Ti Kaipapanan ti Bautismoyo
Kapitulo Dose
Ti Kaipapanan ti Bautismoyo
1. Apay a rumbeng a paginteresan ti tunggal maysa kadatayo ti panagpabautisar iti danum?
IDI tawen 29 K.P., nabautisaran ni Jesus, ket ni Juan a Mammautisar ti nangitaneb kenkuana iti Karayan Jordan. Agbuybuya idi ni Jehova ket inyebkasna ti anamongna. (Mateo 3:16, 17) Impasdek ngarud ni Jesus ti pagwadan a nasken a suroten ti amin nga adalanna. Kalpasan ti tallo ket kagudua a tawen, kastoy ti imbilin ni Jesus kadagiti adalanna: “Isuamin nga autoridad naiteden kaniak idiay langit ken ditoy daga. Inkayo ngarud ket mangaramidkayo iti ad-adalan kadagiti tattao iti amin a nasion, a bautisaranyo ida iti nagan ti Ama ken ti Anak ken ti nasantuan nga espiritu.” (Mateo 28:18, 19) Nabautisarankayo kadin maitunos iti imbilin ni Jesus? No saan pay, agsagsaganakayo kadi a mangaramid iti dayta?
2. Mainaig iti bautismo, ania a salsaludsod ti nasken a masungbatan?
2 Aniaman kadagita ti kasasaadyo, ti nalawag a pannakaawat iti bautismo ket napateg iti asinoman nga agtarigagay nga agserbi ken ni Jehova ken agbiag iti nalinteg a baro a lubongna. Dagitoy ti sumagmamano kadagiti saludsod a nasken a masungbatan: Agpada kadi ti kaipapanan ti bautismo dagiti Kristiano ita ken ti bautismo ni Jesus? Ania ti kaipapanan ti mabautisaran “iti nagan ti Ama ken ti Anak ken ti nasantuan nga espiritu”? Ania ti nairaman iti panagbiag a maitunos iti kaipapanan ti Nakristianuan a panagpabautisar iti danum?
Dagiti Bautismo nga Inaramid ni Juan
3. Agpaay laeng kadagiti siasino ti bautismo ni Juan?
3 Agarup innem a bulan sakbay a nabautisaran ni Jesus, nangasaba ni Juan a Mammautisar iti let-ang ti Judea, a kunkunana: “Agbabawikayo, ta ti pagarian ti langlangit asidegen.” (Mateo 3:1, 2) Nangngeg dagiti tattao ti kinuna ni Juan ket impapusoda dayta. Sipapanayag nga impudnoda dagiti basolda, nagbabawyanda, ket napanda nagpabautisar ken ni Juan iti Karayan Jordan. Agpaay laeng dayta a bautismo kadagiti Judio.—Lucas 1:13-16; Aramid 13:23, 24.
4. Apay a kasapulan unay ti panagbabawi dagiti Judio idi umuna a siglo?
4 Kasapulan unay ti panagbabawi dagidi a Judio. Idiay Bantay Sinai idi tawen 1513 K.K.P., inawat dagiti ammada kas maysa nga ili iti maysa a pormal ken serioso a pannakitulag ken ni Jehova a Dios. Ngem gapu kadagiti nakaro a basolda, saanda a natungpal dagiti annongenda iti sidong dayta a tulag, isu a nakondenarda babaen iti dayta. Idi kaaldawan ni Jesus, nakas-ang ti kasasaadda. Asideg idin “ti dakkel ken nakaam-amak nga aldaw ni Jehova” nga impadto ni Malakias. Idi 70 K.P., dimteng dayta nga “aldaw” idi dinadael dagiti buyot ti Roma ti Jerusalem, ti templona, ken ti nasurok a maysa a milion a Judio. Sakbay dayta a pannakadadael, ni Juan a Mammautisar ti naibaon a naregta iti pudno a panagdayaw, “tapno mangisagana maipaay ken Jehova iti ili a sisasagana.” Masapul a pagbabawyanda dagiti nagbasolanda iti Mosaiko a Linteg ti tulag ket sidadaanda a mangakseptar iti Anak ti Dios, ni Jesus, nga imbaon ni Jehova kadakuada.—Malakias 4:4-6; Lucas 1:17; Aramid 19:4.
