Pagturturongan Daytoy a Lubong?

Gagangayen dagiti nakaro a parikut ken nakaam-ames a pasamak ditoy lubong! Ania ti kaipapanan daytoy?

PERSONAL A KINATALGED: Bomba, bimtak idiay tiendaan. Mannursuro ken estudiante, napaltogan idiay eskuelaan. Maladaga, nakidnap idi nakatallikud dagiti nagannak. Babbai ken lallakay, natakawan iti tengnga ti aldaw.

NARELIHIOSUAN A KASASAAD: Aggugubat a bunggoy, supsuportaran dagiti relihion. Klero, naakusaran iti panangpapatay kadagiti saanda a kapuli. Ubbing nga ab-abusuen dagiti padi; ilimlimed ti simbaan. Manmanon dagiti makimismisa; simbaan, nailako.

AGLAWLAW: Kabakiran, makalkalbo gapu iti komersialismo. Kakaykayuan, pukpukanen dagiti napanglaw tapno usarenda a pagtungo. Narugit a danum iti uneg ti daga, saan a mainum. Madaddadael ti panagkalap gapu iti rugit nga aggapu kadagiti pabrika ken dadduma a moderno a wagas. Makapaipduok a narugit nga angin.

 PAGSAPULAN: Ag-$480 (U.S.), tinawen a sapul ti tunggal umili iti abagatan a Sahara iti Africa. Kinabuklis dagiti negosiante, pakaigapuan ti pannakalugi dagiti kompania ken pannakapukaw ti panggedan ti rinibu. Gapu iti panagsaur, napukaw ti amin nga urnong dagiti kapitalista.

KINAKIRANG TI TARAON: Agarup 800,000,000 iti intero a lubong ti mabisbisinan.

GUBAT: Nasurok a 100,000,000 ti napapatay kadagiti gubat iti maika-20 a siglo. Nuklear nga armas, umdas a mangikisap iti sangatauan iti mamin-adu a daras. Gerra sibil. Terorismo, nagsaknapen iti intero a lubong.

ANGOL KEN DADDUMA PAY A SAKIT: Nangrugi idi 1918, 21,000,000 ti natay iti trangkaso Espaniol. AIDS itan ti “kakaruan nga epidemia iti pakasaritaan ti tao.” Adu ti agsagsagaba iti kanser ken sakit ti puso iti sangalubongan.

Saanmo la a basta kitaen ti tunggal damag. Karkarna kadi a pasamak dagitoy? Wenno paset dagitoy ti sangalubongan a kasasaad nga addaan iti pudno a kaipapanan?

 [Kahon/Ladawan iti panid 5]

Pudno Kadi a Maseknan ti Dios?

Gapu kadagiti nakaam-amak a pasamak wenno dakkel a personal a pukawda, adu ti mariribukan ken agsalsaludsod no apay a saan a bumallaet ti Dios tapno lapdanna dagiti kasta a banag.

Maseknan ti Dios. Mangipapaay ita iti mapagtalkan a giya ken napaypayso a bang-ar. (Mateo 11:28-30; 2 Timoteo 3:16, 17) Insaadnan ti pakaibatayan ti agnanayon a panagpatingga ti kinaranggas, sakit, ken ipapatay. Ipakita dagiti probisionna nga isu ket maseknan saan laeng a kadagiti tattao iti maysa a nasion no di ket kadagiti tattao iti amin a nasion, tribu, ken pagsasao.—Aramid 10:34, 35.

Kasano ti pannakaseknantayo? Ammom kadi no asino ti Namarsua iti langit ken daga? Ania ti naganna? Ania ti panggepna? Sungbatanna dagitoy a saludsod iti Biblia. Ibagana kadatayo no ania ti aramidenna tapno agpatingga ti kinaranggas agraman ti sakit ken ipapatay. Tapno magunggonaantayo, ania ti masapul nga aramidentayo? Nasken nga ammuentayo ti maipapan kenkuana ken ti panggepna. Kasanotayo a manamnama a magunggonaantayo kadagiti probisionna malaksid no ipakitatayo ti pammatitayo kenkuana? (Juan 3:16; Hebreo 11:6) Masapul met a tungpalentayo dagiti bilinna. (1 Juan 5:3) Maseknanka kadi a mangaramid iti dayta?

Tapno maawatantayo no apay nga impalubos ti Dios dagiti agdama a kasasaad, masapul a matarusantayo ti maysa a napateg nga isyu. Ti Biblia ti mangilawlawag iti dayta. Iti panid 15 daytoy a publikasion, maammuam no ania daytoy nga isyu.