Pagturturongan ti Biagmo?

• Adu ti makumikom unay kadagiti inaldaw nga aramidda a dida man la maamiris no pagturturongan ti biagda.

• Ibaga kadatayo ti Biblia dagiti agkakaimbag a banag a mapasamak iti masanguanan. Mamakdaar met maipapan iti dakkel a panagbalbaliw a mapasamak kadagiti natauan nga institusion iti intero a daga. Agpaay a pagimbagantayo ken mailisitayo iti didigra no agtignaytayo itan.

• Adda dagidiay makaammo iti ibagbaga ti Biblia ken mangikagkagumaan a mangaramid iti dayta, ngem gapu kadagiti pakaringgoran iti biag, di umiso ti pagturturonganda.

• Naragsakka kadi iti turong ti biagmo? No adda dagiti igay-atmo nga aramiden, pampanunotem kadi no kasano nga apektaran dagitoy dagiti masanguanan a kalatmo iti biag?

[Kahon/Dagiti Ladawan iti panid 9]

Ania ti Kapatgan Kenka?

Ania ti ipangpangrunam kadagiti sumaganad? Numeruam.

Adu kadagita ti adda umno a lugarna iti biag, ngem no agpilika, ania ti iyun-unam? ania ti isarunom? ken dadduma pay.

․․․ Panaglinglingay/panagaliwaksay

․․․ Ti panggedak wenno ti karerak

․․․ Ti salun-atko

․․․ Ti bukodko a ragsak

․․․ Ti asawak

․․․ Dagiti dadakkelko

․․․ Dagiti annakko

․․․ Makaay-ayo a pagtaengan, napipintas a kawes

․․․ Panagbalin a kalaingan iti aniaman nga aramidek

․․․ Panagdayaw iti Dios

 [Kahon iti panid 10, 11]

Iturturongnaka Kadi Dagiti Pinilim iti Kayatmo a Pagturongan?

UTOBEM DAGITOY A SALUDSOD

PANAGLINGLINGAY/PANAGALIWAKSAY: Bangbang-arannak kadi ti pinilik a paglinglingayan? Makapagagar kadi daytoy ngem pagpeggadenna met ti salun-atko wenno baldaduennak iti unos ti panagbiagko? Maysa kadi dayta a “pagraragsakan” a makapagagar nalabit iti sumagmamano nga oras ngem mangyeg iti agpaut a parikut? Uray no makaay-ayo ti pinilik a paglinglingayan, adu unay kadi ti tiempo a busbusbosek iti dayta nga awan payen ti umdas a panawenko kadagiti napatpateg a banag?

TI PANGGEDAK WENNO TI KARERAK: Agserbi kadi daytoy a pangpaadda kadagiti masapsapul iti biag, wenno agpapaadipenak iti daytoy? Makabannog unay kadi daytoy nga uray la a madaddadael ti salun-atko? Kaykayatko kadi ti ag-overtime iti trabahok wenno ti kaaddak iti denna ti asawak ken dagiti annakko? No adda ipatrabaho kaniak ti amok a di maawat ti konsiensiak wenno masansan a mangagaw iti panawenko kadagiti naespirituan a banag, aramidek kadi dayta tapno mataginayonko ti trabahok?

TI SALUN-ATKO: Ab-abusarek kadi daytoy, wenno kanayon a salsaluadak? Daytoy kadi ti kangrunaan nga isasaok? Ay-aywanak kadi daytoy kas panangipakitak iti pannakaseknan iti pamiliak?

TI BUKODKO A RAGSAK: Daytoy kadi ti ipangpangrunak? Iyun-unak kadi daytoy ngem iti kinaragsak ti asawak wenno ti pamiliak? Ti kadi wagasko a mangbirok iti daytoy ket maitunos iti panagbalinko a managdaydayaw iti pudno a Dios?

TI ASAWAK: Ibilangko kadi a katakunaynay ti asawak no la ket ta isu ti pakaragsakak? Nadayaw kadi ti panangtratok iti asawak kas kaikarianna? Ti kadi pammatik iti Dios apektaranna ti panangmatmatko iti asawak?

DAGITI DADAKKELKO: No maysaak pay laeng a menor de edad, natulnogak kadi kadagiti dadakkelko​—a nadayaw ti panagsungbatko, ar-aramidek dagiti naituding a trabahok, sumangpetak iti balay iti aniaman nga oras nga ibagada, liklikak dagiti kakadua ken aramid nga iparitda? No nataenganakon, sidadayaw kadi nga umim-imdengak kadagiti dadakkelko, a tultulongak ida no kasapulan? Ti kadi pannakilangenko kadakuada ket naibatay iti no ania ti pagimbagak wenno iti balakad ti Sao ti Dios?