5. (a) Idi nagpabautisar ni Jesus, apay a nagkedkedan dayta ni Juan? (b) Ania ti isimbolo ti bautismo ni Jesus?
5 Ni Jesus ti maysa kadagidiay nagpabautisar ken ni Juan. Ngem apay? Gapu ta ammona nga awan ti basol ni Jesus nga ipudnona, kinuna ni Juan: “Siak ti agkasapulan iti panangbautisarmo, ket sika umayka kaniak?” Ngem adda sabali nga isimbolo ti bautismo ni Jesus. Isu nga insungbat ni Jesus: “Bay-am a kasta, iti daytoy a tiempo, ta iti kasta a pamay-an maikanatad kadatayo nga itungpal ti isuamin a nalinteg.” (Mateo 3:13-15) Gapu ta awan basol ni Jesus, ti bautismona ket saan a mangisimbolo iti panagbabawi iti basol; saanna met a kasapulan nga idedikar ti bagina iti Dios, yantangay isut’ kameng ti nasion a datin a naidedikar ken ni Jehova. Imbes ketdi, naidumduma ti panagpabautisarna idi agtawen iti 30, ket dayta ti mangisimbolo iti panangidatagna iti bagina iti nailangitan nga Amana tapno aramidenna ti dadduma pay a pagayatan ti Dios.
6. Kasano kapateg ken Jesus ti panagaramid iti pagayatan ti Dios para kenkuana?
6 Ti pagayatan ti Dios para ken Kristo Jesus iramanna ti trabaho a mainaig iti Pagarian. (Lucas 8:1) Iramanna met ti panangisakripisiona iti perpekto a natauan a biagna kas subbot ken kas pakaibatayan ti baro a tulag. (Mateo 20:28; 26:26-28; Hebreo 10:5-10) Impateg unay ni Jesus ti isimbolo ti bautismona iti danum. Dina impalubos a masinga ti atensionna iti dadduma a banag. Agingga iti arinunos ti biagna ditoy daga, simamatalek nga inaramidna ti pagayatan ti Dios, a pinagbalinna a kangrunaan a trabahona ti panangikasaba iti Pagarian ti Dios.—Juan 4:34.
Bautismo iti Danum Dagiti Kristiano nga Adalan
7. Nangrugi idi Pentecostes 33 K.P., ania ti naibilin nga aramiden dagiti Kristiano mainaig iti bautismo?
7 Dagiti immuna nga adalan ni Jesus ket nabautisaran iti danum babaen ken Juan sada naiturong ken ni Jesus kas manamnama nga agbalin a kameng ti Pagarian idiay langit. (Juan 3:25-30) Nangbautisar met dagiti adalan sigun iti bilin ni Jesus, ket umasping ti kaipapanan dayta iti bautismo nga inaramid ni Juan. (Juan 4:1, 2) Ngem nangrugi idi Pentecostes 33 K.P., rinugianda nga intungpal ti annongen a mangbautisar “iti nagan ti Ama ken ti Anak ken ti nasantuan nga espiritu.” (Mateo 28:19) Masarakanyo a makagunggona a repasuen ti kaipapanan dayta.
