Siasinoda?

KAYAT dagiti Saksi ni Jehova a maam-ammoyo unay ida. Nalabit nasabetyo idan kas kaarruba ken katrabahuan wenno iti sabali nga inaldaw nga ar-aramidyo. Nalabit nakitayo idan kadagiti lansangan, a mangituktukon iti magasinda kadagiti lumablabas. Wenno nalabit nakasaritayo idan iti apagbiit iti ruanganyo.

Kinapudnona, interesado kadakayo ken iti pagimbaganyo dagiti Saksi ni Jehova. Kayatda ti makipagayam kadakayo ket ibagada ti ad-adu pay maipapan kadakuada, dagiti patpatienda, ti organisasionda, ken ti panangmatmatda kadagiti tattao ken iti lubong a pagbibiagantayo amin. Dayta ti makagapu nga insaganada daytoy a broshur maipaay kadakayo.

Iti adu a bambanag, dagiti Saksi ni Jehova ket kaslada met laeng iti dadduma a tattao. Addaanda kadagiti kadawyan a parikut​—iti ekonomia, pisikal, emosional. Agkamalida no dadduma, ta saanda a perpekto, napaltiingan, wenno di agbiddut. Ngem ikagkagumaanda ti makasursuro kadagiti kapadasanda ken nasaetda nga agadal iti Biblia tapno mailintegda dagiti masapul nga aturen. Nagdedikarda iti Dios nga aramidenda ti pagayatanna, ket ikagkagumaanda a tungpalen dayta a dedikasion. Iti amin nga ar-aramidda agpapaidalanda iti Sao ti Dios ken iti nasantuan nga espirituna.

Napateg unay kadakuada a dagiti patpatienda ket naibasar iti Biblia, saan nga iti pagarup laeng ti tao wenno doktrina ti relihion. Mariknada ti kas iti narikna ni apostol Pablo idi nga inyebkasna iti sidong ti pannakapaltiing: “Ti Dios masarakan koma a napudno, nupay tunggal tao masarakan a naulbod.” (Roma 3:4, Baro a Lubong a Patarus *) No maipapan kadagiti sursuro a maidatdatag a kas kinapudno manipud Biblia, umanamong unay dagiti Saksi iti pamay-an nga inannurot dagiti taga Berea idi nangngegda ti panangaskasaba ni apostol Pablo: “Inawatda ti sao buyogen ti napalalo unay a kinagagar ti panunot, a siaannad a suksukimatenda ti  Kasuratan iti inaldaw no agpayso dagitoy a banag.” (Aramid 17:11) Patien dagiti Saksi ni Jehova nga amin a sursuro ti relihion ket masapul nga aglasat iti daytoy a pannubok no makitunos met laeng iti naipaltiing a Kasuratan, isuda man ti makinsursuro iti dayta wenno sabali. Iyawisda​—idagadagda​—a kasta ti aramidenyo iti pannakisaritayo kadakuada.

Gapu itoy, nalawag a patien dagiti Saksi ni Jehova ti Biblia a kas Sao ti Dios. Ibilangda ti 66 a librona a kas naipaltiing ken umiso no iti historia. Ti kadawyan a maaw-awagan iti Baro a Tulag ket tukoyenda a kas Kristiano a Griego a Kasuratan, ket ti Daan a Tulag awaganda iti Hebreo a Kasuratan. Agpada nga agtalekda kadagitoy, ti Griego ken Hebreo a Kasuratan, ket ibilangda ida a literal malaksid kadagiti ebkas wenno kasasaad a nalawag a mangipaspasimudaag a piguratibo wenno simboliko dagita. Maawatanda a natungpalen ti adu a padto ti Biblia, madama a matungtungpal ti dadduma, ken matungpalto pay ti dadduma.

TI NAGANDA

Saksi ni Jehova? Wen, kasta ti panangtukoyda iti bagbagida. Mangiladawan a nagan dayta, a mangipakpakita a saksianda ti maipapan ken Jehova, ti Kinadiosna, ken ti pangpanggepna. Ti “Dios,” “Apo,” ken “Namarsua”​—kas iti “Presidente,” “Ari,” ken “Heneral”​—ket titulo ken mayaplikar iti nagduduma a saad ti maysa a persona. Ngem ti “Jehova” ket personal a nagan ken tuktukoyenna ti mannakabalin-amin a Dios ken Namarsua iti uniberso. Naipakita daytoy iti Salmo 83:18, sigun iti King James a bersion ti Biblia: “Tapno maammuan koma ti tattao a sika, a maymaysa nga agnagan JEHOVA, ti kangatuan iti intero a daga.”

