Leksion 13

Kasanoyo a Masarakan ti Pudno a Relihion?

Makaay-ayo aya iti Dios amin a relihion, wenno maymaysa laeng? (1)

Apay a nakaad-adu dagiti relihion nga agkunkuna a Kristiano? (2)

Kasanoyo a mailasin dagiti pudno a Kristiano? (3-7)

1. Rinugian ni Jesus ti maysa a pudno a Kristiano a relihion. Isu nga adda laeng maymaysa a bunggoy, wenno grupo, dagiti pudno nga agdaydayaw ken Jehova a Dios ita. (Juan 4:23, 24; Efeso 4:4, 5) Isursuro ti Biblia a manmano laeng a tattao ti adda iti nailet a dalan nga agturong iti biag.—Mateo 7:13, 14.

2. Impadto ti Biblia a kalpasan ti ipapatay dagiti apostol, in-inut a makastrek iti kongregasion Kristiano dagiti di umiso a sursuro ken di-Nakristianuan nga aramid. Guyugoyen ti tattao dagiti manamati a sumurot kadakuada imbes a ken Kristo. (Mateo 7:15, 21-23; Aramid 20:29, 30) Dayta ti gapuna a nakaad-adu ti makitatayo a relihion nga agkunkuna a Kristiano. Kasanotay a mailasin dagiti pudno a Kristiano?

3. Ti kangrunaan a pakailasinan dagiti pudno a Kristiano isu ti panagiinnayatda. (Juan 13:34, 35) Saanda a nasursuruan a mangipagarup a nasaysayaatda ngem kadagiti tattao a saanda a kapulian wenno kakudkudil. Saanda met a nasursuruan a gumura kadagiti tattao a saanda a kailian. (Aramid 10:34, 35) Isu a saanda a makiraman kadagiti gubat. Agkakabsat ti pangibilangan dagiti pudno a Kristiano iti maysa ken maysa.—1 Juan 4:20, 21.

4. Ti sabali pay a pakailasinan ti pudno a relihion isu ti nauneg a panagraem iti Biblia dagiti kamengna. Awatenda dayta kas Sao ti Dios ken patienda ti ibagbagana. (Juan 17:17; 2 Timoteo 3:16, 17) Ibilangda ti Sao ti Dios a napatpateg ngem kadagiti kapanunotan wenno kaugalian ti tao. (Mateo 15:1-3, 7-9) Ikagumaanda ti agbiag a mayannurot iti Biblia iti inaldaw a  panagbiagda. Saanda a mangikasaba iti maysa a banag sa sabali ti aramidenda.—Tito 1:15, 16.

5. Ti pudno a relihion masapul met nga idaydayawna ti nagan ti Dios. (Mateo 6:9) Impakaammo ni Jesus kadagiti sabsabali ti nagan ti Dios, a Jehova. Kasta met ti rebbeng nga aramiden dagiti pudno a Kristiano. (Juan 17:6, 26; Roma 10:13, 14) Iti lugaryo, siasino dagiti tattao a mangipakpakaammo iti nagan ti Dios kadagiti sabsabali?

6. Dagiti pudno a Kristiano masapul nga ikasabada ti Pagarian ti Dios. Kasta ti inaramid ni Jesus. Kanayon nga insarsaritana ti maipapan iti Pagarian. (Lucas 8:1) Binilinna dagiti adalanna nga ikasabada daytoy a mensahe iti intero a daga. (Mateo 24:14; 28:19, 20) Patien dagiti pudno a Kristiano a ti laeng Pagarian ti Dios ti mangyeg iti pudno a talna ken talged ditoy daga.—Salmo 146:3-5.

7. Masapul a saan a paset daytoy dakes a lubong dagiti adalan ni Jesus. (Juan 17:16) Saanda a makiraman kadagiti napolitikaan nga aramid ken sosial a susik daytoy a lubong. Liklikanda dagiti makadangran a kababalin, aramid, ken ugali a kadawyan iti lubong. (Santiago 1:27; 4:4) Adda kadi ammoyo a narelihiosuan a grupo iti lugaryo nga addaan kadagitoy a pakailasinan ti pudno a Kinakristiano?

[Dagiti Ladawan iti panid 26, 27]

Dagiti pudno a Kristiano agiinnayatda, raemenda ti Biblia, ken ikasabada ti Pagarian ti Dios