Kapitulo Siete

No Ania ti Masursurotayo iti Panangipalubos ti Dios iti Kinadakes

1, 2. (a) No dagdagus a pinapatay ni Jehova dagiti immalsa idiay Eden, kasanonatayo koma nga inapektaran dayta? (b) Ania a naayat a probision ti impaay kadatayo ni Jehova?

“BASSIT idi ken nariribuk dagiti aldaw ti tawtawen ti panagbiagko,” kinuna ti patriarka a ni Jacob. (Genesis 47:9) Umasping iti dayta, kinuna ni Job nga “ababa ti biag [ti tao] ken namelmelan iti pannakariribuk.” (Job 14:1) Kas kadakuada, kaaduan kadatayo ti nakapasar kadagiti rigat, kinaawan iti hustisia, ken uray trahedia. Kaskasdi, ti pannakayanaktayo ket saan a makuna a di kinahustisia iti biang ti Dios. Pudno, saantay a tagtagiragsaken ti perpekto nga isip ken bagi agraman ti Paraiso a nagtaengan idi da Adan ken Eva. Ngem ania ngata no dagdagus a pinapatay ida ni Jehova idi immalsada? Nupay awan koma itan ti aniaman a sakit, ladingit, wenno ipapatay, awan met koma ti tattao. Saantayo koma a nayanak. Siaasi nga impalubos ti Dios kada Adan ken Eva nga aganakda, nupay natawid dagitoy ti kinaimperpekto. Ket babaen ken Kristo, impaay ni Jehova ti probision tapno maisubli kadatayo ti napukaw ni Adan​—biag nga agnanayon iti paraiso a daga.​—Juan 10:10; Roma 5:12.

² Anian a makapabileg kadatayo ti maaddaan iti namnamana nga agbiag nga agnanayon iti baro a lubong iti maysa a Paraiso nga aglawlaw, nga awan ti sakit, ladingit, ut-ot, ken ipapatay, agraman ti dakes a tattao! (Proverbio 2:21, 22; Apocalipsis 21:4, 5) Ngem sigun iti rekord ti Biblia,  naammuantayo a nupay ti pannakaisalakantayo ket nakapatpateg ken ni Jehova ken kadatayo, adda pay napatpateg a banag a nairaman.

Maigapu iti Naindaklan a Naganna

3. Ania ti nairaman iti pannakatungpal ti pagayatan ni Jehova para iti daga ken iti sangatauan?

³ Nairaman ti nagan ti Dios iti pannakatungpal ti panggepna mainaig iti daga ken iti sangatauan. Ti naganna a Jehova kaipapananna ti “Pagbalinenna.” Isu a ti naganna saklawenna ti reputasionna kas ti Sapasap a Soberano, ti Mangibambanag kadagiti panggepna, ken ti Dios ti kinapudno. Gapu iti natan-ok a saad ni Jehova, maikari a naan-anay a maraem ti nagan ti Dios ken dagiti nainaig iti dayta ken nasken nga agtulnog kenkuana ti amin a tattao tapno maaddaan iti talna ken nasayaat a kasasaad ti intero nga uniberso.

4. Ania ti nairaman iti panggep ni Jehova agpaay iti daga?

⁴ Idi naparsua da Adan ken Eva, inikkan ida ni Jehova iti annongen. Daytoy ti imbatadna a panggepna: saanda laeng nga iturayan ti daga​—agraman ti panangpalawa iti Paraiso​—no di pay ket punnuenda daytoy kadagiti annakda. (Genesis 1:28) Mapaay kadi daytoy a panggep gapu iti basolda? Anian a pannakaumsi ti nagan ti mannakabalin-amin a ni Jehova no dina tungpalen ti panggepna agpaay iti daga ken iti sangatauan!

5. (a) Kaano a matay dagiti kaunaan a tattao no manganda iti bunga ti kayo ti pannakaammo iti naimbag ken dakes? (b) Kasano a tinungpal ni Jehova ti saona a nailanad iti Genesis 2:17 bayat a tinaginayonna ti panggepna maipapan iti daga?

