Leksion 8

Biag ti Pamilia a Makaay-ayo iti Dios

Ania ti akem ti asawa a lalaki iti pamilia? (1)

Kasano komat’ panangtrato ti asawa a lalaki ken ni baketna? (2)

Ania dagiti pagrebbengan ti ama? (3)

Ania ti akem ti asawa a babai iti pamilia? (4)

Ania ti kalikaguman ti Dios kadagiti nagannak ken annak? (5)

Ania ti kuna ti Biblia maipapan iti panagsina ken diborsio? (6, 7)

1. Kunaen ti Biblia a ti asawa a lalaki ti ulo ti pamiliana. (1 Corinto 11:3) Masapul a maymaysa laeng ti asawa ti lalaki. Masapul a nagkasarda a mayannurot iti linteg.—1 Timoteo 3:2; Tito 3:1.

2. Rebbeng nga ayaten ti asawa a lalaki ni baketna a kas iti panagayatna iti bagina. Rebbeng a tratuenna a kas iti panangtrato ni Jesus kadagiti pasurotna. (Efeso 5:25, 28, 29) Dina koma kabilen wenno ranggasan ni baketna iti aniaman a pamay-an. Rebbeng ketdi a padayawan ken raemenna.—Colosas 3:19; 1 Pedro 3:7.

3. Rebbeng nga igaed ti maysa nga ama ti agtrabaho tapno maaywanan ti pamiliana. Masapul nga ipaayna ti taraon, pagan-anay, ken pagtaengan a kasapulan ni baketna ken dagiti annakna. Masapul met nga ipaay ti ama dagiti naespirituan a kasapulan ti pamiliana. (1 Timoteo 5:8) Mangidaulo iti panangtulong iti pamiliana a makasursuro maipapan iti Dios ken kadagiti panggepna.—Deuteronomio 6:4-9; Efeso 6:4.

4. Rebbeng nga agbalin ti asawa a babai a nasayaat a kabinnulig ni lakayna. (Genesis 2:18) Rebbeng a tulonganna ni lakayna a mangisuro ken mangsanay kadagiti annakda. (Proverbio 1:8) Kalikaguman ni Jehova iti asawa a babai a siaayat nga aywananna ti pamiliana. (Proverbio 31:10, 15, 26, 27; Tito 2:4, 5) Rebbeng nga addaan iti nauneg a panagraem ken ni lakayna.—Efeso 5:22, 23, 33.

5. Kalikaguman ti Dios kadagiti annak  nga agtulnogda kadagiti dadakkelda. (Efeso 6:1-3) Namnamaenna nga isuro ken aturen dagiti nagannak ti annakda. Masapul nga adda panawen dagiti nagannak kadagiti annakda ken sangsangkamaysa nga adalenda ti Biblia, nga ipaayda dagiti naespirituan ken emosional a kasapulanda. (Deuteronomio 11:18, 19; Proverbio 22:6, 15) Saan koma a naranggas wenno naulpit ti panangdisiplina dagiti nagannak iti annakda.—Colosas 3:21.

6. No adda di pagtunosan ti agassawa, ikagumaanda koma nga iyaplikar ti pammagbaga ti Biblia. Idagadag ti Biblia nga ipakitatay ti ayat ken agbalintay a manangpakawan. (Colosas 3:12-14) Saan nga iparegta ti Sao ti Dios ti panagsina kas pangrisut iti babassit a parikut. Ngem mabalin nga ikeddeng ti asawa a babai a panawan ni lakayna no (1) ipatangkenna a di suportaran ti pamiliana, (2) naulpit unay nga uray la agpeggad ti salun-at ken biagna, wenno (3) nakaro unay ti panangbusorna a din makapagserbi ken Jehova.—1 Corinto 7:12, 13.

7. Masapul a matalek ti agassawa iti maysa ken maysa. Basol iti Dios ken iti asawa ti pannakikamalala. (Hebreo 13:4) Ti pannakidenna iti dimo asawa ti kakaisuna a Nainkasuratan a pakaibatayan ti diborsio a mangipalubos iti pannakiasawa manen. (Mateo 19:6-9; Roma 7:2, 3) Saan a maay-ayo ni Jehova no agdiborsio dagiti tao nga awan Nainkasuratan a pakaibatayan sada mangasawa wenno makiasawa iti sabali.—Malakias 2:14-16.

[Dagiti Ladawan iti panid 16, 17]

Namnamaen ti Dios nga isuro ken aturen dagiti nagannak ti annakda

[Ladawan iti panid 17]

Ipaay ti naayat nga ama dagiti material ken naespirituan a kasapulan ti pamiliana