Ti Praktikal a Pateg ti Naimbag a Damag iti Komunidadyo

ITI lubong iti kaaldawantayo, masansan a mangngegtayo ti opinion a: “Saan a praktikal dagiti prinsipio ti Kristianidad. Saanda a makatulong iti narikut a kagimongan iti kaaldawantayo.” Nupay kasta, iti naipadamag a panagtungtong ti pangulo dagiti Hindu a ni Mohandas K. Gandhi ken ti dati a Viceroy ti India iti Britania a ni Lord Irwin, adda naiduma unay a panangmatmat a nayebkas. Naikuna a dinamag ni Lord Irwin ken ni Gandhi no ania ti pagarupenna a mabalin a makarisut kadagiti problema iti nagbaetan ti Britania ken India. Innala ni Gandhi ti Biblia ket inukagna iti maikalima a kapitulo ti Mateo sana kinuna: “No agkaykaysa ti ilim ken ti ilik kadagiti sursuro nga impaay ni Kristo iti daytoy a Sermon iti Bantay, marisuttayo saan laeng a dagiti parikut ti ilita no di ket iti intero a lubong.”

Saritaen dayta a sermon ti panangpatanor iti espiritualidad ken ti panagbalin a naemma, mannakikappia, naasi, panagayat iti kinalinteg. Kondenarenna saan laeng a ti panangpapatay no di pay ket ti panagpungtot iti sabsabali, saan laeng a ti pannakikamalala no di pay ket ti naderrep a pampanunot. Babalawenna ti iresponsable a panagdiborsio a mangsinasina kadagiti pagtaengan ken mangbiktima kadagiti annak. Ibagana kadatayo: ‘Ayatem uray dagidiay manggura kenka, paraburam dagiti agkasapulan, dika ipato ti sabsabali nga awanan-asi, tratuem ti sabsabali a kas iti kayatmo a panangtratoda kenka.’ No mayaplikar amin daytoy a balakad, dakkel ti magunggona. No annuroten dagitoy dagiti tattao iti komunidadyo, nasaysayaat ti pagbalinan ti komunidadyo!

Dagiti Saksi ni Jehova ti pagwadan iti daytoy a pagannurotan. Ti Biblia isurona ida a mangraem iti panagasawa. Masansanay dagiti annakda kadagiti umiso a prinsipio. Maipagpaganetget ti kinapateg ti pamilia. Dagiti nagkaykaysa a pamilia ket bendision iti komunidadyo, ken uray iti nasionyo. Napno ti historia kadagiti pagarigan maipapan kadagiti narbek a pannakabalin ti lubong idi kimmapuy ti singgalut ti pamilia ken immadu ti imoralidad. No ad-adu nga indibidual ken pamilia ti masursuruan dagiti Saksi ni Jehova nga agbiag a maitunos kadagiti Nakristianuan a prinsipio, maksayan ti kinadelingkuente, imoralidad, ken krimen iti komunidadyo.

Ti panangidumduma iti puli ket maysa kadagiti dadakkel a parikut a mangdiddidigra kadagiti komunidad ken nasion. Maisupadi  iti dayta, kinuna ni apostol Pedro: “Makitak a ti Dios saan a mangidumduma, no di ket iti tunggal nasion anamonganna ti tao nga agbuteng kenkuana ken agaramid iti kinalinteg.” Ken insurat ni Pablo: “Awan ti Judio wenno uray Griego, awan ti adipen wenno uray siwayawaya a tao, awan ti lalaki wenno uray babai; ta maymaysakayo amin a persona a naikaykaysa ken Kristo Jesus.” (Aramid 10:34, 35; Galacia 3:28) Patien dagiti Saksi ni Jehova daytoy. Agbibiag ken sangsangkatunos nga agtartrabaho dagiti amin a puli ken kolor iti sangalubongan a hedkuarterda, kadagiti sanga nga opisina, ken kadagiti kongregasion.

Idiay Africa, saan a makapagkakadua ti dadduma a tribu nga awan ti rinnanget. Nupay kasta, kadagiti asamblea dagiti Saksi ni Jehova sadiay, dagiti tattao a naggapu iti nadumaduma a tribu agkakaduada a mangan, maturog, ken agdayaw a sangsangkatunos ken naragsak ti panaglalangenda. Masmasdaaw dagiti opisial ti gobierno a makakita iti dayta. Kinomentuan ti Agosto 2, 1958, nga Amsterdam News iti New York ti maysa a pagarigan ti  mamagkaykaysa nga epekto ti pudno a Kristianidad. Nayebkas ti komento babaen ti panangpaliiw iti internasional nga asamblea a nadakamat itay, a nagtataripnongan ti nasurok a kakapat a milion a Saksi idiay New York City.

“Uray sadino a lugar dagiti Negro, puraw ken Oriental, a nagduduma ti kabibiagda ken naggapu iti isuamin a paset ti lubong, nagpupulapolda a siraragsak ket awan tuben. . . Dagiti Saksi nga immay nagdaydayaw manipud 120 a daga nagkakaduada a nagbiag ken nagdaydayaw a sitatalna, nga ipakpakitana kadagiti Americano no kasano kalaka nga aramiden dayta. . . . Ti asamblea ket nalawag nga ehemplo no kasano a dagiti tattao mabalindat’ agtrabaho ken agbiag a sangsangkatunos.”

Adu ti mangibaga a saan a praktikal dagiti prinsipio ti Kristianidad iti daytoy moderno a lubong. Nupay kasta, ania pay ti sabali a napadasen nga epektibo wenno epektibonto? Pudno a makatulong dagiti Nakristianuan a prinsipio no mayaplikar iti komunidadyo itan, ket dagitoy ti pakaibatayan ti panagkaykaysa ti amin a ‘nasion, tribu, ken il-ili’ iti intero a daga iti sidong ti panangituray ti Pagarian ti Dios iti sangatauan.​—Apocalipsis 7:9, 10.

[Blurb iti panid 23]

Sangsangkatunos nga agtartrabaho dagiti amin a puli ken kolor

[Blurb iti panid 24]

Praktikal ti Kristianidad. Ania pay ti sabali a napadasen nga epektibo?