“Saanda a Nangikankano”

MABALIN nga agtungpal iti didigra ti panangyaleng-aleng kadagiti pakdaar.

Idi 1974 idiay Darwin, Australia, kapades ti panagsagsagana dagiti umili iti piestada idi naguni dagiti sirena a mangipakdaar iti um-umay a bagyo. Ngem agarup 30 a tawen idin nga awan pay ti bagyo a nangdadael iti Darwin. Apay koma a madanaganda ita? Linaglag-an ti kaaduan nga umili ti pakdaar. Dimteng dagiti nadawel nga angin ket naitayab dagiti atep ken nalkab ti diding dagiti balay a nagpaknian dagiti tattao. Kabigatanna, interamente a nadadaelen ti siudad.

Idiay Colombia idi Nobiembre 1985, bimtak ti maysa a bulkan. Narunaw dagiti niebe ken yelo a nangyanud iti pitak a nanggabur iti nasurok a 20,000 a tattao nga agnanaed iti ili ti Armero. Awan kadi ti naipakpakauna a pakdaar? No mano a bulan idin a masansan nga agkintayeg ti bantay. Nupay kasta, saan a nangikaskaso ti kaaduan nga umili ti Armero ta naruamdan nga agnanaed iti asideg ti bulkan. Napakdaaran dagiti opisial maipapan iti idadateng ti didigra, ngem bassit la ti inaramidda a nangpakdaar kadagiti umili. Babaen iti radio, impanamnamada kadagiti umili nga awan ti rumbeng a pagdanaganda. Nausar ti trompa iti simbaan a mangpatalged iti rikna dagiti umili. Karabiyanna, adda dua a napigsa a panagbettak. Baybay-am ngata dagiti sanikuam ket pumanawkan? Naladaw unayen idi inkagumaan ti sumagmamano a tattao ti pumanaw.

Masansan a masierto dagiti geologo no sadino a mapasamak ti ginggined. Ngem manmano a maibagada no kaano ti eksakto a pannakapasamakna. Idi 1999, agarup 20,000 ti natay kadagiti ginggined iti intero a lubong. Adu kadagidiay natay ti nangipagarup a pulos a saan a mapasamak dayta kadakuada.

Ipangagmo Kadi Dagiti Pakdaar a Naggapu iti Dios a Mismo?

Nabayagen a silalawag nga imbaga ti Biblia dagiti mapasamak kadagiti maudi nga aldaw. Mainaig iti dayta, idagadagna kadatayo a laglagipentayo ti “kaaldawan ni Noe.” “Kadagidi nga aldaw kasakbayan ti layus,” makumikom dagiti tattao kadagiti inaldaw nga aramidda, nupay awan duadua a maseknanda iti panagraira  ti kinaranggas. No maipapan iti pakdaar nga inted ti Dios babaen ken ni Noe nga adipenna, “saanda a nangikankano agingga nga immay ti layus ket inyanudna amin ida.” (Mateo 24:37-39) Impangagmo ngata koma ti pakdaar? Ar-aramidem kadi dayta ita?

Ania ngata no agnanaedka idi idiay Sodoma, nga asideg iti Natay a Baybay, idi kaaldawan ni Lot a kaanakan ni Abraham? Kasla paraiso ti aglawlaw. Narang-ay ti siudad. Nasaliwanwan ti biag dagiti tattao. Idi kaaldawan ni Lot, “mangmanganda, umin-inumda, gumatgatangda, aglaklakoda, agmulmulada, agibangbangonda.” Ngem naigamer iti imoralidad dagiti tattao. Impapusom ngata koma ti pakdaar idi kinondenar ni Lot dagiti dakes nga aramid? Dimngegka ngata idi imbagana kenka nga inkeddeng ti Dios a dadaelenna ti siudad ti Sodoma? Wenno impagarupmo nga agang-angaw laeng ni Lot, kas iti panangipapan dagiti manugangenna koma? Mabalin ngata nga inrugimon ti pumanaw ngem timmaliawka, kas iti asawa ni Lot? Saan a nangitaltalek dagiti dadduma, ngem idi aldaw nga ipapanaw ni Lot idiay Sodoma, “nagtudo iti apuy ken asupre manipud langit ket dinadaelna ida amin.”​—Lucas 17:28, 29.

Saan a mangikankano ti kaaduan a tattao iti kaaldawantayo. Ngem nailanad iti Sao ti Dios dagitoy a pasamak kas pakaballaagantayo, a manggutugot kadatayo nga AGTULTULOY NGA AGBANTAY!

[Kahon/Ladawan iti panid 22]

Talaga Kadi nga Adda Napasamak a Sangalubongan a Layus?

Awan, kuna ti adu a kritiko. Ngem adda, kuna ti Biblia.

Dinakamat dayta ni Jesu-Kristo a mismo, ken sibibiag idi napasamak dayta, a nakitana manipud langit.

[Kahon/Ladawan iti panid 23]

Pudno Kadi a Nadadael ti Sodoma ken Gomorra?

Paneknekan ti arkeolohia daytoy a pasamak.

Nadakamat dayta iti sekular a historia.

Pinasingkedan ni Jesu-Kristo dayta a pasamak, ken nailanad iti 14 a nagduduma a libro ti Biblia.