8. Ania ti kaipapanan ti mabautisaran “iti nagan ti Ama”?
8 Ania ti kaipapanan ti mabautisaran “iti nagan ti Ama”? Kaipapanan dayta ti panangbigbig iti nagan, saad, autoridad, panggep, ken linlinteg ti Dios. Usigenyo ti nairaman iti dayta. (1) No maipapan iti naganna, kuna ti Salmo 83:18: “Sika, nga agnagan Jehova, sika laeng ti Kangatuan iti intero a daga.” (2) No maipapan iti saadna, kuna ti 2 Ar-ari 19:15: “O Jehova . . . , siksika laeng ti pudno a Dios.” (3) No maipapan iti autoridadna, ibaga kadatayo ti Apocalipsis 4:11: “Maikarika, Jehova, a mismo a Diosmi, nga umawat iti dayag ken iti dayaw ken iti pannakabalin, agsipud ta pinarsuam ti amin a bambanag, ket gapu iti pagayatam napaaddada ken naparsuada.” (4) Masapul met a bigbigentayo a ni Jehova ti Nangted iti Biag, a panggepna nga isalakannatayo manipud basol ken ipapatay: “Ti panangisalakan kukua ni Jehova.” (Salmo 3:8; 36:9) (5) Nasken a bigbigentayo a ni Jehova ti Kangatuan a Gubuayan ti Linteg: “Ni Jehova isu ti Ukomtayo, ni Jehova isu ti Manangted-paglintegantayo, ni Jehova isu ti Aritayo.” (Isaias 33:22) Gapu ta pudno amin dayta kenkuana, naidagadag kadatayo: “Masapul nga ayatem ni Jehova a Diosmo buyogen ti intero a pusom ken buyogen ti intero a kararuam ken buyogen ti intero a panunotmo.”—Mateo 22:37.
9. Ania ti kaipapanan ti mabautisaran “iti nagan . . . ti Anak”?
9 Ania ti kaipapanan ti mabautisaran “iti nagan . . . ti Anak”? Kaipapanan dayta ti panangbigbig iti nagan, saad, ken autoridad ni Jesu-Kristo. Ti naganna a Jesus kaipapananna “Ni Jehova ti Pakaisalakanan.” Tagtagiragsakenna ti saadna maigapu iti kinapudno nga isu ti bugbugtong nga Anak ti Dios, ti inauna kadagiti pinarsua ti Dios. (Mateo 16:16; Colosas 1:15, 16) Maipapan iti daytoy nga Anak, kuna kadatayo ti Juan 3:16: “Ta ti Dios inayatna ti lubong [ti mabalin a masubbot a sangatauan] iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.” Gapu ta natay ni Jesus a matalek, pinagungar ti Dios ket intedna kenkuana ti kanayonan nga autoridad. Sigun ken apostol Pablo, ti Dios ‘intan-okna [ni Jesus] iti nangatngato a saad’ iti uniberso, maikadua laeng ken ni Jehova. Dayta ti makagapu nga “iti nagan ni Jesus agparintumeng koma ti tunggal tumeng . . . ket sipapanayag a bigbigen koma ti tunggal dila a ni Jesu-Kristo ket Apo iti dayag ti Dios nga Ama.” (Filipos 2:9-11) Kaipapanan daytoy ti panangtungpal kadagiti bilin ni Jesus, a naggapu a mismo ken Jehova.—Juan 15:10.
10. Ania ti kaipapanan ti mabautisaran “iti nagan . . . ti nasantuan nga espiritu”?
10 Ania ti kaipapanan ti mabautisaran “iti nagan . . . ti nasantuan nga espiritu”? Kaipapanan dayta ti panangbigbig iti akem ken trabaho ti nasantuan nga espiritu. Ania aya ti nasantuan nga espiritu? Isu dayta ti aktibo a puersa ni Jehova, nga usarenna a mangitungpal kadagiti panggepna. Kinuna ni Jesus kadagiti pasurotna: “Agkiddawakto iti Ama ket ikkannakayto iti sabali a katulongan tapno adda kadakayo iti agnanayon, ti espiritu ti kinapudno.” (Juan 14:16, 17) Ania ti maaramidan ti espiritu kadakuada? Imbaga pay ni Jesus kadakuada: “Umawatkayto iti pannakabalin inton dumteng kadakayo ti nasantuan nga espiritu, ket dakayto dagiti saksik agpadpada idiay Jerusalem ken iti intero a Judea ken Samaria ken agingga iti kaadaywan a paset ti daga.” (Aramid 1:8) Babaen ti nasantuan nga espiritu, impaltiing met ni Jehova ti pannakaisurat ti Biblia: “Ti padto saan a naiyeg uray kaano babaen ti pagayatan ti tao, no di ket dagiti tattao nagsaoda manipud iti Dios bayat nga idaldalan ida ti nasantuan nga espiritu.” (2 Pedro 1:21) Bigbigentayo ngarud ti akem ti nasantuan nga espiritu no adalentayo ti Biblia. Bigbigbigentayo met ti nasantuan nga espiritu no agpatulongtayo ken ni Jehova tapno mapatanor dagiti “bunga ti espiritu,” nga isu ti “ayat, rag-o, talna, mabayag a panagitured, kinamanangngaasi, kinaimbag, pammati, kinaalumamay, panagteppel.”—Galacia 5:22, 23.
