Leksion 2

Siasino ti Dios?

Siasino ti pudno a Dios, ken ania ti naganna? (1, 2)

Ania a kita ti bagi ti adda kenkuana? (3)

Ania dagiti kangrunaan a galadna? (4)

Rumbeng kadi nga agusartayo kadagiti imahen ken simbolo iti panagdayawtayo kenkuana? (5)

Ania ti dua a pamay-an a maam-ammotayo ti Dios? (6)

1. Adu ti daydayawen dagiti tao. Ngem kunaen ti Biblia kadatayo a maymaysa laeng ti PUDNO a Dios. Pinarsuana amin a banag idiay langit ken ditoy daga. Gapu ta isu ti nangted kadatayo iti biag, Isu laeng ti rumbeng a dayawentayo.—1 Corinto 8:5, 6; Apocalipsis 4:11.

2. Adu ti titulo ti Dios ngem maymaysa laeng ti naganna. JEHOVA dayta a nagan. Iti kaaduan a Biblia, naikkat ti nagan ti Dios ket nasuktan iti titulo nga APO wenno DIOS. Ngem idi naisurat ti Biblia, agarup 7,000 a daras a nagparang iti dayta ti nagan a Jehova!—Exodo 3:15; Salmo 83:18.

3. Adda bagi ni Jehova, ngem saan a kas iti bagitayo. “Ti Dios maysa nga Espiritu,” kuna ti Biblia. (Juan 4:24) Ti espiritu ket maysa a porma ti biag a natantan-ok nga adayo ngem iti biagtayo. Awan ti  tao a nakakita iti Dios uray kaano. Agnanaed ni Jehova idiay langit, ngem makitana amin a banag. (Salmo 11:4, 5; Juan 1:18) Ngem, ania ti nasantuan nga espiritu? Saan a maysa a persona a kas iti Dios. Ngem ketdi, isu dayta ti aktibo a puersa ti Dios.—Salmo 104:30.

4. Ipalgak kadatayo ti Biblia ti personalidad ni Jehova. Ipakitana a dagiti kangrunaan a galadna isu ti ayat, kinahustisia, kinasirib, ken pannakabalin. (Deuteronomio 32:4; Job 12:13; Isaias 40:26; 1 Juan 4:8) Kunaen kadatayo ti Biblia nga isu ket naasi, mannakaawat, manangpakawan, naparabur, ken naanus met. Datayo, kas kadagiti natulnog nga annak, ikagumaantay koma a tuladen.—Efeso 5:1, 2.

5. Rumbeng kadi nga agrukbab wenno agkararagtayo kadagiti imahen, ladawan, wenno simbolo iti panagdayawtayo? Saan! (Exodo 20:4, 5) Kuna ni Jehova nga isu laeng ti masapul a dayawentayo. Saanna nga iranud ti dayagna iti asinoman wenno iti aniaman a banag. Awan pannakabalin dagiti imahen a tumulong kadatayo.—Salmo 115:4-8; Isaias 42:8.

6. Kasano nga ad-adda a maam-ammotayo ti Dios? Ti maysa a pamay-an isu ti panangpaliiw kadagiti banag a pinarsuana ken panangutob iti ibagbagada kadatayo. Ipakita kadatayo dagiti parsua ti Dios a naindaklan ti pannakabalin ken siribna. Makitatayo ti ayatna iti amin nga inaramidna. (Salmo 19:1-6; Roma 1:20) Ti maysa pay a pamay-an a maam-ammotayo ti Dios isu ti panagadal iti Biblia. Iti dayta adu pay ti ibagana kadatayo maipapan iti kina-Diosna. Ibagana met kadatayo ti panggepna ken no ania ti kayatna nga aramidentayo.—Amos 3:7; 2 Timoteo 3:16, 17.

[Dagiti Ladawan iti panid 5]

Maam-ammotayo ti Dios babaen ti sangaparsuaan ken ti Biblia