Salsaludsod a Masansan nga Iyimtuod Dagiti Interesado a Tattao

No ti Dios ket ayat, apay a palpalubosanna ti kinadakes?

PUDNO a palpalubosan ti Dios ti kinadakes, ket gaggagaraen ti minilion a tattao ditoy daga ti agaramid iti dakes. Kas pagarigan, makigubatda, tinnaganda iti bomba dagiti ubbing, tikagenda ti daga, ken mamataudda iti bisin. Minilion ti agsigsigarilio a pakaalaanda iti kanser iti bara, makiab-abig a pakaalaanda kadagiti sakit a mayakar babaen iti sekso, agar-aramat iti sobra nga alkohol a pakaalaanda iti cirrhosis ti dalem, ken dadduma pay. Talaga a saan a kayat dagita a tattao a sumardeng ti amin a kinadakes. Kayatda laeng a maikkat dagiti supapak iti panangaramid iti dayta. No apitendan ti immulada, iyasugda, “Apay a siak?” Ket pabasolenda ti Dios, a kas kuna ti Proverbio 19:3: “Ti mismo a kinamaag ti tao isu ti mangdadael iti biagna, sananto kagura ti APO.” (The New English Bible) Ket no pasardengen ti Dios ti dakes nga aramidda, ireklamoda ti kaawan wayawayada a mangaramid iti dayta!

Ti kangrunaan a rason ni Jehova a nangpalubos iti kinadakes ket tapno masungbatan ti karit ni Satanas. Kinuna ni Satanas a Diablo a saanto a makaikabil ti Dios iti tattao ditoy daga nga agmatalek Kenkuana iti sidong ti pannubok. (Job 1:6-12; 2:1-10) Pinalubosan ni Jehova nga agtalinaed ni Satanas tapno adda gundawayna a mangpaneknek iti karitna. (Exodo 9:16) Agtultuloy a mangdiddidigra ni Satanas ita, pagtallikudenna dagiti tattao iti Dios, bayat ti panangpadpadasna a mangpaneknek iti karitna. (Apocalipsis 12:12) Nupay kasta, nagtalinaed a nasungdo ni Job. Uray met ni Jesus. Kasta met ti ar-aramiden ita dagiti pudno a Kristiano.​—Job 27:5; 31:6; Mateo 4:1-11; 1 Pedro 1:6, 7.

Kayatko ti mamati iti paraiso a daga a pagbiaganto dagiti tattao iti agnanayon, ngem saan kadi a narigat a patien dayta?

Saan sigun iti Biblia. Kasla narigat a patien dayta gapu laeng ta agrigrigat ti sangatauan iti adun a siglo. Pinarsua ni Jehova ti daga ket kinunana iti tattao a punnuenda dayta iti nalinteg a lallaki ken babbai a mangaywan iti mulmula ken an-animal nga adda iti dayta ken pagtalinaedenda ti kinapintasna imbes a dadaelenda. (Kitaenyo ti panid 12 ken 17.) Imbes a ti naikari a Paraiso ti narigat a patien, ti agdama a naladingit a kasasaad ket dakes unayen tapno agtultuloy pay. Masukatanto dayta iti Paraiso.

 Kasano ti panangsungbatko kadagiti tattao a manglais ken agkuna a ti Biblia ket sarsarita ken di nasientipikuan?

Ti pammati kadagitoy a kari ket saan a basta dagus lattan a panamati. “Ti pammati sumaruno iti banag a nangngeg.” Babaen ti panagadal iti Sao ti Dios, mailasintayo ti kinasirib nga adda iti dayta ket dumakkel ti pammatitayo.​—Roma 10:17; Hebreo 11:1.

Ti nainaig-Biblia nga arkeolohia ket mangipaay iti adu a pammatalged iti kinaumiso ti historia a nailanad iti Biblia. Ti pudno a siensia ket maitunos iti Biblia. Nabayagen nga adda iti Biblia dagitoy sumaganad a kinapudno sakbay a natakuatan dagiti sekular nga iskolar: ti agsasaganad a kasasaad a linasat ti daga iti itatanorna, nagtimbukel ti daga, nga agbitbitin iti awan iti law-ang, ken umakar dagiti tumatayab.​—Genesis, kapitulo 1; Isaias 40:22; Job 26:7; Jeremias 8:7.

Ipamatmat dagiti natungpalen a padto a ti Biblia ket naipaltiing. Impadto a nasaksakbay ni Daniel ti itatanor ken pannakaparmek dagiti pannakabalin ti lubong, kasta met ti tiempo nga iyaay ti Mesias ken pannakapapatayna. (Daniel, kapitulo 2, 8; 9:24-27) Ita, matungtungpal pay laeng ti dadduma a padto, a mangipampamatmat a dagitoyen dagiti “maudi nga al-aldaw.” (2 Timoteo 3:1-5; Mateo, kapitulo 24) Saan a kabaelan ti tao nga ibaga ti kasta a nasakbay a pannakaammo. (Isaias 41:23) Maipaay iti ad-adu pay a pammatalged, kitaenyo ti libro a Ti Biblia—Saot’ Dios Wenno iti Tao? ken ti Is There a Creator Who Cares About You?, nga impablaak ti Watchtower Bible and Tract Society.

