Dimtengen ti ‘Oras ti Panangukom’

TI Apocalipsis, a maudi a libro ti Biblia, ipakaammona kadatayo nga adda anghel nga agtaytayab iti nagtangatangan nga addaan iti “agnanayon a naimbag a damag nga ideklarana kas naragsak a damag.” Kunana iti natbag a timek: “Agbutengkayo iti Dios ket idayawyo, agsipud ta dimtengen ti oras ti panangukomna.” (Apocalipsis 14:6, 7) Ramanen dayta nga ‘oras ti panangukom’ ti pannakaipakaammo ken pannakaiwayat ti panangukom ti Dios. Apagbiit laeng ti maysa nga “oras.” Dumteng ti pannakaiwayat ti panangukom kas kangitingitan dagiti “maudi nga aldaw,” a pagbibiagantayo ita.​—2 Timoteo 3:1.

Ti ‘oras ti panangukom’ ket naimbag a damag kadagiti mangipatpateg iti kinalinteg. Dayta ti tiempo a panangbang-ar ti Dios kadagiti adipenna nga agsagsagaba iti sidong daytoy naranggas, awanan ayat a sistema ti bambanag.

Ita, sakbay nga agngudo ti ‘oras ti panangukom’ iti pannakadadael ti agdama a dakes a sistema ti bambanag, maidagdagadag kadatayo: “Agbutengkayo iti Dios ket idayawyo.” Ar-aramidem kadi dayta? Saan laeng a panangikuna iti, “Mamatiak iti Dios,” ti kaipapanan daytoy. (Mateo 7:21-23; Santiago 2:19, 20) Ti umno a panagbuteng iti Dios tignayennatayo a mangraem kenkuana. Gutugotennatayo nga umadayo iti kinadakes. (Proverbio 8:13) Tulongannatayo a mangayat iti naimbag ken manggura iti dakes. (Amos 5:14, 15) No adda panagraemtayo iti Dios, umimdengtayo a naimbag kenkuana. Uray no adu ti pakakumikomantayo, iwayaantayo a basaen a kanayon ti Saona, ti Biblia. Agtalektayo kenkuana a kankanayon ken iti amin a pusotayo. (Salmo 62:8; Proverbio 3:5, 6) Dagidiay pudno a mangraraem kenkuana bigbigenda a kas Namarsua iti langit ken daga, isu ti Sapasap a Soberano, ken siaayat nga agpasakupda kenkuana kas Soberano iti biagda. No mautobtayo a nasken nga ad-adda nga imutektekantayo dagitoy a banag, ditay itantan nga aramiden dayta.

Ti panawen ti panangukom a dinakamat ti anghel ket maawagan met kas “ti aldaw ni Jehova.” Dimteng ti kasta nga “aldaw” iti nagkauna a Jerusalem idi 607 K.K.P. gapu ta saan nga impangag dagiti umilina dagiti pakdaar ni Jehova babaen dagiti mammadtona. Gapu ta impagarupda a mabayag pay ti aldaw ni Jehova, ad-adda a pinagpeggadda ti biagda. Pinakdaaran ida ni Jehova: “Asidegen dayta, ket mapagdardaras iti kasta unay.” (Sofonias 1:14) Dimteng ti sabali pay nga “aldaw ni Jehova” iti nagkauna a Babilonia idi 539 K.K.P. (Isaias 13:1, 6) Gapu ta nagtalekda kadagiti sarikedked ken kadagiti didiosenda, saan nga inkankano dagiti taga Babilonia dagiti pakdaar nga impakaammo dagiti mammadto ni Jehova. Ngem iti maysa a rabii, natnag ti nabileg a Babilonia kadagiti Medo ken Persiano.

