipamatmat ti pannakaummong ti nakaad-adu a tattao iti nagkaykaysa a panagdayaw iti kaaldawantayo? (b) Kasano a dineskribir ti Biblia daytoy a pannakaummong?
4 Ania kadi a talaga ti ipamatmat ti pannakaummong ti nakaad-adu a tattao iti nagkaykaysa a panagdayaw iti kaaldawantayo? Nalawag a pammaneknek dayta a nakaas-asidegtayon iti panungpalan daytoy dakes a lubong, ket madagdagus a mangrugi ti baro a lubong ti Dios kalpasan dayta. Saksitayo iti pannakatungpal dagiti padto ti Biblia a nangipakpakauna iti daytoy naindaklan a pannakaummong. Kuna ti maysa kadagita a padto: “Mapasamakto iti kamaudianan a paset dagiti aldaw [dagitoy maudi nga aldaw] a ti bantay ti balay ni Jehova [ti naitan-ok a pudno a panagdayaw kenkuana] sititibkerto ti pannakaipasdekna a nangatngato ngem iti tapaw ti bambantay [natantan-ok ngem iti aniaman a sabali a panagdayaw], . . . ket dagiti ili agayusdanto nga agturong iti dayta. Ket pudno unay a mapanto ti adu a nasion ket kunaenda: ‘Umaykayo, ket sumang-attayo iti bantay ni Jehova ken iti balay ti Dios ni Jacob; ket isuronatayto maipapan kadagiti dalanna, ket magnatayto kadagiti danana.’”—Mikias 4:1, 2; Salmo 37:34.
5, 6. (a) Kasano a makuna nga agturturong dagiti nasion ken Jehova? (b) Ania ti nasken nga imtuodentayo iti bagitayo?
5 Nupay saan nga amin a nasion ket agturturong iti naespirituan a balay a pagdayawan ken Jehova, minilion nga indibidual manipud iti amin a nasion ti mangar-aramid iti kasta. Magutugot unay ti pusoda bayat a maammuanda ti naayat a panggep ken makaay-ayo a personalidad ni Jehova a Dios. Sipapakumbaba nga ammuenda no ania ti kalikaguman ti Dios kadakuada. Ikarkararagda ti kas iti inkararag ti salmista: “Isuronak a mangaramid iti pagayatam, ta sika ti Diosko.”—Salmo 143:10.
6 Masirmatayo kadi ti bagiyo a karaman iti dakkel a bunggoy nga um-ummongen ita ni Jehova iti nagkaykaysa a panagdayaw? Ti kadi tignayyo kadagiti instruksion a naadalyo iti Saona ipakitana a pudno a patienyo a ni Jehova ti Gubuayan dayta? Agingga iti ania a ‘magnakayo iti danana’?
No Kasano a Maragpat Dayta
7. (a) Siasinonto dagiti agkaykaysa nga agdayaw? (b) Apay a naganat ti agdayaw ken Jehova ita, ket kasanotay a matulongan ti sabsabali a mangaramid iti dayta?
7 Panggep ni Jehova nga agkaykaysa iti pudno a panagdayaw ti amin nga adda panunotna a parsua. Il-iliwentay la ketdi ti aldaw inton amin a sibibiag agdayawda iti maymaysa a pudno a Dios! (Salmo 103:19-22) Ngem sakbay a mapasamak dayta, masapul a dadaelen ni Jehova ti amin a di agtungpal iti nalinteg a pagayatanna. Naimbag ta ipakpakaunana ti aramidennanto tapno maikkan iti gundaway nga agbalbaliw ti amin a tattao. (Isaias 55:6, 7) Isu nga iti kaaldawantayo, “iti tunggal nasion ken tribu ken pagsasao ken ili,” kastoy ti naganat nga awis: “Agbutengkayo iti Dios ket idayawyo, agsipud ta dimtengen ti oras ti panangukomna, ket ngarud agdaydayawkayo iti Daydiay nangaramid iti langit ken iti daga ken baybay ken kadagiti ubbog ti dandanum.” (Apocalipsis 14:6, 7) Inawatyo met laeng kadi dayta nga awis? No wen, pribilehioyo nga awisen met ti sabsabali tapno maam-ammo ken dayawenda ti pudno a Dios.
