Leksion 11

Dagiti Sursuro ken Kaugalian a Di Makaay-ayo iti Dios

Ania dagiti di umiso a kita ti sursuro ken kaugalian? (1)

Rumbeng aya a patien dagiti Kristiano a Trinidad ti Dios? (2)

Apay a di rambakan dagiti pudno a Kristiano ti Krismas, Easter, wenno kasangay? (3, 4)

Madangran aya ti natay dagiti nabiag? (5)

Natay aya ni Jesus iti krus? (6)

Kasanot’ kapateg ti panangay-ayo iti Dios? (7)

1. Saan nga amin a sursuro ken kaugalian ket dakes. Ngem saan nga anamongan ti Dios dagitoy no aggapuda iti ulbod a relihion wenno di maitunos iti sursuro ti Biblia.—Mateo 15:6.

2. Trinidad: Maysa aya a Trinidad ni Jehova—tallo a persona iti maymaysa a Dios? Saan! Ni Jehova, ti Ama, isu “ti maymaysa a pudno a Dios.” (Juan 17:3; Marcos 12:29) Ni Jesus ti inauna nga Anakna, ken adda iti babaen ti Dios. (1 Corinto 11:3) Ti Ama natantan-ok ngem ti Anak. (Juan 14:28) Saan a persona ti nasantuan nga espiritu; isu dayta ti aktibo a puersa ti Dios.—Genesis 1:2; Aramid 2:18.

3. Krismas ken Easter: Saan a nayanak ni Jesus iti Disiembre 25. Nayanak iti agarup Oktubre 1, tiempo ti tawen a dagiti pastor inaywananda dagiti arbanda iti away iti rabii. (Lucas 2:8-12) Pulos a di binilin ni Jesus dagiti Kristiano a rambakanda ti pannakayanakna. Imbes ketdi, binilinna dagiti adalanna a laglagipenda ti ipapatayna. (Lucas 22:19, 20) Namunganay ti Krismas ken dagiti kaugalian a nainaig iti dayta kadagiti nagkauna nga ulbod a relihion. Pudno met dayta kadagiti kaugalian iti Easter, kas iti panagusar kadagiti itlog ken koneho. Saan a rinambakan dagiti nagkauna a Kristiano ti Krismas wenno ti Easter, ket saan met a rambakan dagiti pudno a Kristiano ita.

4. Kasangay: Adda laeng dua a kasangay a nadakamat iti Biblia a rinambakan dagiti tao a saan nga agdaydayaw ken Jehova. (Genesis 40:20-22; Marcos 6:21,  22, 24-27) Saan a rinambakan dagiti nagkauna a Kristiano dagiti kasangay. Namunganay kadagiti nagkauna nga ulbod a relihion ti kaugalian a panangrambak kadagiti kasangay. Agregalo ken agraragsak dagiti pudno a Kristiano iti dadduma nga aldaw ti tawen.

5. Panagbuteng Kadagiti Natay: Awan a pulos ti maaramidan wenno rikna dagiti natay. Saantay a matulongan ida, ken saandatayo a madangran. (Salmo 146:4; Eclesiastes 9:5, 10) Matay ti kararua; saan nga agtultuloy nga agbiag kalpasan ti ipapatay. (Ezequiel 18:4) Ngem no dadduma, manglimlimo dagiti dakes nga anghel, a maaw-awagan demonio, kas espiritu dagiti natay. Di umiso ti aniaman a kaugalian a nainaig iti panagbuteng wenno panagdayaw kadagiti natay.—Isaias 8:19.

6. Krus: Saan a natay ni Jesus iti krus. Natay iti maysa a poste, wenno istaka. Ti Griego a sao a naipatarus a “krus” iti adu a Biblia kaipapananna laeng ti maymaysa a kayo. Namunganay ti simbolo ti krus kadagiti nagkauna nga ulbod a relihion. Saan a nagusar wenno nagdaydayaw iti krus dagiti nagkauna a Kristiano. Gapuna, iti panagkunayo umiso ngata nga usaren ti krus iti panagdayaw?—Deuteronomio 7:26; 1 Corinto 10:14.

7. Mabalin a narigat nga iwaksi ti dadduma kadagitoy a sursuro ken kaugalian. Mabalin a kombinsirendakayo dagiti kakabagian ken gagayyem a diyo baliwan ti pammatiyo. Ngem napatpateg ti panangay-ayo iti Dios ngem ti panangay-ayo kadagiti tao.—Proverbio 29:25; Mateo 10:36, 37.

[Ladawan iti panid 22]

Saan a Trinidad ti Dios

[Ladawan iti panid 23]

Namunganay ti Krismas ken Easter kadagiti nagkauna nga ulbod a relihion

[Ladawan iti panid 23]

Awan ti rason tapno dayawen dagiti natay wenno kabuteng ida