11. (a) Ania ti pudno a kaipapanan ti bautismo iti kaaldawantayo? (b) Kasano a mayarig ti bautismo iti ipapatay ken panagungar?
11 Dagiti immuna a nabautisaran maitunos iti bilin ni Jesus isu dagiti Judio ken proselita a Judio, nangrugi idi 33 K.P. Di nagbayag kalpasanna, nayawis kadagiti Samaritano ti pribilehio nga agbalin a Kristiano nga adalan. Sa idi 36 K.P., naawis uray dagiti di nakugit a Gentil. Sakbay a nabautisaranda, dagiti Samaritano ken Gentil ti masapul a mangaramid iti personal a panagdedikar ken ni Jehova nga agserbida kenkuana kas ad-adalan ti Anakna. Daytoy ti nagtultuloy a kaipapanan ti Nakristianuan a bautismo iti danum agingga iti kaaldawantayo. Ti naan-anay a pannakaitaneb ket maitutop a simbolo ti personal a panagdedikar, yantangay ti bautismo ket simboliko a pannakaitanem. Ti pannakaitanebyo isimbolona ti ipapatayyo manipud iti dati a wagas ti panagbiagyo. Ti irurukuasyo manipud iti danum isimbolona a napagungarkayo tapno aramidenyo ti pagayatan ti Dios. Agaplikar daytoy “maysa a bautismo” iti amin nga agbalin a pudno a Kristiano. No mabautisaranda, agbalinda a Kristiano a Saksi ni Jehova, dagiti ordinado a ministro ti Dios.—Efeso 4:5; 2 Corinto 6:3, 4.
12. Ti Nakristianuan a bautismo iti danum ket katupag ti ania, ken kasano?
12 Mainaig iti pannakaisalakan, dakkel ti pateg ti kasta a bautismo iti imatang ti Dios. Kas pagarigan, kalpasan a dinakamatna ti panangbangon ni Noe iti daong, a nakaispalanda a sangapamiliaan iti Layus, insurat ni apostol Pedro: “Daydiay katupag daytoy ket isalsalakannakayo met ita, awan sabali, ti bautismo, (saan a ti panangiwaksi iti rugit ti lasag, no di ket ti panagkiddaw iti Dios iti naimbag a konsiensia,) babaen ti panagungar ni Jesu-Kristo.” (1 Pedro 3:21) Ti daong ket nalawag nga ebidensia a simamatalek nga inringpas ni Noe ti impaannong ti Dios kenkuana. Idi nalpas a nabangon ti daong, “nagpasar iti pannakadadael ti lubong iti daydi a tiempo idi nalayus iti danum.” (2 Pedro 3:6) Ngem ni Noe ken ti pamiliana, “walo a kararua, ti sitatalged a nailasat iti danum.”—1 Pedro 3:20.
13. Ania ti pakaisalakanan ti maysa a Kristiano babaen ti bautismo ti danum?
13 Kas simbolo ti dedikasionda, agpabautisar ita dagiti mangidedikar iti biagda ken ni Jehova maibatay iti pammati iti napagungar a Kristo. Aramidenda ti pagayatan ti Dios iti kaaldawantayo ket maisalakanda iti agdama a dakes a lubong. (Galacia 1:3, 4) Saandan a mairaman a madadael a kadua ti agdama a dakes a sistema ti bambanag. Maaddaanda pay iti nadalus a konsiensia manipud iti Dios. Impanamnama ni apostol Juan kadagiti adipen ti Dios: “Ti lubong aglabas ken kasta met ti tarigagayna, ngem ti agaramid iti pagayatan ti Dios agtalinaed iti agnanayon.”—1 Juan 2:17.