8. Kalpasan a maadal dagiti pamunganayan a sursuro ti Biblia, ania pay a panagrang-ay ti ikagumaantayo a ragpaten?
8 Saan a panggep ni Jehova nga agdayaw kenkuana dagiti tattao nga agkuna a mamatida iti Dios ngem itultuloyda met nga aramiden ti kaykayatda. Kayat ti Dios a maaddaan dagiti tattao iti “umiso a pannakaammo iti pagayatanna” ken iparangarangda dayta iti biagda. (Colosas 1:9, 10) No kasta, dagiti manangapresiar a tattao a nakaadal kadagiti pamunganayan a sursuro ti Biblia pagreggetanda a ragpaten ti Nakristianuan a kinanataengan. Kayatda nga ad-adda a maam-ammo ni Jehova, palawaen ken paunegen ti pannakaawatda iti Saona, ken ikagumaanda nga iyaplikar dayta iti biagda. Ikagumaanda nga iparangarang dagiti galad ti nailangitan nga Amatayo ken matmatanda dagiti bambanag sigun iti panangmatmatna. Daytoy ti mangtignay kadakuada a mangipamuspusan a makiraman iti makaispal-biag a trabaho nga impaannong ni Jehova kadagiti adipenna ditoy daga iti kaaldawantayo. Kasta met kadi ti riknayo?—Marcos 13:10; Hebreo 5:12–6:3.
9. Kadagiti ania a pamay-an a maragpat ita ti pudno a panagkaykaysa?
9 Ipakita ti Biblia a nasken nga agkaykaysa dagiti agserserbi ken Jehova. (Efeso 4:1-3) Matagtagiragsak itan daytoy a panagkaykaysa, nupay agbibiagtayo iti nasinasina a lubong ken sarsarangtentayo ti kinaimperpektotayo. Sipapasnek nga inkararag ni Jesus nga adda koma pudno a panagkaykaysa ti amin nga adalanna. Ania ti kaipapanan daytoy? Umuna, adda koma nasayaat a relasionda ken Jehova ken iti Anakna. Maikadua, adda koma panagkaykaysada. (Juan 17:20, 21) Tapno maibanag dayta, us-usaren ni Jehova ti kongregasion Kristiano kas ti organisasion a mangisuro iti ilina.
Ania Dagiti Makatulong iti Panagkaykaysa?
10. (a) Ania ti masukaytayo no personal nga usarentay ti Biblia a mangsungbat kadagiti saludsod a mangapektar kadatayo? (b) Amirisenyo dagiti bambanag a makatulong iti panagkaykaysa dagiti Kristiano babaen ti panangsungbatyo kadagiti saludsod a nakalista iti daytoy a parapo.
10 Pito a kangrunaan a banag a makatulong iti panagkaykaysa iti panagdayaw ti nakalista iti baba. Bayat a sungbatanyo dagiti nairaman a saludsod, utobenyo no kasano a makaapektar ti kada punto iti relasionyo ken ni Jehova ken kadagiti padayo a Kristiano. Ti panangamiris kadagitoy a punto ken panangbasa kadagiti teksto a nadakamat ngem saan a naadaw tulongannakayo a mangsukay iti nadiosan a sirib, abilidad nga agpanunot, ken pannakaawat—dagiti galad a kasapulantayo amin. (Proverbio 5:1, 2; Filipos 1:9-11) Saggaysaenyo nga usigen dagitoy a banag.
(1) Bigbigentayo ti kalintegan ni Jehova a mangikeddeng iti pagalagadan no ania ti naimbag ken dakes. “Agtalekka ken Jehova buyogen ti isuamin a pusom ket dika agkammatalek iti bukodmo a pannakaawat. Isu imutektekam iti amin a daldalanmo, ket isu palintegennanto dagiti danam.”—Proverbio 3:5, 6.
Apay a nasken nga agpaiwanwan ken agpaidalantayo ken Jehova no agaramidtayo kadagiti desision? (Salmo 146:3-5; Isaias 48:17)
(2) Adda ti Sao ti Dios a mangiwanwan kadatayo. “Idi inawatyo ti sao ti Dios, a nangngegyo kadakami, inawatyo dayta, saan a kas sao dagiti tattao, no di ket, kas iti kinapudno daytoy, kas sao ti Dios, nga agtigtignay met kadakayo a manamati.”—1 Tesalonica 2:13.