⁵ Pinakdaaran ni Jehova da Adan ken Eva a no agsukirda ken kanenda ti bunga ti kayo ti pannakaammo iti naimbag ken dakes, matayda “iti aldaw” ti pannanganda. (Genesis 2:17) Kas imbagana, inukom ida ni Jehova iti  mismo nga aldaw ti panagbasolda ket impatawna ti sentensia nga ipapatay. Iti imatang ti Dios, natay da Adan ken Eva iti dayta nga aldaw. Ngem tapno maibanag ti panggepna ditoy daga, impalubos ni Jehova nga agpamiliada sakbay a literal a natayda. Kaskasdi, idi natay ni Adan iti edad a 930, arigna a nagbiag iti maysa nga “aldaw” yantangay matmatan ti Dios ti 1,000 a tawen kas maysa nga aldaw. (2 Pedro 3:8; Genesis 5:3-5) Iti kasta, naiparangarang ti kinamapagtalkan ni Jehova no maipapan iti tiempo ti panangdusana, ket saan a napaay ti panggepna agpaay iti daga gapu iti ipapatayda. Ngem kabayatanna, naipalubos nga agbiag dagiti imperpekto a tattao, agraman dagiti nadangkes.

6, 7. (a) Sigun iti Exodo 9:15, 16, apay nga impalubos ni Jehova nga agtultuloy ti kinadakes iti sumagmamano a panawen? (b) Iti kaso ni Faraon, kasano a naiparangarang ti pannakabalin ni Jehova, ken kasano a naipakaammo ti naganna? (c) Ania ti mapasamak inton agpatingga ti agdama a dakes a sistema ti bambanag?

⁶ Ti imbaga ni Jehova iti agturay ti Egipto idi kaaldawan ni Moises ti ad-adda a nanglawag no apay nga impalubos ti Dios nga agtultuloy ti kinadakes. Idi pinawilan ni Faraon a pumanaw idiay Egipto dagiti annak ti Israel, isut’ saan a dagus a pinapatay ni Jehova. Dimteng ti Sangapulo a Saplit iti daga, a nangipakita iti pannakabalin ni Jehova kadagiti nakaskasdaaw a wagas. Idi nangpakdaar sakbay ti maikapito a saplit, imbaga ni Jehova ken ni Faraon a nalakana la koma nga inkisap ni Faraon ken dagiti buyotna ditoy daga. “Ngem, iti kinapudnona,” kinuna ni Jehova, “gapu itoy pinagtalinaedka, maipagapu iti panangipakitak kenka ti pannakabalinko ken tapno maideklara ti naganko iti intero a daga.”​—Exodo 9:15, 16.

⁷ Idi inispal ni Jehova dagiti Israelita, pudno a nagdindinamag ti naganna. (Josue 2:1, 9-11) Ita, kalpasan ti agarup  3,500 a tawen, saan pay a nalipatan ti inaramidna idi. Saan laeng a ti personal a nagan a Jehova ti naipakaammo no di pay ket ti kinapudno maipapan iti Daydiay makinnagan iti dayta. Daytoy ti nangpatalged iti reputasion ni Jehova a kas Dios a mangtungtungpal kadagiti karina ken agtignay maigapu kadagiti adipenna. (Josue 23:14) Ipakita daytoy nga awan ti makalapped iti panggepna gapu iti mannakabalin-amin a bilegna. (Isaias 14:24, 27) Makapagtalektayo ngarud a mabiiten nga agtignay ti Dios para kadagiti matalek nga adipenna babaen ti panangdadaelna iti intero a dakes a sistema ni Satanas. Dinto pulos malipatan dayta a pannakaiparangarang ti mannakabalin-amin a bileg ken ti dayag nga iyegna iti nagan ni Jehova. Aglaplapusananto dagiti itdenna a bendision.​—Ezequiel 38:23; Apocalipsis 19:1, 2.

‘O Nagunegen ti Pannakaammo ti Dios!’

8. Ania dagiti bambanag a kayat ni Pablo nga usigentayo?

⁸ Iti suratna kadagiti taga Roma, inyimtuod ni apostol Pablo: “Adda aya di kinahustisia iti Dios?” Sikokompiansa a sinungbatanna: “Saan koma a pulos agbalin a kasta!” Kalpasanna, impaganetgetna ti kinamanangngaasi ti Dios ket dinakamatna no apay nga impalubos ni Jehova nga agbiag ni Faraon iti sumagmamano a tiempo. Sigun ken ni Pablo, mayarigtayo iti sekka iti ima ti dumadamili. Kunana: “Ita, no ti Dios, nupay pagayatanna nga iparangarang ti pungtotna ken ipakaammo ti pannakabalinna, buyogen iti kasta unay a mabayag a panagitured nangpanuynoy kadagiti basehas ti pungtot a naaramid a maikari iti pannakadadael, tapno maipakaammona ti kinabaknang ti dayagna kadagiti basehas ti asi, nga insaganana a nasaksakbay maipaay iti kinadayag, awan sabali, datayo, nga inayabanna saan laeng a manipud kadagiti Judio no  di ket manipud met kadagiti nasion, ania koma dayta?”​—Roma 9:14-24.