Panangtungpal Kadagiti Annongentayo
14. Apay a ti bautismo ket saan a garantia ti pannakaisalakan?
14 Maysa a biddut a pagarupen a ti bautismo ket garantia ti pannakaisalakan. Maaddaan la dayta iti pateg no pudpudno nga idedikar ti maysa ti biagna ken ni Jehova babaen ken Jesu-Kristo. Kalpasanna, tungpalenna ti pagayatan ti Dios, ket agmatalek agingga iti panungpalan. “Ti nakapagibtur agingga iti panungpalan isunto ti maisalakan.”—Mateo 24:13.
15. (a) Ania ti pagayatan ti Dios ita kadagiti bautisado a Kristiano? (b) Kasano kapateg iti biagtayo ti panagbalin a Kristiano nga adalan?
15 Ti pagayatan ti Dios para ken Jesus iramanna ti panangusarna iti biagna kas tao. Nasken a matay kas daton. Iti kasasaadtayo, nasken a maidatag ti bagitayo iti Dios, ket masapul nga agbiagtayo nga addaan panagsakripisio babaen ti panagaramid iti pagayatan ti Dios. (Roma 12:1, 2) Saantayo nga ar-aramiden ti pagayatan ti Dios uray no sagpaminsan la a gagaraentayo a tuladen ti kondukta ti agdama a lubong wenno iyun-unatayo dagiti personal a pagimbagan ket itedtay iti Dios ti sangkabassit laeng a panagserbi. (1 Pedro 4:1-3; 1 Juan 2:15, 16) Idi sinaludsod ti maysa a Judio no kasano a magun-odna ti biag nga agnanayon, imbatad ni Jesus ti kinapateg ti panagbiag a nadalus iti moral. Ngem impatuldona ti napatpateg pay a banag: ti panagbalin a Kristiano nga adalan, maysa a pasurot ni Jesus. Dayta ti kapatgan iti biag. Saan a mabalin a segundario laeng dayta kadagiti material a pagimbagan.—Mateo 19:16-21.
16. (a) Ania ti annongen ti amin a Kristiano mainaig iti Pagarian? (b) Kas nailadawan iti panid 116 ken 117, ania ti sumagmamano nga epektibo a pamay-an a maibanag ti trabaho mainaig iti Pagarian? (c) Ania ti paneknekan ti naimpusuan a pannakiramantayo iti trabaho a panangasaba?
16 Maipaganetget manen a ti pagayatan ti Dios para ken ni Jesus iramanna ti napateg a trabaho mainaig iti Pagarian ti Dios. Napulotan pay ketdi ni Jesus kas Ari. Ngem idi adda pay ditoy daga, sireregta nga inkasabana ti Pagarian. Addaantayo iti kasta met la a trabaho a panangasaba, ket adda rasontayo a naimpusuan a makiraman iti dayta. No aramidentayo dayta, iparparangarangtay ti apresasiontayo iti kinasoberano ni Jehova agraman ti panagayattayo kadagiti pada a tattao. (Mateo 22:36-40) Ipakpakitatay met a naikaykaysatayo kadagiti kapammatiantayo iti sangalubongan, a mangiwarwaragawag iti Pagarian. Iti intero a lubong, sangsangkamaysa a pagreggetantayo a ragpaten ti biag nga agnanayon iti naindagaan a paset ti Pagarian.
Panagrepaso
• Ania ti nagpadaan ken nagdumaan ti bautismo ni Jesus ken ti bautismo iti danum ita?
• Ania ti kaipapanan ti mabautisaran “iti nagan ti Ama ken ti Anak ken ti nasantuan nga espiritu”?
• Ania ti nairaman iti panangtungpal kadagiti annongen ti mabautisaran iti danum kas Kristiano?
[Salsaludsod]
[Dagiti Ladawan iti panid 116, 117]
SUMAGMAMANO A PAMAY-AN A MAIWARAGAWAG TI PAGARIAN
Iti binalaybalay
Kadagiti kabagian
Kadagiti katrabahuan
Kadagiti kaeskuelaan
Kadagiti lansangan
Panangsarungkar kadagiti interesado a tattao
Kadagiti panagadal iti Biblia iti pagtaengan