Kasano a masursurok ti sumungbat iti salsaludsod mainaig iti Biblia?

Masapul nga adalenyo ti Biblia ken mennamennaenyo dayta, ken kiddawenyo met ti espiritu ti Dios a mangiwanwan kadakayo. (Proverbio 15:28; Lucas 11:9-13) “No ti asinoman kadakayo agkurang iti sirib,” kuna ti Biblia, “agtultuloy koma nga agdawat iti Dios, ta isu mangted a sipaparabur kadagiti isuamin ken awanan panangumsi; ket maitedto dayta kenkuana.” (Santiago 1:5) Adda met dagiti mapagkonsultaan a katulongan iti panagadal iti Biblia. Kadawyanen a kasapulan ti tulong ti sabsabali, a kas idi inyadalan ni Felipe ti Etiope. (Aramid 8:26-35) Mangidadaulo dagiti Saksi ni Jehova iti libre a panagadal iti Biblia kadagiti interesado a tattao iti pagtaenganda. Dikay bumdeng a kiddawen daytoy kadakuada.

Apay nga adu ti mangbusbusor kadagiti Saksi ni Jehova ken ibagbagada a diak makipagadal kadakuada?

Binusorda idi ti panangasaba ni Jesus, ket kinunana a busorenda met dagiti pasurotna. Idi adda naallukoy iti isursuro ni Jesus, kinuna dagiti relihioso a bumusbusor: “Nayaw-awankay kadi met? Adda aya maysa kadagiti agtuturay wenno kadagiti Fariseo ti naaddaan iti pammati kenkuana?” (Juan 7:46-48; 15:20) Dagidiay mangub-ublag kadakayo a makipagadal kadagiti Saksi  ket awananda iti pannakaammo wenno manangidumdumada. Makipagadalkayo kadagiti Saksi ket paliiwenyo a mismo no rumang-ay wenno saan ti pannakaammoyo iti Biblia.​—Mateo 7:17-20.

Apay a sarungkaran pay laeng dagiti Saksi dagiti tattao nga addaanen iti bukodda a relihion?

Ar-aramidenda daytoy kas panangsurot iti ulidan ni Jesus. Napan idi ni Jesus kadagiti Judio. Adda bukod a relihion dagiti Judio, ngem simiasida iti Sao ti Dios iti adu a pamay-an. (Mateo 15:1-9) Nagduduma ti relihion ti amin a nasnasion, maaw-awaganda man iti Kristiano wenno saan a Kristiano. Nasken unay a dagiti patpatien dagiti tattao ket maitunos iti Sao ti Dios, ket ti panagregget dagiti Saksi a tumulong kadakuada a mangaramid iti daytoy kaipapananna ti panagayatda kadagiti padada a tattao.

Patien kadi dagiti Saksi a ti laeng relihionda ti umiso?

Rumbeng laeng a panunoten ti asinoman a napasnek iti relihionna nga isu dayta ti umiso. Ta no saan, apay pay laeng a makiraman iti dayta? Nabalakadan dagiti Kristiano: “Siguraduenyo dagiti amin a banag; kumpetkayo a siiirut iti nasayaat.” (1 Tesalonica 5:21) Masapul a siguraduen ti maysa a tao a dagiti patpatienna ket mapaneknekan iti Kasuratan, ta adda laeng maymaysa a pudno a pammati. Patalgedan daytoy ti Efeso 4:5, iti panangdakamatna iti “maysa nga Apo, maysa a pammati, maysa a bautismo.” Saan nga inanamongan ni Jesus ti moderno, parawpaw a panangmatmat nga adda adu a dalan, adu a relihion, nga agturong amin iti pannakaisalakan. Kinunana ketdi: “Akikid ti ruangan ken nailet ti dalan nga agturong iti biag, ket bassit dagidiay makasarak iti dayta.” Mamati dagiti Saksi ni Jehova a nasarakandan dayta. Ta no saan, nagsapulda koman iti sabali a relihion.​—Mateo 7:14.

Mamatida kadi nga isuda laeng ti maisalakan?

