Leksion 3

Siasino ni Jesu-Kristo?

Apay a maawagan ni Jesus iti “inauna” nga Anak ti Dios? (1)

Apay a maawagan a “ti Sao”? (1)

Apay nga immay ni Jesus ditoy daga kas tao? (2-4)

Apay a nangaramid kadagiti milagro? (5)

Anianto ti aramiden ni Jesus iti asidegen a masanguanan? (6)

1. Nagbiag ni Jesus idiay langit kas espiritu a persona sakbay nga immay ditoy daga. Isu ti immuna a pinarsua ti Dios, isu a maawagan iti “inauna” nga Anak ti Dios. (Colosas 1:15; Apocalipsis 3:14) Ni Jesus ti kakaisuna nga Anak a pinarsua ti Dios a mismo. Inusar ni Jehova ni Jesus sakbay a nagbalin a tao kas “nasigo a trabahador[na]” iti panangparsua iti amin a sabsabali pay a bambanag idiay langit ken ditoy daga. (Proverbio 8:22-31; Colosas 1:16, 17) Inusar met ti Dios kas kangrunaan a pannakangiwatna. Dayta ti gapuna a maawagan ni Jesus a “ti Sao.”—Juan 1:1-3; Apocalipsis 19:13.

2. Imbaon ti Dios ti Anakna ditoy daga babaen ti panangyallatiwna iti biagna iti aanakan ni Maria. Isu nga awan ti tao nga ama ni Jesus. Dayta ti gapuna a saan a nagtawid iti aniaman a basol wenno kinaimperpekto. Adda tallo a makagapu nga imbaon ti Dios ni Jesus ditoy daga: (1) Tapno isurona kadatayo ti kinapudno maipapan iti Dios (Juan 18:37), (2) tapno salimetmetanna ti naan-anay a kinatarnaw, a mangipaay iti pagwadan a tuladentayo (1 Pedro 2:21), ken (3) tapno idatonna ti biagna a mangruk-at kadatayo manipud basol ken ipapatay. Apay a kasapulan daytoy?—Mateo 20:28.

3. Idi sinalungasingna ti bilin ti Dios, nakaaramid ni Adan, ti immuna a tao, iti aw-awagan ti Biblia a “basol.” Isu a kinedngan ti Dios a matay. (Genesis 3:17-19) Saannan a magaw-at dagiti pagalagadan ti Dios, isu a saanen a perpekto. Nagin-inut a limmakay agingga a natay. Impatawid ni Adan ti basol kadagiti amin nga annakna. Dayta ti gapuna a lumakay, agsakit, ken mataytayo  met. Kasano a maisalakan ti sangatauan?—Roma 3:23; 5:12.

4. Maysa idi ni Jesus a perpekto a tao a kas ken Adan. Nupay kasta, saan a kas ken Adan, naan-anay a nagtulnog ni Jesus iti Dios uray iti sidong ti karigatan a pannubok. Isut’ gapuna a mabalinna nga idaton ti perpekto a natauan a biagna tapno mabayadan ti basol ni Adan. Daytoy ti aw-awagan ti Biblia a “subbot.” Iti kasta, mawayawayaan dagiti annak ni Adan iti lunod ni patay. Mapakawan ti basbasol dagiti amin a mamati ken Jesus ken umawatda iti biag nga agnanayon.—1 Timoteo 2:5, 6; Juan 3:16; Roma 5:18, 19.

5. Idi adda ditoy daga, pinaimbag ni Jesus dagiti masakit, pinakanna dagiti mabisin, ken pinagtalnana dagiti bagyo. Pinagungarna pay dagiti natay. Apay a nangaramid kadagiti milagro? (1) Naasian kadagiti tao nga agsagsagaba, ket kayatna a tulongan ida. (2) Pinaneknekan dagiti milagrona nga isu ti Anak ti Dios. (3) Impakitada no anianto ti aramidenna maipaay iti natulnog a sangatauan inton agturay a kas Ari iti intero a daga.—Mateo 14:14; Marcos 2:10-12; Juan 5:28, 29.

6. Natay ni Jesus ket pinagungar ti Dios kas espiritu a parsua, sa nagsubli sadi langit. (1 Pedro 3:18) Manipud idin, insaad ti Dios a kas Ari. Din agbayag pukawento ni Jesus amin a kinadakes ken panagsagaba ditoy daga.—Salmo 37:9-11; Proverbio 2:21, 22.

[Dagiti Ladawan iti panid 7]

Nairaman iti ministerio ni Jesus ti panangisuro, panangaramid kadagiti milagro, ken uray ti panangidatonna iti biagna maipaay kadatayo