Ti nagan a Jehova (wenno Yahweh, kas pinili nga usaren ti Romano Katoliko a Jerusalem Bible ken ti sumagmamano nga eskolar) ket agparang iti agarup 7,000 a daras iti orihinal a Hebreo a Kasuratan. Saan a kasta ti agparang kadagiti kaaduan a Biblia no di ket nasukatan iti “Dios” wenno “Apo.” Ngem uray pay kadagita a Biblia, maibaga ti maysa a tao no sadino ti nakausaran ti Jehova iti orihinal a Hebreo a teksto tangay ti naisukat a sasao kadagidiay a paset ket naisurat iti dadakkel ken babassit a kapital a letra, a kas: DIOS, APO. Inusar ti sumagmamano a moderno a patarus ti nagan a Jehova wenno ti nagan a Yahweh. Ngarud, iti Baro a Lubong a Patarus, kastoy ti mabasa iti Isaias 42:8: “Siak ni Jehova. Dayta ti naganko.”

 Ti Nainkasuratan a salaysay a nangalaan dagiti Saksi ni Jehova iti naganda ket adda iti maika-43 a kapitulo ti Isaias. Makita sadiay a ti mapaspasamak iti lubong ket kasla pasamak iti korte: Naawis dagiti didios ti nasnasion nga idatagda dagiti saksida tapno paneknekanda ti ibagbagada a kinalintegda wenno tapno denggenda dagiti saksi iti dasig ni Jehova ket bigbigenda ti kinapudno. Indeklara sadiay ni Jehova iti ilina: “Dakayo dagiti saksik, kuna ni Jehova, ken ti adipenko a pinilik; tapno maammuanyo ken patiendak, ken maawatanyo a siak daydiay: iti kasakbayak awan ti nabukel a Dios, ken awan iti kalpasak. Siak, siak a mismo, ni Jehova; ket malaksid kaniak awan ti manangisalakan.”​—Isaias 43:10, 11, American Standard Version.

Addaan kadagiti saksi ni Jehova a Dios ditoy daga bayat ti rinibribu a tawen sakbay a nayanak ni Jesus. Kalpasan ti panangilanad ti Hebreo kapitulo 11 iti sumagmamano a tattao nga addaan pammati, kuna ti Hebreo 12:1: “No kasta, ngarud, agsipud ta addaantayo iti kastoy kadakkel nga ulep dagiti saksi a mangliklikmut kadatayo, ikkatentayo met ti tunggal dadagsen ken ti basol a silalaka a mangsagud kadatayo, ket buyogen ti panagibtur tarayentayo ti lumba a naikabil iti sanguanantayo.” Kinuna ni Jesus iti saklang ni Poncio Pilato: “Maigapu itoy a nayanakak, ken maigapu itoy nga immayak iti lubong, tapno saksiak ti kinapudno.” Isu ket naawagan iti “matalek ken napudno a saksi.” (Juan 18:37; Apocalipsis 3:14) Kinuna ni Jesus kadagiti adalanna: “Umawatkayto iti pannakabalin inton dumteng kadakayo ti nasantuan nga espiritu, ket dakayto dagiti saksik agpadpada idiay Jerusalem ken iti intero a Judea ken Samaria ken agingga iti kaadaywan a paset ti daga.”​—Aramid 1:8.

Gapuna, agarup 6,000,000 a tattao ita ti mangipakpakaammo iti naimbag a damag ti Pagarian ni Jehova babaen ken Kristo Jesus iti nasurok a 230 a daga ti makarikna nga umiso ti panangtukoyda iti bagbagida a kas Saksi ni Jehova.

[Footnote]

[Blurb iti panid 4]

Dedikadoda iti Dios tapno aramidenda ti pagayatanna

[Blurb iti panid 4]

Mamatida a ti Biblia ket Sao ti Dios

[Blurb iti panid 5]

Ti nagan a nainaig iti kasla pasamak iti korte

[Blurb iti panid 5]

Agarup 6,000,000 a Saksi iti nasurok a 230 a daga

[Ladawan iti panid 3]

Interesadoda kadakayo

[Ladawan iti panid 4]

Ti personal a nagan ti Dios iti kadaanan a Hebreo