9. (a) Siasino dagiti “basehas ti pungtot a naaramid a maikari iti pannakadadael”? (b) Apay nga inan-anusan ni Jehova dagiti bumusbusor kenkuana, ken kasano a magunggonaanto dagidiay mangay-ayat kenkuana?

⁹ Sipud idi napasamak ti iyaalsa idiay Eden, maibilang a “basehas ti pungtot a naaramid a maikari iti pannakadadael” ti asinoman a bumusor ken ni Jehova ken kadagiti lintegna. Nanipud idi agingga ita, nagan-anus ni Jehova. Inumsi dagiti nadangkes ti dana ti Dios, indadanesda dagiti adipenna, ken pinapatayda pay ti Anakna. Kasta unay ti panagan-anus ni Jehova nga impalubosna ti umdas a panawen tapno makita ti sangaparsuaan ti nakas-ang a pagbanagan ti iyaalsa iti Dios ken ti turay ti tao a naisina kenkuana. Ken gapu iti ipapatay ni Jesus, naipaay ti pakaispalan ti natulnog a sangatauan ken ti ‘mangdadael kadagiti aramid ti Diablo.’​—1 Juan 3:8; Hebreo 2:14, 15.

10. Apay nga inan-anusan ni Jehova dagiti nadangkes kadagiti naglabas a 1,900 a tawen?

¹⁰ Kabayatan ti nasurok a 1,900 a tawen kalpasan ti panagungar ni Jesus, intuloy nga inan-anusan ni Jehova “dagiti basehas ti pungtot,” nga intantanna ti pannakadadaelda. Apay? Gapu iti maysa a banag: isagsaganana dagidiay makipagturay ken Jesu-Kristo iti nailangitan a Pagarian. Addaan iti bilang a 144,000, ket isuda “dagiti basehas ti asi” a tinukoy ni apostol Pablo. Idi damo, dagiti Judio ti naawis a mangbukel iti daytoy nailangitan a grupo. Idi agangay, inyawis ti Dios kadagiti nasion a Gentil. Awan kadagitoy ti pinilit ni Jehova nga agserbi kenkuana. Ngem kadagidiay nangipateg kadagiti naayat a probisionna, intedna iti dadduma kadakuada ti pribilehio a makipagturay iti Anakna iti nailangitan a Pagarian. Asidegen a malpas  ti pannakaisagana dayta nailangitan a grupo.​—Lucas 22:29; Apocalipsis 14:1-4.

11. (a) Ania a grupo ita ti magunggonaan gapu iti panagan-anus ni Jehova? (b) Kasano a magunggonaan dagiti natay?

¹¹ Ti met ngay namnama nga adda agbiag ditoy daga? Gapu iti panagan-anus ni Jehova, nagbalin met a posible ti pannakaummong ti “dakkel a bunggoy” manipud iti amin a nasion. Minilion itan ti bilangda. Inkari ni Jehova a makalasatto daytoy naindagaan a grupo iti panungpalan daytoy agdama a sistema ken addaanda iti namnama nga agbiag nga agnanayon iti paraiso a daga. (Apocalipsis 7:9, 10; Salmo 37:29; Juan 10:16) Iti tiempo nga inkeddeng ti Dios, mapagungarto ti umariwekwek a natay ken maikkanda iti gundaway ditoy daga nga agbalin a sakup ti nailangitan a Pagarian. Impakpakauna ti Sao ti Dios iti Aramid 24:15: “Addanto panagungar agpadpada dagiti nalinteg ken dagiti nakillo.”​—Juan 5:28, 29.

12. (a) Ania ti maadaltayo maipapan ken Jehova mainaig iti panangipalubosna iti kinadakes? (b) Ania ti makunayo maipapan iti wagas ti panangtaming ni Jehova kadagitoy a bambanag?

