Ti Awismi Kadakayo

Tinagiragsakmi ti nakisarita kadakayo babaen iti pinanid daytoy a broshur. Inanamaenmi a naragsakankayo a nangammo iti ad-adu pay maipapan kadagiti Saksi ni Jehova. Pangngaasiyo ta patganyo ti awismi a sumarungkarkayo iti Kingdom Hall-mi. Kitaenyo no kasano ti panaggigimongmi. Kitaenyo no kasano ti panagreggetmi nga iburay iti sabsabali ti naimbag a damag maipapan iti paraiso a daga iti sidong ti Pagarian ni Kristo.

Inkari dayta ti Dios. “Adda baro a langlangit ken baro a daga nga ur-urayentayo sigun iti karina, ket kadagitoy agtaeng ti kinalinteg.” (2 Pedro 3:13) Naglabasen ti adu a siglo. Ngannganin agngudo ti panagur-uraytayo. Kasta ti ipaspasimudaag dagiti kasasaad ti lubong.

“Bayat a makitkitayo nga umas-asidegen ti aldaw,” kinuna ni apostol Pablo, “agpipinnanunottayo koma iti maysa ken maysa tapno mangparegta iti ayat ken nasayaat nga ar-aramid, a saantay a baybay-an ti panagtataripnongtayo a sangsangkamaysa.” (Hebreo 10:24, 25) Awisendakayo nga ipangagyo ti balakad ni Pablo babaen ti pannakitaripnongyo kadakami.