Leksion 6

Ania ti Pagarian ti Dios?

Sadino ti ayan ti Pagarian ti Dios? (1)

Siasino ti Arina? (2)

Adda kadi dadduma pay a makipagturay iti Ari? No adda, manoda? (3)

Ania ti mangipakita nga agbibiagtayon iti maudi nga al-aldaw? (4)

Anianto ti aramiden ti Pagarian ti Dios maipaay iti sangatauan iti masanguanan? (5-7)

1. Idi adda ditoy daga, insuro ni Jesus dagiti pasurotna nga ikararagda ti Pagarian ti Dios. Ti pagarian ket maysa a gobierno nga idauluan ti ari. Maysa a naisangsangayan a gobierno ti Pagarian ti Dios. Naipasdek dayta idiay langit ket iturayannanto daytoy a daga. Dayta ti mangsantipikar, wenno mamagsanto, iti nagan ti Dios. Babaen iti dayta, maaramidto ti pagayatan ti Dios ditoy daga a kas sadi langit.—Mateo 6:9, 10.

2. Inkari ti Dios nga agbalinto ni Jesus nga Ari ti Pagarianna. (Lucas 1:30-33) Idi adda ni Jesus ditoy daga, pinaneknekanna nga agbalinto a naasi, nalinteg, ken awan pagkuranganna nga Agturay. Idi nagsubli idiay langit, saan a naitrono a dagus kas Ari ti Pagarian ti Dios. (Hebreo 10:12, 13) Idi 1914, inted ni Jehova ken Jesus ti kinaturay nga inkarina kenkuana. Manipud idin, agturturayen ni Jesus idiay langit a kas Ari a dinutokan ni Jehova.—Daniel 7:13, 14.

3. Nangpili met ni Jehova iti sumagmamano a matalek a lallaki ken babbai ditoy daga a mapan idiay langit. Makipagturaydanto ken Jesus kas ar-ari, uk-ukom, ken papadi iti sangatauan. (Lucas 22:28-30; Apocalipsis 5:9, 10) Inawagan ni Jesus dagitoy a makipagturay iti Pagarianna iti “bassit nga ipastoran.” Agdagupda iti 144,000.—Lucas 12:32; Apocalipsis 14:1-3.

4. Apaman a nagbalin nga Ari ni Jesus, pinaksiatna ni Satanas ken dagiti dakes nga anghelna idiay langit ket intapuakna ida iti kaparanget ti daga. Dayta ti gapuna a nagbalin a nakadakdakes ti kasasaad ditoy daga manipud idi 1914. (Apocalipsis 12:9, 12) Dagiti gubat, bisin, angol, kumarkaro a kinakillo—paset amin dagitoy ti “pagilasinan” a mangipasimudaag nga  agturturayen ni Jesus ken addan daytoy a sistema iti maudi nga al-aldawna.—Mateo 24:3, 7, 8, 12; Lucas 21:10, 11; 2 Timoteo 3:1-5.

5. Din agbayag, ukomento ni Jesus dagiti tattao, a paglalasinenna ida a kas iti panamaglalasin ti maysa a pastor kadagiti karnero ken kalding. Dagiti “karnero” isu dagidiay mapaneknekan a nasungdo nga iturayanna. Awatendanto ti biag nga agnanayon ditoy daga. Dagiti “kalding” isu dagidiay mangilaksid iti Pagarian ti Dios. (Mateo 25:31-34, 46) Iti asidegen a masanguanan, dadaelento ni Jesus amin nga arig kalding a tattao. (2 Tesalonica 1:6-9) No kayatyo ti agbalin a maysa kadagiti “karnero” ni Jesus, masapul nga ipangagyo ti mensahe ti Pagarian ket agtignaykayo a mayannurot iti maad-adalyo.—Mateo 24:14.

6. Nabingaybingay ita ti daga iti adu a pagilian. Tunggal maysa adda bukodna a gobierno. Masansan nga agbibinnusor dagitoy a nasion. Ngem sukatánto ti Pagarian ti Dios amin a gobierno ti tao. Daytanto laeng a gobierno ti agturay iti intero a daga. (Daniel 2:44) Iti kasta awanton ti gubat, krimen, ken kinaranggas. Agbiagto amin a tattao iti talna ken panagkaykaysa.—Mikias 4:3, 4.

7. Bayat ti Sangaribu a Tawen a Panagturay ni Jesus, agbalinto a perpekto dagiti matalek a tattao, ket agbalinto a paraiso ti intero a daga. Iti ngudo ti sangaribu a tawen, nairingpaston ni Jesus amin a pinaaramid ti Dios kenkuana. Kalpasanna iyawatnanto ti Pagarian iti Amana. (1 Corinto 15:24) Apay a diyo ibaga kadagiti gagayyem ken patpatgenyo ti maipapan iti aramidento ti Pagarian ti Dios?

[Ladawan iti panid 13]

Iti sidong ti panagturay ni Jesus, awanton ti guranggura wenno panangidumduma