¹² Maibilang kadi a di kinahustisia daytoy? Saan, gapu ta iti panangitantanna iti pannakadadael dagiti nadangkes, wenno dagiti “basehas ti pungtot,” ipakpakita ti Dios ti asina kadagiti sabsabali, kas maitunos iti panggepna. Daytoy ti mangipakita no kasano ti kinamanangngaasi ken kinamanagayatna. Ken gapu ta naaddaantayo iti gundaway a mangpaliiw iti pannakaibanag ti panggepna, adu ti nasursurotayo maipapan ken ni Jehova. Pagamangaennatayo dagiti naipalgak a nadumaduma nga aspeto ti personalidadna​—ti kinahustisia, kinamanangngaasi, nabayag a panagitured, ken naindaklan a kinasiribna. Ti nainsiriban a panangtaming ni Jehova iti isyu ti sapasap a kinasoberano​—ti kalinteganna nga agturay​—ket agnanayon  nga agserbi kas pammaneknek a kasayaatan pay laeng ti wagas ti panangiturayna. Kas ken apostol Pablo, maikunatayo: “O nagunegen ti kinabaknang ken sirib ken pannakaammo ti Dios! Anian a di pannakasukimat kadagiti panangukomna ken di pannakatalunton kadagiti dalanna!”​—Roma 11:33.

Gundaway a Maipakita ti Debosiontayo

13. No personal nga agsagabatayo, ania a gundaway ti nakalukat kadatayo, ket ania ti tumulong kadatayo nga agtignay a nainsiriban?

¹³ Adu kadagiti adipen ti Dios ti personal nga agsagsagaba. Agtultuloy ti panagsagabada gapu ta di pay dinadael ti Dios dagiti nadangkes ken dina pay inyeg ti naipadto a pannakaisubli ti sangatauan. Agsakit kadi ti nakemtayo gapu iti dayta? Wenno matmatantayo dagita a situasion kas gundaway a mapaneknekan nga ulbod ti Diablo? Tumuredtayo nga agtignay iti kasta no silalagiptayo iti awis nga: “Agmasiribka, anakko, ket pagrag-oem ti pusok, tapno makaipaayak iti sungbat iti daydiay mangrurrurod kaniak.” (Proverbio 27:11) Kinuna ni Satanas, ti mangum-umsi ken Jehova, a no agsagaba kano dagiti tattao iti pinansial wenno iti pisikal, pabasolenda ti Dios, wenno ilunodda pay ketdi. (Job 1:9-11; 2:4, 5) Maparagsaktayo ti puso ni Jehova no ipakitatayo a saan a pudno kadatayo dayta a pammabasol babaen ti panagbalintayo a nasungdo kenkuana iti sidong dagiti pakarigatan.

14. No agpannuraytayo ken Jehova bayat dagiti pakasuotan, ania dagiti benepisio a masagraptayo?

¹⁴ No agpannuraytayo ken Jehova bayat dagiti pakasuotan, mapatanortayo dagiti nasayaat a galad. Kas pagarigan, kas resulta ti panagsagaba ni Jesus, “nasursurona ti panagtulnog” iti wagas a dina pulos napasaran idi. Makasursurotay met kadagiti pakasuotantayo. Mapatanortayo ti mabayag a panagitured, panagibtur, ken mapauneg ti  apresasiontayo kadagiti nalinteg a dana ni Jehova.​—Hebreo 5:8, 9; 12:11; Santiago 1:2-4.

15. Bayat nga an-anusantayo dagiti pakarigatan, kasano a magunggonaan ti dadduma?

¹⁵ Adda dagiti makapalpaliiw kadagiti tignaytayo. Aniaman ti mapasarantayo gapu iti panangipateg iti kinalinteg, nalabit mabigbigto ti dadduma kadakuada no siasino dagiti pudno a Kristiano ita. Ket babaen ti pannakipagdayawda kadatayo, adda gundawayda a mangsagrap iti bendision a biag nga agnanayon. (Mateo 25:34-36, 40, 46) Kayat ni Jehova ken ti Anakna a maaprobetsar dayta dagiti tattao.

