Leksion 4

Siasino ti Diablo?

Ni Satanas a Diablo—sadino ti nagtaudanna? (1, 2)

Kasano nga al-allilawen ni Satanas dagiti tao? (3-7)

Apay a nasken a sarangtenyo ti Diablo? (7)

1. Mammardaya ti kayat a sawen ti sao a “diablo.” Kabusor wenno bumusbusor ti kayat a sawen ti “satanas.” Dagitoy ti awag iti kangrunaan a kabusor ti Dios. Idi damo, maysa a perpekto nga anghel idiay langit a kadua ti Dios. Nupay kasta, dimteng ti panawen a timmangsit ket kayatna nga alaen ti dayaw nga agpaay laeng iti Dios.—Mateo 4:8-10.

2. Nakisao daytoy nga anghel, ni Satanas, ken ni Eva babaen ti maysa nga uleg. Babaen ti panagulbodna, naallukoyna nga agsukir iti Dios. No kasta, inatakar ni Satanas ti maaw-awagan “kinasoberano” ti Dios, wenno ti saadna kas Kangatuan. Pinagduaduaan ni Satanas no maikari ti wagas a panangituray ti Dios ken no agpaay a pagimbagan ti amin nga iturayanna. Pinagduaduaan met ni Satanas no adda asinoman a tao nga agtalinaed a napudno iti Dios. Iti kastoy nga inaramidna, pinagbalin ni Satanas ti bagina a kabusor ti Dios. Dayta ti gapuna a naawagan iti Satanas a Diablo.—Genesis 3:1-5; Job 1:8-11; Apocalipsis 12:9.

3. Ikagkagumaan ni Satanas nga allilawen dagiti tao tapno agdayawda kenkuana. (2 Corinto 11:3, 14) Ti maysa a pamay-anna a mangyaw-awan kadagiti tao isu ti ulbod a relihion. No kinaulbod ti isursuro ti maysa a relihion maipapan iti Dios, kinaagpaysona serserbianna ti panggep ni Satanas. (Juan 8:44) Mabalin a sipapasnek a patien dagiti tao a kameng dagiti ulbod a relihion nga agdaydayawda iti pudno a Dios. Ngem iti kinapudnona, agserserbida ken Satanas. Isu ‘ti dios daytoy a lubong.’—2 Corinto 4:4.

4. Ti sabali pay a pamay-an ni Satanas a mangtengngel kadagiti tao isu ti espiritismo. Mabalin nga umawagda kadagiti espiritu tapno salaknibanda ida, tapno dangran dagiti sabsabali, tapno ipadto ti masakbayan, wenno tapno agaramid kadagiti milagro. Ni Satanas ti dakes a puersa nga adda iti likud amin dagitoy nga aramid. Tapno maay-ayo ti Dios, masapul nga awan pakainaigantayo iti espiritismo.—Deuteronomio 18:10-12; Aramid 19:18, 19.

5. Al-allilawen met ni Satanas dagiti tao babaen ti nalabes a panangipannakkel iti pulí ken panagdayaw kadagiti napolitikaan nga organisasion. Ipagarup ti dadduma  a nasaysayaat ti nasion wenno pulída ngem kadagiti sabsabali. Ngem saan a pudno daytoy. (Aramid 10:34, 35) Agpannuray ti dadduma a tao kadagiti napolitikaan nga organisasion a mangrisut kadagiti parikut ti tao. Iti kasta, laklaksidenda ti Pagarian ti Dios. Dayta ti kakaisuna a solusion kadagiti parikuttayo.—Daniel 2:44.

6. Ti maysa pay a pamay-an ni Satanas a mangyaw-awan kadagiti tao isu ti panangsulisogna kadakuada kadagiti dakes a tarigagay. Imbilin ni Jehova a liklikantay dagiti dakes nga aramid gapu ta ammona a dangrannatayo dagitoy. (Galacia 6:7, 8) Mabalin a kayat ti dadduma a tao a makiramankayo kadakuada iti kakasta nga aramid. Ngem, laglagipenyo a ni Satanas ti talaga nga agtarigagay nga aramidenyo dagitoy a banag.—1 Corinto 6:9, 10; 15:33.

7. Mabalin nga usaren ni Satanas ti panangidadanes wenno ibubusor tapno paglikudanyo ni Jehova. Mabalin a makapungtot unay ti dadduma kadagiti patpatgenyo gapu ta agad-adalkayo iti Biblia. Mabalin nga umsiendakayo ti dadduma. Ngem siasino ti nakautanganyo iti biagyo? Kayatnakay a butbutngen ni Satanas tapno isardengyo ti agsursuro maipapan ken Jehova. Dikay agpaabak ken Satanas! (Mateo 10:34-39; 1 Pedro 5:8, 9) No sarangtenyo ti Diablo, maparagsakyo ni Jehova ken maipakitayo nga itantandudoyo ti kinasoberanona.—Proverbio 27:11.

[Dagiti Ladawan iti panid 9]

Ti ulbod a relihion, espiritismo, ken nasionalismo iyaw-awanna dagiti tao

[Ladawan iti panid 9]

Sarangtenyo ni Satanas babaen ti agtultuloy a panagsursuroyo maipapan ken Jehova