Ania ti Kaipapanan Amin Dagitoy?

KINUNA ni Jesu-Kristo: Karaman kadagiti pagilasinan ti “panungpalan ti sistema ti bambanag” dagiti gubat, kinakirang ti taraon, angol, ken ginggined.​—Mateo 24:1-8; Lucas 21:10, 11.

Manipud pay idi 1914, nariribuk ti biag gapu kadagiti gubat iti nagbabaetan dagiti nasion ken iti nagbabaetan dagiti saan nga agkakapuli, a masansan a resulta ti pannakibiang dagiti klero iti politika ket ita gapu iti panangraut dagiti terorista iti nadumaduma a lugar.

Iti laksid ti idudur-as ti siensia, ginasut a milion ti maap-apektaran iti nakaro a kinakirang ti taraon iti intero a daga. Kada tawen, minilion ti matmatay gapu iti kinakirang ti taraon.

Ti angol, wenno ti panagsaknap dagiti makaakar a sakit, ket paset met ti pagilasinan nga inted ni Jesus. Kalpasan ti Gubat Sangalubongan I, nasurok a 21,000,000 ti natay iti epidemia a trangkaso. Saan a kas kadagiti angol iti napalpalabas a panawen a sumagmamano laeng a lugar ti inapektaranda, nakadanon dayta kadagiti nasion iti intero a daga agraman kadagiti naiputputong nga isla. Agraraira ita ti AIDS iti intero a lubong, ket dagiti angol a kas iti sarut, malaria, river blindness, ken Chagas’ disease, agtultuloy nga ap-apektaranda dagiti tattao kadagiti napanglaw a nasion.

Sigun iti report, tinawen nga adda pinullo ribu a ginggined a nagduduma ti kapigsada. Nupay adda dagiti alikamen ken nasaysayaat a pamay-an ti panangireport kadagiti ginggined, masansan a maipadpadamag dagiti didigra a pinataud dagiti ginggined kadagiti lugar nga adu ti tao.

Impadto pay ti Biblia: “Ammuem daytoy, a kadagiti maudi nga aldaw dumtengto dagiti napeggad a tiempo a narigat a pakilangenan. Ta dagiti tattao managayatdanto iti bagbagida, managayat iti kuarta, napalangguad, natangsit, managtabbaaw, nasukir kadagiti nagannak, saan a managyaman, saan a nasungdo, awanan nainkasigudan a panagayat, saan a sidadaan iti aniaman a tulagan, manangparpardaya, awanan panagteppel, narungsot, awanan panagayat iti kinaimbag, mangliliput, natangken ti uloda, natangsit gapu iti panagpannakkel, managayat iti ragragsak imbes a managayat iti Dios, nga addaanda iti langa ti nadiosan a debosion ngem libakenda ti pannakabalin dayta; ket umadayoka kadagitoy.”​—2 Timoteo 3:1-5.

Dika kadi umanamong nga agbibiagtayo iti “napeggad a tiempo a narigat a pakilangenan”?

Mapalpaliiwmo kadi nga adda dagiti tattao a nakaro ti panagayatda iti bagida, iti kuarta, ken natangsit?

Siasino ti makailibak a napno ti lubong kadagiti tattao a ti laeng bagida ti pampanunotenda ngem awananda iti panagyaman, saan a sidadaan iti tulagan, ken saan a nasungdo?

Ammom kadi a dimmegdeg iti kasta unay ti kinasukir kadagiti nagannak agraman ti nakaro a kaawan ti pammateg, saan laeng nga iti sumagmamano a lugar no di ket iti intero a lubong?

 Awan duadua a makitam nga agbibiagtayo iti lubong a naayat iti ragragsak ngem awanan ayat iti kinaimbag. Kasta ti panangiladawan ti Biblia kadagiti kababalin a gagangay “kadagiti maudi nga aldaw.”

Kasapulan pay kadi ti pammaneknek tapno mailasin ti tiempo a pagbibiagantayo? Impadto met ni Jesus nga iti daytoy met laeng a tiempo, maikaskasaba iti intero a mapagnaedan a daga ti naimbag a damag maipapan iti Pagarian ti Dios. (Mateo 24:14) Matungtungpal kadi dayta?

Ti Pagwanawanan, maysa a naibatay iti Biblia a pagiwarnak a mangipakpakaammo iti naimbag a damag maipapan iti Pagarian ni Jehova, ket regular a mayim-imprenta iti ad-adu a pagsasao ngem ti aniaman a sabali a pagiwarnak.

Kada tawen, nasurok a maysa a bilion nga oras ti busbusbosen dagiti Saksi ni Jehova iti personal a panangasaba  kadagiti sabsabali maipapan iti Pagarian ti Dios.