Ania ti sangsanguentayo ita? Ti sabali ken nakarkaro pay nga “aldaw ni Jehova.” (2 Pedro 3:11-14) Nayetnagen ti panangukom ti Dios iti “Babilonia a Dakkel.” Sigun iti Apocalipsis 14:8, kuna ti maysa nga anghel: “Narban! Ti Babilonia a Dakkel narban.” Napasamaken dayta. Saannan a malapdan dagiti agdaydayaw ken ni Jehova. Sipapanayag a naibutaktaken ti kinadakesna ken ti pannakiramanna iti gubat. Asidegen ti naan-anay a pannakadadaelna. Dayta ti gapuna nga idagdagadag ti Biblia kadagiti tattao iti uray sadinoman: “Rummuarkayo kenkuana [Babilonia a Dakkel] . . . no saanyo a kayat ti makiraman kenkuana kadagiti basolna, ken no saanyo a kayat ti umawat iti paset dagiti saplitna. Ta dagiti basolna namuntuon a tumukno sadi langit, ket ti Dios linagipna dagiti aramidna a di kinahustisia.”​—Apocalipsis 18:4, 5.

Ania ti Babilonia a Dakkel? Isu dayta ti sangalubongan a sistema ti relihion nga umarngi iti nagkauna a Babilonia. (Apocalipsis, kapitulo 17, 18) Usigem ti dadduma kadagiti pagkaarngianda:

 • Dagiti papadi ti nagkauna a Babilonia nakaro ti pannakinaminda kadagiti napolitikaan nga aramid ti nasion. Pudno dayta iti kaaduan a relihion ita.

• Dagiti papadi ti Babilonia masansan nga isuda ti mangisungsong iti nasion a makigubat. Iti moderno a panawen, ti relihion ti masansan a mangidadaulo a mangbendision kadagiti soldado iti gubat dagiti nasion.

• Dagiti sursuro ken kaugalian ti nagkauna a Babilonia intuggodna ti nasion iti nakaro nga imoralidad. No iwalin dagiti panguluen ti relihion ita ti pagalagadan ti Biblia iti moralidad, nasaknap ti imoralidad agpadpada kadagiti klero ken dagiti pasurotda. Nakadidillaw met a gapu iti pannakinaig ti Babilonia a Dakkel iti lubong ken kadagiti napolitikaan a sistema daytoy, iti Apocalipsis nailadawan dayta kas maysa a balangkantis.

• Kuna pay ti Biblia a ti Babilonia a Dakkel ket agbibiag “iti awan babainna a kinaluho.” Iti nagkauna a Babilonia, agkakalawa ti daga dagiti agserserbi kadagiti templo, ken aktibo dagiti papadi kadagiti komersial nga aramid. Iti kaaldawantayo, malaksid pay kadagiti lugar a pagdaydayawan, nakaad-adu ti negosio ken sanikua ti Babilonia a Dakkel. Bimmaknang iti kasta unay agraman dagiti dadduma iti lubong ti negosio gapu kadagiti sursuro ken piestana.

• Gagangay iti nagkauna a Babilonia, kas met laeng iti adu a lugar ita, ti panangusar kadagiti imahen, mahika, ken espiritismo. Ti ipapatay ket iyaallatiw laeng kano iti sabali a biag. Napno ti Babilonia kadagiti templo ken kapilia a naidaton kadagiti didiosenna, ngem dagiti taga Babilonia binusorda dagiti agdaydayaw ken ni Jehova. Kasta met laeng dagiti patpatien ken ar-aramiden ti Babilonia a Dakkel.

Idi nagkauna a panawen, inusar ni Jehova dagiti agtuturay ken buyot dagiti nasion a mangdusa kadagidiay nagtultuloy a nangumsi kenkuana ken iti pagayatanna. Iti kasta, dagiti Asirio dinadaelda ti Samaria idi 740 K.K.P. Ti Jerusalem ket rinebbek dagiti taga Babilonia idi 607 K.K.P. ken dagiti Romano idi 70 K.P. Ket ti Babilonia, pinarmek dagiti Medo ken Persiano idi 539 K.K.P. Impadto ti Biblia nga iti panawentayo, dagiti napolitikaan a gobierno, a kas atap nga animal, darupendanto “ti balangkantis” ken pagbalinenda a lamolamo, iti kasta maibutaktakto ti pudno a kinasiasinona. Dadaelendanto a naan-anay.​—Apocalipsis 17:16.

Talaga kadi a kastanto ti aramiden dagiti gobierno ditoy lubong? Kuna ti Biblia a ‘ti Dios ikabilna dayta kadagiti pusoda.’ (Apocalipsis 17:17) Kellaatto dayta, di ninamnama, makapakigtot, saan a mapakpakadaan wenno in-inut.