Apay a napeggad no basta aramidentayo ti “ipagaruptayo” nga umiso? (Proverbio 14:12; Jeremias 10:23, 24; 17:9)
No ditay ammo ti panangmatmat ti Biblia iti maysa a banag, ania ti nasken nga aramidentayo? (Proverbio 2:3-5; 2 Timoteo 3:16, 17)
(3) Makasursurotay amin manipud iti maymaysa a programa ti naespirituan a panagpakan. “Amin nga annakmo tattaonto a sinursuruan ni Jehova.” (Isaias 54:13) “Agpipinnanunottayo koma iti maysa ken maysa tapno mangparegta iti ayat ken nasayaat nga ar-aramid, a saantay a baybay-an ti panagtataripnongtayo a sangsangkamaysa, kas iti kaugalian ti dadduma, no di ket agpipinnaregtatayo, ket nangnangruna a kasta bayat a makitkitayo nga umas-asidegen ti aldaw [ti pannakadadael].”—Hebreo 10:24, 25.
Aniada a gunggona ti masagrap dagidiay naan-anay a mangaprobetsar kadagiti urnos ni Jehova mainaig iti naespirituan a panagpakan? (Isaias 65:13, 14)
(4) Ni Jesu-Kristo, saan a ti tao, ti Lidertayo. “Saankayo a maawagan iti Rabbi, ta maymaysa ti mannursuroyo, yantangay agkakabsatkayo amin. Mainayon pay, dikay naganen nga amayo ti asinoman ditoy daga, ta maymaysa ti Amayo, Daydiay nailangitan. Saankayo met a maawagan iti ‘papanguluen,’ ta ti Panguluenyo ket maymaysa, ni Kristo.”—Mateo 23:8-10.
Adda kadi siasinoman kadatayo a mangipagarup nga isut’ natantan-ok ngem kadagiti sabsabali? (Roma 3:23, 24; 12:3)
(5) Bigbigentayo ti turay ti Pagarian ti Dios kas ti kakaisuna a namnama ti sangatauan. “Agkararagkayo, ngarud, a kastoy: ‘Amami nga adda iti langlangit, masantipikar koma ti naganmo. Umay koma ti pagariam. Maaramid koma ti pagayatam, kas sadi langit, kasta met iti daga.’ Itultuloyyo, ngarud, a sapulen nga umuna ti pagarian ken ti kinalintegna.”—Mateo 6:9, 10, 33.
Kasano a makatulong iti panagkaykaysatayo ti ‘panangsapul nga umuna iti pagarian’? (Mikias 4:3; 1 Juan 3:10-12)
(6) Ti nasantuan nga espiritu pataudenna kadagiti agdaydayaw ken Jehova dagiti galad a napateg agpaay iti panagkaykaysa dagiti Kristiano. “Ti bunga ti espiritu ket ayat, rag-o, talna, mabayag a panagitured, kinamanangngaasi, kinaimbag, pammati, kinaalumamay, panagteppel.”—Galacia 5:22, 23.
Ania ti nasken nga aramidentayo tapno mapatanortayo dagiti bunga ti espiritu ti Dios? (Aramid 5:32)
Kasano nga apektaran ti espiritu ti Dios ti relasiontayo kadagiti padatayo a Kristiano? (Juan 13:35; 1 Juan 4:8, 20, 21)
(7) Amin a pudno nga agdaydayaw iti Dios ikaskasabada ti naimbag a damag ti Pagarianna. “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.”—Mateo 24:14.
Ania ti mangtignay kadatayo a makiraman a naan-anay iti daytoy trabaho a panangasaba? (Mateo 22:37-39; Roma 10:10)
11. Ania ti resultana no iyaplikartayo iti biagtayo dagiti kinapudno a masarakan iti Biblia?
11 Ti nagkaykaysa a panagdayaw ken Jehova ket ad-adda a pasingedennatayo kenkuana ken mamagbalin a makaay-ayo ti makitimpuyog kadagiti kapammatiantayo. Kuna ti Salmo 133:1: “Adtoy! Anian a nagimbag ken anian a makaay-ayo a dagiti agkakabsat agnaedda a sangsangkamaysa buyogen ti panagtutunos!” Makapabang-ar la ketdi ti mailiklik iti lubong a managimbubukod, imoral, ken naranggas, ken ti makitimpuyog kadagidiay pudno nga agayat ken ni Jehova ken kadagiti lintegna!