Saan. Dagiti minilion a nagbiag kadagidi naglabas a siglo ken saan a Saksi ni Jehova ket agungardanto ken addaanda iti gundaway nga agbiag. Nalabit adu a sibibiag ita ti dumasigto pay iti kinapudno ken kinalinteg sakbay ti “dakkel a rigat,” ket maisalakanda. Maysa pay, kinuna ni Jesus a ditay ukomen ti maysa ken maysa. Kumitatayo iti makinruar a langa; kumita ti Dios iti puso. Umiso ti panagkitana ken mangukom a siaasi. Inkumitna iti im-ima ni Jesus ti panangukom, saan a kadatayo.​—Mateo 7:1-5; 24:21; 25:31.

 Ania a pinansial a kontribusion ti mainanama kadagidiay tumabuno kadagiti gimong dagiti Saksi ni Jehova?

No maipapan iti donasion a kuarta, kinuna ni apostol Pablo: “Tunggal maysa aramidenna koma kas iti inkeddengna iti pusona, saan nga iti nadagsen a rikna wenno mapilpilit, ta ti Dios ayatenna ti naragsak a manangited.” (2 Corinto 9:7) Awan a pulos ti maar-aramid a panagkolekta kadagiti Kingdom Hall ken pagkombensionan dagiti Saksi ni Jehova. Adda dagiti naipuesto a kahon tapno nalaka nga agidonar ti asinoman a mayat. Awan ti makaammo no nangted ti dadduma wenno mano ti intedda. Ad-adu ti maited ti dadduma ngem iti sabsabali; adda dagiti nalabit saan a pulos a makaited. Impakita ni Jesus ti umiso a panangmatmat idi kinomentuanna ti kahon ti gameng idiay templo ti Jerusalem ken dagidiay agidondonar: Ti napateg isu ti kapasidad ti maysa a mangted ken ti espiritu ti panangted, saan a ti gatad ti kuarta.​—Lucas 21:1-4.

No agbalinak a maysa kadagiti Saksi ni Jehova, masapul kadi a mangasabaak a kas iti ar-aramidenda?

No adun ti ammo ti maysa a tao maipapan iti naikari a Paraiso a daga iti sidong ti Pagarian ni Kristo, tarigagayanna nga iranud dayta iti sabsabali. Kastanto met ti aramidenyo. Naimbag a damag dayta!​—Aramid 5:41, 42.

Ti panangaramid iti kasta ket nasken a pamay-an a panangipakita a maysaka nga adalan ni Jesu-Kristo. Iti Biblia, naawagan ni Jesus iti “matalek ken napudno a saksi.” Nangasaba idi adda ditoy daga, a kunkunana: “Ti pagarian ti langlangit asidegen,” ken imbaonna dagiti adalanna a mangasabada met. (Apocalipsis 3:14; Mateo 4:17; 10:7) Idi agangay, binilin ni Jesus dagiti pasurotna: “Inkayo ngarud ket mangaramidkayo iti ad-adalan kadagiti tattao iti amin a nasion, . . . nga isuroyo [ida].” Impadtona pay a sakbay ti panungpalan, “daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion.”​—Mateo 24:14; 28:19, 20.

Adu ti pamay-an a panangiwaragawag iti daytoy naimbag a damag. Ti pannakisarsarita kadagiti gagayyem ken am-ammo ket masansan a luktanna ti gundaway a panangaramid iti dayta. Agsurat ti dadduma wenno agusarda iti telepono. Agipatulod ti dadduma kadagiti koreo iti literatura a naglaon iti artikulo a pagarupenda a paginteresan unay ti am-ammoda. Gapu ta dida kayat nga adda malabsan, idandanon dagiti Saksi ti mensahe iti binalaybalay.

Naglaon ti Biblia iti kastoy a nabara nga awis: “Ti espiritu ken ti nobia agtultuloy a kunaenda: ‘Umayka!’ Ket ti asinoman a dumdumngeg kunaenna koma: ‘Umayka!’ Ket ti asinoman a mawaw umay koma; ti asinoman a mayat awatenna koma ti danum ti biag nga awan bayadna.” (Apocalipsis 22:17) Ti panangipakaammo iti  sabsabali maipapan iti Paraiso a daga ken dagiti bendision iti dayta ket masapul a maaramid a situtulok, nagtaud iti puso a napno iti tarigagay a mangiranud iti daytoy naimbag damag.

Masiguradomi nga adda pay sabali a salsaludsodyo maipapan kadagiti Saksi ni Jehova ken dagiti patpatienda. Nalabit kontrobersial ti dadduma kadagita. Kayatmi a sungbatan dagiti saludsodyo. Limitado ti espasio iti daytoy a broshur, isu nga awisendakayo nga agimtuod kadagiti Saksi dita lugaryo. Mabalinyo nga aramiden dayta kadagiti gimongda idiay Kingdom Hall wenno no sumarungkarda iti pagtaenganyo. Wenno saan, mabalinyo nga ipatulod ti salsaludsodyo iti Watch Tower, nga usarenyo ti maitutop nga address a nailista iti baba.