Leksion 12

Panangipakita iti Panagraem iti Biag ken Dara

Kasano komat’ panangmatmattayo iti biag? (1) aborsion? (1)

Kasano a maipakita dagiti Kristiano a sipapanunotda iti kinatalged? (2)

Dakes kadi ti pumatay kadagiti animal? (3)

Ania dagiti sumagmamano nga aramid a mangipakita iti kaawan panagraem iti biag? (4)

Ania ti linteg ti Dios maipapan iti dara? (5)

Iraman kadi daytoy ti panangyalison iti dara? (6)

1. Ni Jehova ti Ubbog ti biag. Ti Dios ti nakautangan ti amin a sibibiag a parsua iti biagda. (Salmo 36:9) Ti biag sagrado iti Dios. Napateg ken Jehova uray ti biag ti di pay naipasngay nga ubing nga adda iti tian ti inana. Di umiso iti imatang ti Dios ti inggagara a panangpapatay iti dayta a mabukbukel a maladaga.—Exodo 21:22, 23; Salmo 127:3.

2. Sipapanunot dagiti pudno a Kristiano iti kinatalged. Siguraduenda a natalged dagiti lugan ken pagtaenganda. (Deuteronomio 22:8) Saan nga isagmak dagiti adipen ti Dios ti biagda gapu laeng iti ragragsak wenno gagar. Isu a saanda a makiraman kadagiti naranggas nga ay-ayam a nairanta a mangdangran iti sabsabali a tattao. Liklikanda ti paglinglingayan a mangiparegta iti kinaranggas.—Salmo 11:5; Juan 13:35.

 3. Sagrado met iti Namarsua ti biag ti animal. Mabalin a patayen ti maysa a Kristiano dagiti animal a pagtaraon ken pagkawes wenno tapno salakniban ti bagina iti sakit ken peggad. (Genesis 3:21; 9:3; Exodo 21:28) Ngem di umiso a ranggasan dagiti animal wenno patayen ida a pagay-ayaman wenno pagraragsakan laeng.—Proverbio 12:10.

4. Saan a maiparbeng kadagiti Kristiano ti panagsigarilio, panagmamá, ken panagdroga kas pagraragsakan. Di umiso dagitoy nga aramid gapu ta (1) adipenendatayo, (2) dangranda ti bagitayo, ken (3) narugit dagitoy. (Roma 6:19; 12:1; 2 Corinto 7:1) Mabalin a narigat nga isardeng dagitoy a bisio. Ngem masapul nga isardengtayo tapno maay-ayo ni Jehova.

5. Sagrado met iti imatang ti Dios ti dara. Kuna ti Dios a ti kararua, wenno biag, adda iti dara. Isu a dakes ti mangan iti dara. Dakes met ti agsida iti karne ti animal a saan a napadara a naimbag. No nabekkel wenno natay iti palab-og ti maysa nga animal, di rumbeng a sidaen. No nagayang wenno napaltogan, masapul a mapadara a dagus tapno mabalin a sidaen.—Genesis 9:3, 4; Levitico 17:13, 14; Aramid 15:28, 29.

6. Dakes kadi ti agpayalison iti dara? Laglagipenyo, kalikaguman ni Jehova nga adaywantay ti dara. Kaipapanan daytoy a di rumbeng nga ipaunegtayo iti bagitayo iti aniaman a pamay-an ti dara ti sabali a tao wenno uray ti bukodtayo a naipreserba a dara. (Aramid 21:25) Isu a saan nga agpayalison iti dara dagiti pudno a Kristiano. Awatenda ti dadduma a kita ti panangagas, kas iti panangyalison kadagiti produkto nga awan laokna a dara. Kayatda ti agbiag, ngem saanda a gandaten nga isalbar ti biagda babaen ti pananglabsing kadagiti linteg ti Dios.—Mateo 16:25.

[Dagiti Ladawan iti panid 25]

Tapno maay-ayo ti Dios, masapul nga idiantayo ti panangyalison iti dara, narurugit a bisio, ken dagiti maliklikan a risgo