Nasayaat nga Ulidan​—Ni Jacob

Adu a tawen a saan a nagsarsarita da Jacob ken Esau a kabsatna. Kinapudnona, kagurgura ni Esau ni Jacob. Uray no awan ti dakes nga inaramid ni Jacob, isu ti nangaramid iti pamuspusan tapno marisut ti problemada nga agkabsat. Isu ti nagpabus-oy. Saanna a kayat ti makiapa no di ket kayatna nga agkappiada. Saan nga inkompromiso ni Jacob dagiti prinsipiona, ngem saanna met nga inuray nga agpadispensar nga umuna ni Esau sakbay a makikappia.​—Genesis 25:27-34; 27:30-41; 32:3-22; 33:1-9.

Ania ti aramidem tapno marisut ti diyo pagkikinnaawatan kadagiti kapamiliam? No dadduma, mabalin nga iti panagriknam ket sika ti umiso ket ti kabsatmo wenno ti dadakkelmo ti nalawag a nagkamali. Kadagiti kasta a kasasaad, urayem kadi nga agpadispensarda pay nga umuna? Wenno tuladem ni Jacob? No awan ti masalungasing a prinsipio iti Biblia, sidadaanka kadi nga agpabus-oy tapno laeng makapagkappiakayo? (1 Pedro 3:8, 9) Saan nga impalubos ni Jacob a ti kinatangsit ti mamagsisina iti pamiliana. Nagpakumbaba tapno maay-ayona ti kabsatna. Kasta met kadi ti aramidem kadagiti kapamiliam?