DAGITI ANNAKKO: Ar-aramidek kadi ti pagrebbengak nga isuro kadagiti annakko dagiti umiso a moral a prinsipio, wenno ipabiangko latta daytan kadagiti mannursuro idiay eskuelaan? Adda kadi panawenko kadagiti annakko, wenno basta bay-ak lattan a dagiti ay-ayam, telebision, wenno kompiuter ti sanguenda? Disdisiplinaek kadi dagiti annakko tunggal maliwayanda dagiti palagip ti Dios, wenno ar-aramidek laeng dayta no makaluksawak?

MAKAAY-AYO A PAGTAENGAN, NAPIPINTAS A KAWES: Ania ti mangikeddeng iti kita ti panaglanglanga ken sanikua a kayatko​—ti impresion dagiti kaarruba? ti pagnam-ayan ti pamiliak? ti banag a maysaak a managdaydayaw iti Dios?

PANAGBALIN A KALAINGAN ITI ANIAMAN NGA ARAMIDEK: Napateg kadi kaniak ti nasayaat a panangaramid kadagiti bambanag? Ikagkagumaak kadi ti agbalin a kalaingan? Madi kadi ti riknak no atiwendak dagiti dadduma?

PANAGDAYAW ITI DIOS: Napatpateg kadi kaniak ti anamong ti Dios ngem ti anamong ti asawak, annakko, dadakkelko, wenno amok? Tapno agtalinaed a nasaliwanwan ti panagbiagko, sidadaanak kadi a mangyud-udi iti panagserbik iti Dios?

 UTOBEM A NAIMBAG TI BALAKAD TI BIBLIA

Ania ti lugar ti Dios iti biagmo?

Eclesiastes 12:13: “Agbutengka iti pudno a Dios ket salimetmetam dagiti bilinna. Ta daytoy isu ti intero a pagrebbengan ti tao.”

ISALUDSODMO ITI BAGIM: Ipakpakita kadi ti panagbiagko a kasta ti panangmatmatko kadagiti bambanag? Ar-aramidek kadi dagiti rebbengek iti pagtaengan, iti panggedan, wenno idiay eskuelaan gapu iti panagtulnogko kadagiti bilin ti Dios? Wenno dagiti kadi sabali a pakaseknan wenno parikut iti biag ti mangikeddeng no mangilasinak iti panawen para iti Dios?

Ania ti relasionmo iti Dios?

Proverbio 3:5, 6: “Agtalekka ken Jehova buyogen ti isuamin a pusom ket dika agkammatalek iti bukodmo a pannakaawat. Isu imutektekam iti amin a daldalanmo, ket isu palintegennanto dagiti danam.”

Mateo 4:10: “Ni Jehova a Diosmo ti masapul a daydayawem, ket kenkuana laeng ti masapul a pangipaayam ti sagrado a panagserbi.”

ISALUDSODMO ITI BAGIM: Kasta kadi ti panagriknak iti Dios? Dagiti kadi inaldaw nga aramidko, agraman ti panangtamingko kadagiti narigat a kasasaad, ipakitana ti kasta a panagtalek ken debosion?

Kasano ti kapateg kenka ti panagbasa ken panagadal iti Biblia?

Juan 17:3: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.”

ISALUDSODMO ITI BAGIM: Ipakpakitak kadi a pudno a patiek dayta babaen ti panangipategko iti panagbasa iti Sao ti Dios ken panangut-utob iti dayta?

Kasano kapateg kenka ti itatabuno kadagiti gimong ti kongregasion Kristiano?

Hebreo 10:24, 25: “Agpipinnanunottayo koma iti maysa ken maysa tapno mangparegta iti ayat ken nasayaat nga ar-aramid, a saantay a baybay-an ti panagtataripnongtayo a sangsangkamaysa, . . . ket nangnangruna a kasta bayat a makitkitayo nga umas-asidegen ti aldaw.”

Salmo 122:1: “Nagrag-oak idi kinunada kaniak: ‘Mapantayo idiay balay ni Jehova.’”

ISALUDSODMO ITI BAGIM: Ipakita kadi ti wagas ti panagbiagko nga ap-apresiarek daytoy a bilin a masarakan iti Sao ti Dios? Idi napan a bulan, adda kadi Nakristianuan a gimong a nalanganak gapu ta adda sabali nga inaramidko?

Sireregta kadi nga ipakpakaammom kadagiti sabsabali ti maipapan iti Dios ken ti panggepna?

Mateo 24:14: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi . . . , ket iti kasta umayton ti panungpalan.”

Mateo 28:19, 20: “Inkayo ngarud ket mangaramidkayo iti ad-adalan kadagiti tattao iti amin a nasion, . . . nga isuroyo kadakuada a tungpalenda ti amin a bambanag nga imbilinko kadakayo.”

Salmo 96:2: “Kantaanyo ni Jehova, bendituenyo ti naganna. Iti inaldaw-aldaw ibagayo ti naimbag a damag ti panangisalakanna.”

ISALUDSODMO ITI BAGIM: Daytoy kadi a trabaho ket talaga nga adda iti umno a lugarna iti biagko? Ti kadi pannakiramanko iti daytoy iyanninawna ti panangbigbigko iti kinaserioso ti panawen a pagbibiagantayo?