Ania ti masapul nga aramidem? Isaludsodmo iti bagim: ‘Addaak pay laeng kadi iti maysa a narelihiosuan nga organisasion a natulawan kadagiti sursuro ken kaugalian a mamagbalin iti dayta a paset ti Babilonia a Dakkel?’ Uray no saanka a miembro, mabalinmo nga isaludsod iti bagim: ‘Agpapaimpluensiaak kadi iti espirituna?’ Ania nga espiritu? Panangpanuynoy iti nalulok a moral, panagayat kadagiti material a sanikua ken ragragsak imbes a panagayat iti Dios, wenno sipapakinakem a panangilaksid (uray kadagiti kasla babassit a banag) iti Sao ni Jehova. Panunotem a naimbag ti sungbatmo.

Tapno anamongannatayo ni Jehova, nasken a paneknekantayo, babaen dagiti aramid ken tarigagay ti pusotayo, a pudno a saannatayo a paset ti Babilonia a Dakkel. Saan a panawen daytoy ti panangitungtungkua. Kas panangpakdaarna kadatayo a kellaatto a dumteng ti panungpalan, kuna ti Biblia: “Iti kasta a napardas a panangipuruak maitapuakto ti Babilonia a dakkel a siudad, ket saanto a pulos masarakanen.”​—Apocalipsis 18:21.

 Ngem saan la a dayta. Iti sabali pay a paset dayta nga ‘oras ti panangukom,’ ukomento ni Jehova a Dios ti sangalubongan a napolitikaan a sistema, dagiti agtuturayna, ken amin a mangilaksid iti kalinteganna a mangituray babaen ti nailangitan a Pagarian a naitalek ken ni Jesu-Kristo. (Apocalipsis 13:1, 2; 19:19-21) Iti naimpadtuan a sirmata a nailanad iti Daniel 2:20-45, nailadawan ti napolitikaan a turay manipud idi panawen ti nagkauna a Babilonia agingga iti kaaldawantayo kas dakkel a ladawan a naaramid iti balitok, pirak, gambang, landok, ken damili. Maipapan iti kaaldawantayo, impakpakauna ti padto: “Mangipasdekto ti Dios ti langit iti maysa a pagarian a saanto a pulos madadael.” Ket maipapan iti aramidento pay ti Pagarian kabayatan ti ‘oras ti panangukom’ ni Jehova, kuna ti Biblia: “Rumekennanto ken pagpatinggaenna amin dagitoy a pagarian [nga aramid ti tao], ket dayta agtalinaedto agingga kadagiti tiempo a di nakedngan.”​—Daniel 2:44.

Pakdaaran ti Biblia dagiti pudno a managdaydayaw a saanda nga ayaten dagiti ‘banag nga adda iti lubong’​—ti wagas ti panagbiag nga itantandudo daytoy a lubong a naisina iti pudno a Dios. (1 Juan 2:15-17) Ipakpakita kadi dagiti pangngeddeng ken aramidmo a naan-anay a supsuportaram ti Pagarian ti Dios? Pudno kadi a dayta ti ipangpangrunam?​—Mateo 6:33; Juan 17:16, 17.

[Kahon iti panid 14]

Kaano a Dumteng ti Panungpalan?

“Iti oras a saanyo nga ipagarup nga isu dayta, ti Anak ti tao umay.”​—Mateo 24:44.

“Agtultuloykayo nga agbantay . . . agsipud ta saanyo nga ammo ti aldaw wenno uray ti oras.”​—Mateo 25:13.

“Saanto a maladaw.”​—Habakuk 2:3.

[Kahon iti panid 14]

Ania Ngata No Ammom?

No ammom a saan pay a dumteng iti sumagmamano a tawen ti umad-adani a panangukom ti Dios, baliwan kadi dayta ti wagas ti panagbiagmo? Saan kadin a kas iti sigud ti kinaregtam nga agserserbi ken ni Jehova gapu ta saan a dimteng ti panungpalan daytoy daan a sistema iti panawen a ninamnamam?​—Hebreo 10:36-38.