16. Kasano a ti panangmatmattayo iti pakarigatan adda pakainaiganna iti panagkaykaysa?

 ¹⁶ Anian a nagsayaat no matmatantayo dagiti narigat a kasasaad kas oportunidad a maipakita ti debosiontayo ken ni Jehova ken gundaway a makiraman iti panangibanag iti panggepna! No aramidentayo dayta, pampaneknekantay nga agturturongtayo iti pannakikaykaysa iti Dios ken ni Kristo. Kastoy ti inkararag ni Jesus ken Amana a Jehova para iti amin a pudno a Kristiano: “Agkiddawak, saan a maipapan kadagitoy [dagiti agdama idi nga adalanna] laeng, no di ket maipapan met kadagidiay addaan iti pammati kaniak babaen iti saoda; tapno maymaysada koma amin, a kas kenka, Ama, naikaykaysaka kaniak ket naikaykaysaak kenka, tapno isuda met maikaykaysada koma kadata.”​—Juan 17:20, 21.

17. Ania ti manamnamatayo no nasungdotayo ken ni Jehova?

¹⁷ No nasungdotayo ken ni Jehova, sipaparabur a gunggonaannatayo. Kuna ti Saona: “Agbalinkayo a natibker, di magaraw, a kankanayon nga aduankayo ti aramiden iti trabaho ti Apo, nga ammoyo a ti panagbannogyo saan nga ubbaw mainaig iti Apo.” (1 Corinto 15:58) Kunana pay: “Saan a nakillo ti Dios tapno lipatenna ti aramidyo ken ti ayat nga impakitayo maipaay iti naganna.” (Hebreo 6:10) Kuna ti Santiago 5:11: “Adtoy! Kunaentayo a naragsak dagidiay nakapagibtur. Nangngegyo ti panagibtur ni Job ket nakitayo ti nagbanagan nga impaay ni Jehova, a ni Jehova nadungngo unay iti panagayat ken naasi.” Ania ti resultana ken Job? “No maipapan ken Jehova, binendisionanna ti naud-udi a tungpal ni Job nga ad-adda ngem iti punganayna.” (Job 42:10-16) Wen, ni Jehova ti “mananggunggona kadagidiay sipapasnek a mangsapsapul kenkuana.” (Hebreo 11:6) Ket anian a gunggona ti agur-uray kadatayo​—biag nga agnanayon iti paraiso a daga!

18. Ania ti mapasamakto kadagiti nasaem a pakalaglagipan a mapaspasarantayo?

 ¹⁸ Ti Pagarian ti Dios ti mangikkat iti amin a nangparigat iti natauan a pamilia kadagiti naglabas a rinibu a tawen. Adayo a dakdakkel ti panagrag-o iti dayta a tiempo no idilig iti panagsagaba a mapaspasarantayo ita. Awanton ti mangsinga kadatayo a di makaay-ayo a pakalaglagipan dagiti naglabas a rigat. In-inutto a mapunas dagita a nasaem a pakalaglagipan gapu ta mapnonto ti biag dagiti tattao kadagiti makapabileg a kapanunotan ken aktibidad idiay baro a lubong. Kuna ni Jehova: “Mangparsuaak iti baro a langlangit [maysa a baro a nailangitan a Pagarian a mangituray iti sangatauan] ken baro a daga [maysa a nalinteg a natauan a kagimongan]; ket dagiti immun-una a banag saandanto a maipalagip, saandanto met a tumpuar iti puso. Ngem agragsakkayo ket agrag-okayo iti agnanayon iti daydiay parsuaek.” Wen, iti baro a lubong ni Jehova, maikunanto dagiti nalinteg: “Ti intero a daga naginana, awananen iti pannakasinga. Dagiti tattao naay-ayatanda unay buyogen dagiti narag-o nga ikkis.”​—Isaias 14:7; 65:17, 18.

Panagrepaso

• Nupay impalubosna ti kinadakes, kasano a maitutop nga impakita ni Jehova ti dakkel a panagraemna iti naganna?

• Kasano a ti panagan-anus ti Dios “kadagiti basehas ti pungtot” pinagbalinna a posible a magun-odtayo ti asina agingga ita?

• Kasanotayo koma a matmatan dagiti kasasaad a nairaman ti personal a panagsagaba?

[Salsaludsod]

[Ladawan iti panid 67]

“Binendisionan [ni Jehova] ti naud-udi a tungpal ni Job nga ad-adda ngem iti punganayna”