Makinsango a Makin-uneg nga Akkub

Patgenmi nga Agtutubo,

Ay-ayatennaka unay ti nailangitan nga Amam, a ni Jehova a Dios. Kayatna nga agbalinka a naragsak. ‘Ngem posible ngata ti agbalin a naragsak ita?’ nalabit maikunam. Nasayaat dayta a saludsod. Ngamin, adu ti mapaspasarantayo a rigat. Kasla inaldaw nga adda dagiti tumaud a karit a mangpukaw iti rag-otayo. Ngem tulongannatayo ti naayat nga Amatayo! Ti Saona ket mangipaay iti giya a kasapulantayo tapno mapagballigiantayo dagiti parikut iti biag. Nupay nabayagen a naisurat ti Biblia, praktikal pay laeng ti balakadna agingga ita.​—Salmo 119:98, 99; 2 Timoteo 3:16, 17.

Insaganami daytoy a publikasion gapu ta ay-ayatendaka. Kayatmi a maaddaanka iti naragsak ken kasayaatan a biag. Tapno matagiragsakmo dayta, iparegtami a saanmo laeng a basaen nga interamente daytoy a publikasion no di ket usarem daytoy no adda tumaud a problema. Ti maysa kadagiti panggep daytoy a libro ket tapno sumayaat ti komunikasion dagiti annak ken nagannak. Namnamaenmi nga agkakaduakayo a mangbasa wenno mangadal pay ketdi iti sumagmamano a benneg daytoy. Agsursuroka iti sirib ken kapadasan dagiti dadakkelmo!

Ti mangipatpateg kenka,

Bagi a Manarawidwid Dagiti Saksi ni Jehova