Ti saantayo a pannakaammo iti eksakto a panawen ikkannatayo iti gundaway a mangipakita a nadalus ti motibotayo nga agserserbi iti Dios. Dagidiay makaam-ammo ken ni Jehova ammoda a ti panagbalin a naregta no kaano nga asidegen ti panungpalan ket saan a makaay-ayo iti Dios, ta makitana no ania ti adda iti puso.​—Jeremias 17:10; Hebreo 4:13.

Kadagidiay pudno a mangay-ayat ken ni Jehova, isu ti kanayon nga ipangpangrunada iti biagda. Kas kadagiti dadduma, mabalin a mangged dagiti pudno a Kristiano. Nupay kasta, saan a panagpabaknang ti kalatda no di ket maaddaan iti umdas a kasapulan iti biag ken adda bassit mairanudda. (Efeso 4:28; 1 Timoteo 6:7-12) Adda met panawenda para iti makagunggona a panaglinglingay ken panagaliwaksay, ngem aramidenda dayta tapno mabang-aranda, saan a basta tuladenda ti ar-aramiden dagiti dadduma. (Marcos 6:31; Roma 12:2) Kas ken Jesu-Kristo, pagragsakanda nga aramiden ti pagayatan ti Dios.​—Salmo 37:4; 40:8.

Kayat dagiti pudno a Kristiano ti agbiag ken agserbi ken ni Jehova iti agnanayon. Saan nga agkupas dayta a namnama uray no masapul nga agurayda kadagiti bendision iti nabaybayag bassit ngem iti ninamnama dagiti dadduma.

 [Kahon/Ladawan iti panid 15]

Ti Isyu Maipapan iti Kinasoberano

Tapno maawatantayo no apay nga ipalubos ti Dios ti kasta unay a panagsagaba, nasken a maawatantayo ti isyu maipapan iti kinasoberano.

Gapu ta ni Jehova ti Namarsua, adda kalinteganna a mangituray iti intero a daga ken kadagiti amin nga agnanaed iti dayta. Nupay kasta, ilawlawag ti Biblia nga iti rugrugi ti pakasaritaan ti tao, adda nangkarit iti kinasoberano ni Jehova. Kinuna ni Satanas a Diablo a nainget unay ni Jehova, a nagulbod kadagiti immuna a nagannak kadatayo maipapan iti mapasamak no salungasingenda ti linteg ti Dios ken aramidenda ti kaykayatda, ken nasaysayaat no iturayanda ti bagida a di makibiang ti Dios.​—Genesis, kapitulo 2, 3.

No ti Dios inkisapna a dagus dagiti rebelde, mabalin a naipakitana ti pannakabalinna, ngem saan a narisut dagiti napataud nga isyu. Imbes nga insigida nga ikisapna dagiti rebelde, impalubos ni Jehova a makita dagiti amin a nasaririt a parsua ti bunga ti iyaalsa. Nupay nagbanag daytoy iti panagsagaba, inikkannatayo met iti gundaway a maitao.

Maysa pay, dakkel a sakripisio iti biang ni Jehova ti siaayat a panangipaayna iti probision a dagiti tattao nga agtulnog kenkuana ken mangipakita iti pammati iti daton a pangsubbot ti Anakna ket maruk-atan iti basol ken kadagiti bunga daytoy ken agbiagda iti Paraiso. No kasapulan, daytoy ket mabalin a babaen ti panagungar.

Ti panangipalubos ti Dios iti tiempo a mangrisut iti isyu ikkanna met dagiti adipen ti Dios iti gundaway a mangipakita a kabaelanda a subadan ti ayat ti Dios ken paneknekan ti kinatarnawda ken ni Jehova iti amin a kasasaad. Ti pannakarisut ti isyu maipapan iti kinasoberano ti Dios, agraman ti nainaig nga isyu maipapan iti kinatarnaw ti tao, ket nasken tapno adda umno a panagraem iti linteg iti uniberso. No awan dayta, pulos nga awan ti pudno a talna. *

[Footnote]

[Ladawan]

Agpatingganto ti sangalubongan a sistema ti napolitikaan a turay