Mangipabpablaakda kadagiti literatura a mangilawlawag iti Biblia iti agarup 400 a pagsasao, uray dagiti pagsasao a maus-usar kadagiti naiputputong a lugar a manmano dagiti umilina. Idandanon dagiti Saksi ni Jehova ti naimbag a damag kadagiti amin a nasion; mangaskasabada pay kadagiti adu a babassit nga isla ken teritoria. Iti kaaduan a pagilian, mangikonkonduktada iti regular a programa a panangisuro iti Biblia.

Kinapudnona, maikaskasaba iti intero a mapagnaedan a daga ti naimbag a damag maipapan iti Pagarian ti Dios, saan a tapno makomberte ti lubong, no di ket tapno mangpaneknek. Iti uray sadinoman, maipapaayan dagiti tattao iti gundaway a mangipakita no maseknanda iti namarsua iti langit ken daga ken no raemenda met laeng dagiti linteg ken ipakitada ti ayat iti padada a tao.​—Lucas 10:25-27; Apocalipsis 4:11.

Din agbayag, ikkatento ti Pagarian ti Dios dagiti amin a nadangkes ditoy daga ket pagbalinenna a paraiso ti daga.​—Lucas 23:43.

[Kahon iti panid 6]

Maudi nga Al-aldaw ti Ania?

Saan a maudi nga al-aldaw ti sangatauan. Kadagidiay mangaramid iti pagayatan ti Dios, ididiaya ti Biblia ti namnama a panagbiag nga agnanayon.​—Juan 3:16, 36; 1 Juan 2:17.

Saan a maudi nga al-aldaw ti daga. Ikari ti Sao ti Dios nga agtalinaed iti agnanayon ti mapagnaedan a daga.​—Salmo 37:29; 104:5; Isaias 45:18.

Imbes ketdi, dagitoy ti maudi nga al-aldaw daytoy naranggas, awanan ayat a sistema ti bambanag ken dagidiay naigamer kadagiti nailubongan nga aramid.​—Proverbio 2:21, 22.

[Kahon/Ladawan iti panid 7]

Pudno Kadi a Sao ti Dios ti Biblia?

Maulit-ulit nga insurat dagiti mammadto iti Biblia: “Daytoy ti kinuna ni Jehova.” (Isaias 43:14; Jeremias 2:2) Uray ni Jesu-Kristo, ti Anak ti Dios, inyunay-unayna a ‘saan a nagsao iti bukodna a parnuay.’ (Juan 14:10) Nalawag a kuna ti Biblia a mismo: “Amin a Kasuratan impaltiing ti Dios.”​—2 Timoteo 3:16.

Awan sabali a libro a naipablaak iti ad-adu a pagsasao​—nasurok a 2,200, sigun iti United Bible Societies. Awan sabali a libro a nasaksaknap ti pannakaiwarasna​—nasurok itan nga uppat a bilion a kopia. Saan kadi a kasta ti namnamaem iti mensahe a naggapu iti Dios nga agpaay iti intero a sangatauan?

Para iti naan-anay a pannakasalaysay dagiti pammaneknek a ti Biblia ket impaltiing ti Dios, kitaem ti libro a Ti Biblia—Saot’ Dios Wenno iti Tao?, nga impablaak dagiti Saksi ni Jehova.

Dakkel ti magunggonam no basaem ti Biblia ken bigbigem a pudno a Sao ti Dios dayta.

[Kahon/Dagiti Ladawan iti panid 8]

Ania ti Pagarian ti Dios?

Dayta ti naisangsangayan a gobierno idiay langit nga impasdek ti pudno a Dios, a ni Jehova, ti Namarsua iti langit ken daga.​—Jeremias 10:10, 12.

Kuna ti Biblia a ni Jesu-Kristo ti nangtedan ti Dios iti kasta nga autoridad nga agturay. (Apocalipsis 11:15) Idi adda ni Jesus ditoy daga, impakitana nga adda idin nakaskasdaaw nga autoridadna a naggapu iti Dios​—autoridad a nangted kenkuana iti pannakabalin a mangkontrol kadagiti puersa ti nakaparsuaan, mangpaimbag iti amin a kita ti sakit, ken mangpagungar pay ketdi kadagiti natay. (Mateo 9:2-8; Marcos 4:37-41; Juan 11:11-44) Impakauna ti naipaltiing a padto iti Biblia a ti Dios ikkanna met ni Jesus iti “panagturay ken dayaw ken pagarian, tapno dagiti ili, nasional a bungbunggoy ken pagsasao agserbida koma amin kenkuana a mismo.” (Daniel 7:13, 14) Maawagan dayta a gobierno iti Pagarian ti langit; manipud idiay langit nga agturturay itan ni Jesu-Kristo.

[Dagiti Ladawan iti panid 7]

Maikaskasaba ti naimbag a damag iti intero a lubong