Liklikanyo Dagiti Mamagsisina nga Impluensia
12. Apay a nasken a liklikantayo ti espiritu ti panagwaywayas?
12 Tapno saan a madadael ti nagpateg a sangalubongan a panagkaykaysatayo, nasken a liklikantayo dagiti mamagsisina nga impluensia. Maysa kadagitoy isu ti espiritu ti panagwaywayas wenno di panagpasakup iti Dios ken kadagiti lintegna. Tulongannatay ni Jehova a di matnag iti dayta babaen ti panangibutaktakna no siasino ti namunganayan dayta a kababalin, ni Satanas a Diablo. (2 Corinto 4:4; Apocalipsis 12:9) Ni Satanas ti nangimpluensia kada Adan ken Eva tapno salungasingenda ti imbilin ti Dios ken agdesisionda a maikontra iti pagayatan ti Dios. Nakas-ang ti nagbanaganna kadakuada ken kadatayo. (Genesis 3:1-6, 17-19) Nasaknap iti daytoy a lubong ti panagsukir iti Dios ken kadagiti lintegna. Rumbeng ngarud nga iwaksitayo dayta a kababalin.
13. Ania ti mangipakita a napasnek nga agsagsaganatayo nga agbiag iti nalinteg a baro a lubong ti Dios?
13 Kas pagarigan, panunotenyo ti makaparagsak a kari ni Jehova. Kunana a ti agdama a dakes a lubong sukatanna kadagiti baro a langlangit ken baro a daga a sadiay “agtaeng ti kinalinteg.” (2 Pedro 3:13) Saantay kadi a matignay nga agsaganan nga agbiag iti dayta a tiempo inton agraira ti kinalinteg? Kalikaguman daytoy ti panangipangag iti balakad ti Biblia: “Dikay ayaten ti lubong wenno uray ti bambanag nga adda iti lubong. No ti asinoman ayatenna ti lubong, ti ayat ti Ama awan kenkuana.” (1 Juan 2:15) No kasta, liklikantayo ti espiritu daytoy a lubong—ti kinasukirna, ti nalabes a pannakaseknanna iti bagina, ken ti kinaimoral ken kinaranggasna. Iyugalitayo ti umimdeng ken Jehova ken naimpusuan nga agtulnog kenkuana, iti laksid ti aniaman a pagannayasan ti imperpekto a kasasaadtayo. Iparangarang koma ti intero a kabibiagtayo a naisentro ti pampanunot ken motibotayo iti panangaramid iti pagayatan ti Dios.—Salmo 40:8.
14. (a) Apay a napateg nga aprobetsaren ita nga adalen ken iyaplikar iti biagtayo dagiti dalan ni Jehova? (b) Ania ti personal a kaipapanan kadatayo dagiti kasuratan a nadakamat iti parapo?
14 Agtignay a dagus ni Jehova inton dumteng ti tiempo a naikeddeng tapno dadaelenna daytoy dakes a sistema dagiti bambanag ken ti amin a mangsupsuporta iti daytoy. Saanna nga itantan dayta a tiempo wenno balbaliwan dagiti pagalagadanna tapno mapagustuan dagidiay mangikagkagumaan nga agbiag a maitunos iti lubong, nupay parparawpaw nga agad-adal ken iyap-aplikarda ti pagayatan ti Dios. Itan ti panawen tapno agtignay! (Lucas 13:23, 24; 17:32; 21:34-36) Anian a makaparagsak ngarud a makita ti dakkel a bunggoy a mangap-aprobetsar iti daytoy nagpateg a gundaway, a sigagagar a mangtungtungpal iti instruksion nga ipapaay ni Jehova babaen ti Sao ken organisasionna ken sangsangkamaysa a magmagna iti dalan ti Dios nga agturong iti baro a lubong! Ket bayat nga umun-uneg ti pannakaammotayo ken Jehova, ad-adda nga ayaten ken pagserbiantayo ti Dios.
Panagrepaso
• Ania ti panggep ni Jehova no maipapan iti panagdayaw?
• Kalpasan a maadaltayo dagiti pamunganayan a pannursuro ti Biblia, ania pay a panagrang-ay ti ikagumaantayo a ragpaten?
• Ania ti mabalintay nga aramiden kas indibidual tapno maikaykaysatayo kadagiti dadduma nga agdaydayaw ken Jehova?
[Salsaludsod]
[Ladawan iti panid 4]
‘Dagidiay naemma tagikuaendanto ti daga ket maragsakanda iti napalalo iti kinaruay ti talna’
